Мән касыб фәһлә синфинин јашадығы Романын шәһәрәтрафы гәсәбәләринин бириндә доғулуб боја-баша чатмышам. Һәјат мәнә гаршы чох гәддар олуб. Һеч вахт доғма анамын ким олдуғуну билмәмишәм, атамла да һеч јола ҝетмирдик. Күчә гајдаларыны өјрәнә-өјрәнә бөјүмүшәм.

Артыг 10 јашым оланда оғурлуг едирдим. Биринҹи дәфә евдән гачанда 12 јашым оларды. Атам мәни дәфәләрлә баш полис идарәсиндән чыхарыб. Мән гәддар адам идим, һәмишә мүбаһисә едирдим. Бу дүнјадан јаныглы идим. 14 јашыма чатанда бирдәфәлик евдән ҝетдим. Наркотикә гуршандым, күчәләр мәскәним олду. Јатмаға јерим олмадығындан машынлара ҝириб јатырдым. Сәһәр исә јухудан дуранда јујунмаг үчүн фәвварә ахтарырдым.

Пешәкар оғру идим. Һәр ҹүр оғурлуғу баҹарырдым: ҹамаатын әлиндән чанталарыны дартыб оғурлајырдым, ҝеҹәләр мәнзилләри вә виллалары јарырдым. Пис ад газанмышдым. Тезликлә мәнә пис ад чыхармыш гулдур дәстәсинә гошулмағы тәклиф етдиләр. Онларын арасында оланда банклары јармаг саһәсиндә «пешәкарлашмышдым». Зоракы адам олдуғумдан чох кечмәди ки, гулдур дәстәсиндә авторитет олдум. Мән һарада, силаһым да орада иди. Һәтта јатанда белә ону башымын алтына гојурдум. Гулдурлуг, наркотик, оғурлуг, сөјүш, әхлагсызлыг — бу, мәним һәјат тәрзим иди. Полис көлҝә кими мәни изләјирди. Бир нечә дәфә һәбсә дүшмүшдүм. Ҝаһ азадлыг, ҝаһ һәбс, бир нечә илим дә белә кечмишди.

Ҝүнләрин бир ҝүнү һәбсдән чыханда халаларымдан бириҝилә үз тутдум. Халамын вә ушагларынын Јеһованын Шаһиди олдуғуну билмирдим. Онлар мәни ибадәт ҝөрүшләринә дәвәт етдиләр. Мараг хатиринә онларла ҝетдим. Јығынҹағын кечирилдији јерә — Падшаһлыг залына ҝәлдик. Дүз гапынын ағзында отурдум,  ҝәлиб-ҝедәнләрә ҝөз гојурдум. Тәбии ки, силаһым да үстүмдә иди.

Бу ҝөрүш һәјатымы дәјишди. Һәмин аны һеч унутмарам, мәнә елә ҝәлди ки, санки, башга планетдәјәм. Мәни меһрибанҹасына, достјана, ҝүләрүзлә гаршыладылар. Шаһидләрин ҝөзләриндәки о хејирхаһлыг, о дүрүстлүк һәлә дә ҝөзүмүн габағындан ҝетмир. Бүтүн бунлар мәним дүнјамдан милјонларла километр узаг иди.

Јеһованын Шаһидләри илә Мүгәддәс Китабы арашдырмаға башладым. Билијим артдыгҹа анлајырдым ки, һәјат тәрзими көкүндән дәјишмәлијәм. Сүлејманын мәсәлләри 13:20 ајәсиндәки «һикмәтли илә отуруб-дуран һикмәт газанар, ахмагларла ајаглашан бәдбәхт олар» мәсләһәтинә бүтүн үрәјимлә әмәл етдим. Баша дүшдүм ки, гулдур дәстәси илә әлагәми кәсмәлијәм. Асан олмаса да, Јеһова Аллаһын көмәклији илә буну баҹардым.

Һәмчинин әјин-башыма да хејли әл ҝәздирдим. Чох әлләшиб-вурушдум, ахыры сигарети вә наркотики тәрҝитдим. Узун сачларымы кәсдим. Сырғаларымы чыхарыб атдым. Данышығымы дүзәлтдим. Өмрүмдә биринҹи дәфә иди ки, һәрәкәтләримә фикир вермәјә башладым.

Охумагла һеч вахт арам олмајыб. Буна ҝөрә дә Мүгәддәс Китабы өјрәнән заман чалышган олмаг, диггәтими ҹәмләмәк елә дә асан олмурду. Амма сәј ҝөстәрдикҹә Јеһоваја мәһәббәтим артырды. Һисс едирдим ки, дахилимдә нәсә дәјишиклик баш верир — виҹданым мәни нараһат етмәјә башлајыр. Вахташыры олараг өзүм һагда мәнфи фикирләрә гапылырдым. Һеч ҹүрә инана билмирдим ки, етдијим пис әмәлләрә ҝөрә Јеһова Аллаһ нә вахтса мәни бағышлајар. Һәмин әрәфәләрдә мәнә тәсәлли верән шеј Јеһова Аллаһын ҹидди ҝүнаһлара јол верән падшаһ Давуду бағышламасы һагда охудугларым олду (2 Шамуел 11:1—12:13).

Чәтинлик чәкдијим диҝәр саһә дә евдән-евә ҝедиб иманымы башгалары илә бөлүшмәк иди (Матта 28:19, 20). Горхурдум ки, бирдән әввәлләр инҹитдијим, пислијим дәјән адамлар габағыма чыхар! Амма јаваш-јаваш горхуму јендим. Инсанлара рәһмли вә бағышлајан Јараданымыз һагда өјрәтмәкдән мәмнунлуг дујмаға башладым.

Јеһова Аллаһын јолуну тапмағым һәјатымы горуду! Кечмиш дост-танышларымын чоху ја өлүб, ја да дәмир бармаглыглар архасындадыр. Амма мән сөзүн әсил мәнасында хошбәхтәм вә сәбирсизликлә ҝөзләдијим ҝәләҹәјим вар. Тәвазөкар вә итаәткар олмағы, еләҹә дә вулкан кими пүскүрән гејзими сөндүрмәји өјрәндим. Хасијјәтим дәјишәндән сонра јан-јөрәмдәки инсанларла арамда хош мүнасибәт јаранды. Ҝөзәл һәјат јолдашым Карменлә хошбәхт аилә һәјаты сүрүрүк. Әл-әлә вериб инсанлара Аллаһын Кәламыны өјрәтмәк бизә бөјүк севинҹ ҝәтирир.

Јери ҝәлмишкән, инди дә ишим банкла бағлыдыр, амма бу дәфә пулу јох, тозуну силиб-сүпүрүрәм!