JUMATÏ pasir maranakajj Sangir Besar (Indonesia) markankir mä jiskʼa islar visitasmäna ukhajja, inas playan kullakanakasat kimsanimp jikischismäna. Jupanakajj islan Bibliat yatichirinakat uñtʼatäpkchisa, janiw predicañatak playankapkänti. Ukhamajj ¿kunarus uka kullakanakajj playar sarapjjäna?

Nayraqatjja, jachʼa qalanak thaqañatakiw lamar qotar mantapjjerïna. Uka qalanakajj fútbol anatañ pelot ukchʼänwa, playakamaw qʼepipjjerïna. Ukatjja, maderat lurat sillanakar qontʼasisaw uka qalanak mä martillomp leqʼepjjerïna, ukhamat mä kʼawnat sipans jukʼamp jiskʼa qalanakar tukuyañkama. Ukatjja, uka jiskʼa qalanak plastic baldenakar apantasajj escaleranak makatasaw utapar apapjjerïna. Jachʼa saconakaruw uka qalanak imapjjerïna. Ukatsti, jachʼa camionanakaw uka saconak apasjjapjjerïna, uka qalanakajj jachʼa thakinak lurañatakïnwa.

Uka kullakanakat maynejj Hulda satawa. Jupajj mayni trabajirinakat sipans jukʼamp horanakaw playan trabajïna. Qalanakat pagapkäna ukampiw familiaparojj gastopatak churäna. Ukampis jichhajj mä tablet alasiñ munäna, ukhamat JW Library^® sat aplicacionar mantañataki. Uka aplicacionankir videonakasa qellqatanakas kunjamsa Bibliat jukʼamp sum yatichañataki, Bibliat jukʼamp sum amuyañatak wal yanaptʼaspäna uk Hulda kullakajj yatïnwa.

Mä phajjsi chikataniw Hulda kullakajj pä horanak sapa alwa trabajïna. Kʼutkäna uka qalanakjja, mä jiskʼa camionaruw phoqantäna. Uka qalanak aljat qollqempiw mä tablet alasïna.

Hulda kullakajj akham siwa: “Cheqas qalanak leqʼesajj wal qariyäta, cuerpojas wal usurakitäna. Ukampis mä tablet alasitajatsa, jukʼamp sum predicañatak yanaptʼatapatsa, tantachäwinakatak jukʼamp ratuk wakichtʼasiñatak yanaptʼatapatsa, cuerpojajj uskitäna ukat armasjjayätwa” sasa. Pandemiajj qalltkäna ukhajja, congregacionan taqpach luräwinakapajj internet toq lurasjjäna ukhajj tabletapajj wal kullakar yanaptʼäna. Kuntï Hulda kullakajj wal munkäna uk jikjjatatapat walpun kusistanjja.