Nicolas ukat Céline jilat kullakampirojja, Francia markankir sucursalaw yaqha congregacionar yanaptʼir sarapjjañapatak mayïna. Kunjamsa jupanakajj ukar yatinoqtapjjäna uk akham sasaw sapjje: “Qalltan wali kusisitäpjjayätwa, ukampis qhepat amigonakajat wal llakisjjapjjayäta. Ukankir jilat kullakanakampejj janïraw sum uñtʼasipkayätti” sasa. a Ukhamajj ¿kunas ukanakamp jan aynachtʼañatakisa yaqha congregacionar yatinoqtañatakis yanaptʼiristam? ¿Kunjamsa jilat kullakanakajj yanaptʼapjjaspa? ¿Kunjamanakatsa congregacionankir jilat kullakanakar chʼamañchtʼasma, ukat jumas chʼamañchtʼatarakïsma?

¿KUNANAKAS YATINOQTAÑATAK YANAPTʼIRISTAM?

1. Jehová Diosar confiyam (Sal. 37:5). Japón markankir Kazumi kullakajja, 20 maranakaw mä pachpa congregacionan Diosar servïna, ukampis esposoparuw yaqha lugarar trabajir sarañapatak khitapjjäna, ukatwa kullakajj jupamp sarjjarakïna. ‘Jehová Diosan amparapar thakip katuyañatakejj’ ¿kunsa kullakajj luräna? Kullakajj akham siwa: “Jehová Diosaruw taqe kun yatiyayäta, sapak jikjjatasitajsa, ajjsarayasitajsa, llakisitajsa juparuw cuenttʼayäta. Jupajj chʼam churapunitänwa” sasa.

¿Kunas Jehová Diosar jukʼamp confiyañatak yanaptʼätam? Diosar confiyatasajj mä plantar uñtasitawa, jiltañapatakisa jan jiwsuñapatakis umaw munasi. Nicolas jilatajj Abrahanampita, Jesusampita, Pablompit lupʼïna, jupanakajj Diosan munañap lurañatakejj walja sacrificionak lurapjjäna, ukaw jilatarojj Jehová Diosaw jupanakarjam yanaptʼitani sasin confiyañatak yanaptʼäna. Jumatï Bibliat yatjjatapunïtajja, janiw ukajj jakäwiman cambionakar yatinoqtañatakik yanaptʼkätamti, jan ukasti kunanakatï yaqha congregacionan sum yanaptʼañatak yanaptʼkiristam ukanakwa yateqarakïta.

 2. Janiw mayninakamp igualayasiñamäkiti (Ecl. 7:10). Jules jilatajj Benín markat Estados Unidos markar sarjjäna ukhajja, uka lugaran costumbrenakapar yatinoqtañajj wali chʼamänwa. Jupajj akham siwa: “Sapa maynir vidajat parlañajäkaspas ukham amuyayäta” sasa. Jupatakejj uk lurañajj janiw faciläkänti, ukatwa jilat kullakanakat jukʼat jukʼat jitheqtjjäna. Ukampis jilat kullakanakar jukʼamp uñtʼjjasajja, jupanakampiw chikachasjjäna. Jilatajj akham sarakiwa: “Jaqenakajj aka oraqpachan mä igualakïtanwa. Kuntï parlktan lurkaraktan ukanakwa mayjätanjja. Kunjamäpkitï ukarjamakiw jupanakamp chikachasiñasa, ukwa amuyayäta” sasa. Ukhamajj jichhajj sarkta uka congregacionam janiw nayra congregacionamampejj igualayañamäkiti. Anne-Lise sat mä precursora kullakajj akham siwa: “Kuntï jaytawaykta uka pachp jikjjatañat sipansa, yaqhanak yateqañatakiw yaqha lugarar sarta” sasa.

Mä ancianojj janiw nayra congregacionap jichhajj sarki uka congregacionamp igualayañapäkiti. Inas ukan mä kuns mayj lurañ yatipjjchi, ukampis ukajj janiw jan walipunïkiti. Mä kun lurañatak janïr arskasajja, uka lugaran kunjamsa jakasipjje ukwa nayraqat amuytʼañapa (Ecl. 3:1, 7b). Amuyusarjam kun lurayañat sipansa, luratanakasamp yatichañaw jukʼamp sumajja (2 Cor. 1:24).

3. Congregacionanki­rinakamp chikachasim (Filip. 1:27). Cheqas yaqha lugarar sarjjañajj chʼamakiwa, tiempotakirakiwa, ukampis qalltatpachaw uka lugarankir congregacionan tantachäwinakapat jan faltasiñamäkiti, puedirjamästa ukhajj sarañamapuniwa. Jilat kullakanakatï jan uñjapkätam jan ukajj awisak uñjapjjätam ukhajj ¿kunjamarak yanaptʼapjjätamsti? Lucinda kullakajj pä imill wawapampiw Sudáfrica sat jachʼa markar sarjjäna, ukan kunsa lurapjjäna uk akham siwa: “Amigonakajajj sapkitäna ukarjamaw uka lugarankir congregacionampejj chikachasiyäta. May maya jilat kullakanakampiw predicapjjayäta, tantachäwinakans comentarionak arstʼapjjarakiyäta. Grupjam predikir mistuñatakis utajs maytʼapjjarakiyätwa” sasa.

Jumatï jichhajj sarjjta uka congregacionan luräwinakapan chikachasïta ukhajja, ‘suma yatiyäwinakar confiyañatakiw’ yanaptʼäta. Anne-Lise kullakarojja, taqenimp predicañatak chʼamachasiñapatakiw ancianonakajj ewjjtʼapjjäna. Kullakajj akham siwa: “Uk lurañajj kunja wakiskirisa uk qalltatpach amuyayäta” sasa. Ukhamarus jumatï Salón qʼomachañansa mantenimiento lurañans yanaptʼäta ukhajja, congregacionamarjam uñj-jjatamwa mayninakajj amuyapjjani. Congregacionankirinakamp chikachasiñatak chʼamachasïta ukhajja, jukʼamp ratukiw ukar yatinoqtäta, machaq familianïkasmas ukhamaw amuyasirakïta.

4. Amigonakanïñatak chʼamachasim (2 Cor. 6:11-13). Amigonakanïñatakejj mayninakat cheqpachapuniw llakisiñama. Ukhamajj janïr tantachäw qalltkipana jan ukajj tukuyatar jilat kullakanakamp parltʼasiñataki, jupanakar uñtʼañatak tiemp  apstʼasim. Sutinakap yateqañatak chʼamachasim. Jumatï sutinakap amtasïta, munasiñamp uñjäta, jumamp parltʼañas facilakirakïni ukhajja, jukʼampiw uñtʼañ munapjjatam, amigomäñ munapjjarakini.

Mayninakamp sum uñjayasiñ laykukejj jan yaqha jaqer tukumti, antisas kunjamäktatejj ukhamakïskam. Lucinda kullakat yateqasim, jupajj akham siwa: “Jilat kullakanakar utar invitañwa amtapjjayäta, ukatwa jichhajj suma amigonakanïpjjta” sasa.

“MAYNIT MAYNIKAM KATOQTʼASIPJJAM”

Yaqhep jilat kullakanakatakejja, jan khitirus uñtʼapki uka Salonar mantañajj chʼamakiwa. Ukhamajj maynitï congregacionamar jutjjani ukhajj ¿kunjamsa yanaptʼasma? Apóstol Pablojj akham sänwa: “Kunjamtï Cristojj katoqapktamjja, ukhamarak jumanakajj maynit maynikam katoqtʼasipjjam” sasa (Rom. 15:7). Ancianonakajj Cristot yateqasisaw congregacionapar jutjjapjje uka jilat kullakanakarojj sum katoqtʼapjjañapa (“ ¿Kunas yanaptʼiristam?” sat recuadro liytʼäta). Wawanakat qalltasajj taqeniw sum katoqtʼapjjaspa.

Congregacionasar jutjjapjje ukanakar sum katoqtʼañatakejj utasaruw invittʼañasa, yanaptʼañatakis jankʼakïñasarakiwa. Ukwa mä kullakajj luräna. Markapar jakir sarjjäna uka kullakar yanaptʼañatakejja, kunjamas uka markajja, kawkïr autonakarusa jan ukajj trenarus makataspa uk uñachtʼayañatakiw tiemp apstʼasïna. Uka lugarar purir kullakatakejj ukajj wali askipunïnwa, wal yanaptʼarakïna.

DIOSAR SERVIÑAN JILTASKAKISMAWA

Yaqha congregacionar sarjjasajj inas ajjsarayassta, llakinakanirakïsta. Ukampis ak amuytʼam: tuytañatakejja yaqhep laqʼonakajj jiltkasaw taqpach jañchip jaytapjjañapa. Jumampejj niya ukhamarakiwa, Diosar serviñan jiltaskakiñatakejj uka llakinakam apanukuñamarakiwa, ukhamatwa Jehová Diosar serviñan “tuytkasmas” ukhamäni. Nicolas jilatampi Céline kullakampejj akham sapjjewa:  “Yaqha lugarar sarjjañajj waljanak yateqañatakiw yanaptʼasi. Yaqha jaqenakaru yaqha lugarar yatinoqtañajj jukʼamp suma cristianöñatakiw yanaptʼawayapjjetu” sasa. Qalltan parlaniwayktan uka Jean-Charles jilatajja, kunjamsa yaqha lugarar sarjjañajj familiapar yanaptʼawayi uk akham siwa: “Yaqha congregacionar sarjjañajj Diosar serviñan walpun wawanakajar yanaptʼawayi. Mä qhawqha phajjsinakak pasaskäna ukhaw phuchajajj semanan apaski uka tantachäwin asignacionanëjjäna, yoqajas publicadoräjjarakïnwa” sasa.

Inas yanapajj wal munaski uka congregacionar wal sarañ munsta, ukampis jan sarañ puedkstati. Ukhaman uñjaskasasa, aka yatichäwin yateqawayktan ukarjamaw lurasma, ukhamatwa jichhakis congregacionamar purkasma ukham wasitat qalltasma. Jehová Diosar confiyam, congregacionamankir jilat kullakanakamp predicam, amigonakanïñatak chʼamachasim jan ukajj uñtʼkta ukanakamp jukʼamp amigöñatak chʼamachasim. ¿Kunjamsa congregacionamar jichhak purinipki ukanakarusa jan ukajj yanaptʼa munapki ukanakarus yanaptʼasma? Uk lurañajj Diosar serviñan jukʼamp jiltañatakiw yanaptʼätam, kuna laykutejj munasiñ utjatapatwa cheqpach cristianonakarojj uñtʼasi (Juan 13:35). “Diosarojj ukham sacrificionakaw wal kusisiyi”, jan ukat payachasimti (Heb. 13:16).

Kunaymanin uñjaskasasa, yaqha congregacionarojj walja jilat kullakanakaw yatinoqtapjje, kusisitäpjjarakiwa. ¡Jumampejj ukhamarakïspawa! Anne-Lise kullakajj akham siwa: “Yaqha congregacionar sarjjañajja, chuymaj wali jachʼa jistʼarañatakiw yanaptʼawayitu” sasa. Kazumi kullakajj jan payachasisaw akham saraki: “Yaqha lugarar sarjjasajj kunjamsa Jehová Diosajj yanaptʼasi ukwa nayrat sipans sum uñjayäta” sasa. Jules jilatajj akham sarakiwa: “Jichhajj walja amigonakanëjjtwa, janirakiw mayjtʼasjjti. Aka congregacionan wali yatitäjjtwa, jaytjjañas wali chʼamäspawa” sasa.