CASARATÄKASINA yaqhamp engañjañajja, jan waliruw chacha warmir puriyi. Ukampis yaqhepajj arrepentisir chachaparu jan ukajj warmipar perdonapjjewa, sum jakasjjañatakiw chʼamachasipjjaraki. * Chacha warmjam jakasipkakpans janisa, engañjat uñjasiriw wali chuyma ustʼata jikjjatasi. ¿Kunas ukhaman uñjasipki ukanakarojj jan sint llakisipjjañapatak yanaptʼaspa?

Engañjat uñjasipki ukanakat jilaparterojj Bibliaw chuymachtʼawayi. Biblia liyisajja, Diosajj jupan jachatapsa, llakisitapsa uñjaskatapwa amuyapjje (Malaquías 2:13-16).

“Llakinakajjajj walipun yapjjataskän ukapachaw chuymachäwimampejj kusisiyista” (Salmo 94:19).

Bill sat chachajj akham siwa: “Bibliat uka texto liytʼasajja, kunjamtï mä munasir awkejj wawapar munartʼaskejja, ukhamsa Jehová Diosajj munasiñamp munartʼkitaspa ukham amuyasiyäta” sasa.

“Jumajj cheqapapunïtawa, khititejj cheqapäkaraki ukampejja” (Salmo 18:25, Aymar Biblia).

Carmen warmirojja, esposopajj walja phajjsinakaw yaqhampi engañjäna, jupajj akham siwa: “Esposojajj yaqha warmimpiw engañjitäna, ukampis Jehová Diosajj janipuniw jaytkitaspati ni chuyms ustʼaykitaspati uk sum yatiyäta” sasa.

“Jan jumanakajj kunatsa llakisipjjamti, jan ukasti taqe llakinakamjja Diosaru oracionan yatiyapjjam, taqe chuym ruwtʼasisa [...] jupar oración lurapjjam. Diosaw sumankañapjja churapjjätam, uka sumankañapasti jaqenakajj kuntï amuyki ukat sipansa jukʼampiwa. Uka sumankañaw chuymanakamsa [...] jarkʼaqapjjätam” (Filipenses 4:6, 7).

Sasha sat warmejj akham siwa: “Uka textjja, kutin kutiniw liyirïta. Diosaru jukʼampi orasisajja, jukʼampirakiw chuymajan sumakëjjerïta” sasa.

Parlaniwayktan uka jaqenakajja, janis jakañajj wakisjjaspa ukhamwa awisajj amuyasipjjäna, ukampis Jehová Diosaruw confiyasipjjäna, Bibliaw jupanakar chʼamañchtʼarakïna. Bill sat chachajj akham siwa: “Diosar confiyañaw jan waltʼäwin uñjaskayäta ukhajj jakäwir valoranit uñjañatak yanaptʼawayitu. Mä tiempojj ‘ajjsarkay chʼamak cheqanjamsa’ sarkchiyätjja, Diosajj janipuniw jaytkitänti” sasa (Salmo 23:4).