BIBLIAJJ janiw cheqäkiti sirinakajja, Daniel libron parlki uka Belsasar reyejj janiw cheqapun jakkänti sasaw walja maranak parlapjjäna (Dan. 5:1). Belsasarajj cheqapuniw utjäna sañatakejja, janiw kuna pruebsa arqueologonakajj jikjjatapkiti sasaw sapjjäna. Ukampis 1854 marat aksarojj janiw ukham sisjjapjjänti, ¿kunatsa?

Uka maranjja, cónsul británico John Taylor sat mä chachajja, Ur sat nayra markajj kawkjankkäntï uka cheqwa allsüna. Jichhajja uka cheqajj Irak markan aynach toqenkiwa. Ukanjja mä jachʼa torre manqhanwa ñeqʼet lurat walja jiskʼa cilindronak katjäna. Uka jiskʼa cilindronakajja largorojj 10 centimetronïnwa, cuneiforme sat letranakampi qellqatarakïnwa. Ukan mä cheqanjja, Babilonia markan Nabonido reyipana ukhamarak Belsasar jilïr yoqapan walja maranak jakañapatak mä oracionaw qellqatäna. Ukatwa Bibliajj janiw cheqäkiti sirinakajja, Belsasarajj cheqapuniw jakaskäna sasin sisjjapjjäna.

Ukampis Biblianjja, Belsasarajj jakaskapunïnwa sasakejj janiw siskiti, jan ukasti reyïnwa sarakiwa. Ukampis Bibliajj janiw cheqäkiti sirinakajja, Belsasarajj janiw reyïkänti sasaw sapjjäna. Sañäni, 1875 mara jakʼanakan jakiri William Talbot sat cientificojj akham sänwa: “Bel-sar-ussur [Belsasar] chachajj Nabonido tatapampi chikaw mark apnaqäna sasas yaqhep jaqenakajj parlapkchejja, ukajj cheqäskapuniw sañatakejj janiw kuna pruebas utjkiti” sasa.

Ukampis ñeqʼet lurata yaqha jiskʼa cilindronak katjapkäna ukajja, Nabonido reyejj walja maranak yaqha markankatapwa qhanstayäna. ¿Khitis uka maranakan marka apnaqpachäna? Mä enciclopediajj akham siwa: “Nabonido reyejj yaqha markankaskäna ukhajja, Belsasar sat jilïr yoqaparuw reyïñapatakisa, jilaparte ejercitop apnaqañapatakisa jaytäna” sasa (Encyclopaedia Britannica). Ukhamasti, Nabonido reyejj yaqha markankaskäna ukhajj Belsasar yoqapaw reyjam apnaqpachäna. Ukatwa arqueólogo ukhamarak lingüista Alan Millard sat chachajj akham säna: ‘Daniel libron Belsasarar reyi satapajj walikïskiwa’ sasa.

Jehová Diosan servirinakapatakejja, Daniel libron cheqätapsa Diosan amuytʼayata librötapsa, Biblia pachpaw sum qhanañchi (2 Tim. 3:16).