MÄ ASU wawajj janiw kuns sapapakejj lurkaspati, awk taykapan yanaptʼapwa muni. Ukhamarakiw wawäkasajj awk taykasan yanaptʼap munayätanjja, mä jan uñtʼatar uñjasajj wal sustjasiyätanjja, jupanakan amparapat katjjarusisajja, janiw ajjsarayasjjayätanti.

Awk taykasan munasiñampi uñjatäsajj kusisitakiw jakasiyätanjja. Ukham munasiñampi uñjatajj janiw ajjsarayaskayätanti, ukat kuntï lurkayätan ukajj walikiwa sapjjestän ukhajja, jan ajjsartʼasaw kunsa jukʼamp suma lurayätanjja.

Amigonakasasa ukhamarakiw jan ajjsarañataki yanaptʼawayapjjestu. Jupanakampejj kusisitakiw yateqañ utarus sarayätanjja.

Cheqas janiw taqe wawanakajj ukham suma uñjata jilsuwayapkiti. Yaqhepajj janiw amigonïpkiti, yaqhepasti janiw awk taykapamp sum uñjatäpkiti. Melisa sat warmejj akham siwa: “Familjam kuns luraskir foton uñjta ukhajja, ‘ukham familianiriskäyat ukhajj wali sumäspänwa’ sasaw lupʼirïta” sasa. * Inas jumajj ukhaman uñjasiraksta.

Wawäkasajj inas ajjsarayasis jilsuwaysta, ¿kunatsa? Inas awk taykamajj jan munasipkchiyätamti, janïr jaljtkasajj inas wal chʼajjwapjjerïchïna, uk uñjasajj jumas juchanïkasma ukham inas amuyirïsta. Jan ukajj inas awk taykamampi toqeta, tʼaqhesiyata uñjasiwaysta.

Ukhaman uñjasisajj jan walinakaruw purtʼasipjje. Yaqhepajj qʼajjo wayn tawaqöjjapjje ukhajja, drogampiw qolljasipjje jan ukajj machañaruw purtʼasipjje. Yaqhepasti jan wali amigonakampiw chikachasipjjaraki. Ukat yaqhepajj munasita suma uñjatañ munasajja, mä waynampi jan ukajj mä tawaqompi mistuñ qalltapjje, ukampis qhepatjja jankʼakirakiw jaljtjjapjje, ukhamïpanjja jukʼampiw jupa pachpat pächasjjapjje.

Yaqhep qʼajjo wayn tawaqetanakajj ukanakar saykatapkchisa, janis kunatak askïkaspa ukham amuyasipjje. Anajj akham siwa: “‘Janiw kuns sum lurktati’  sasaw mamajajj sapakuti sirïtu, ukajj cheqäkaspas ukham amuyirïta. ‘Sum lurtajja’ sasin janipuniw sirïkituti ni munasiñampis uñjirïkituti” sasa.

Janiw ukakejj maynir jan waltʼaykiti. Yaqhepajj chacha warmjam jaljtasa, chuymankipstjjasa, jan ukajj janis walïpkaspa ukham amuyasisaw wal llakisjjaspa ukat mayninakampis janiw sum apasjjaspati. ¿Kunas uka jan walinakar atipjañatakejj yanaptʼaspa?

Janiw sapäktanti, Diosaw jiwasampïski Jupajj wal yanaptʼañ munistu.

Diosajj Isaías toqejj akham sistuwa: “Jan ajjsaramti, nayaw jumampïskta, [...], nayäsktwa juman Diosamajja. Nayaw chʼamañchaskäma, nayarakiw yanapaskäma, atipjiri amparajjampirakiw uywaskäma” sasa (Isaías 41:10, 13). Uka arunakajj wal chuymachistu, Diosajj amparasatsa katjjarkistaspa ukhamawa. ¡Janiw llakisiñasäkiti!

Diosan servirinakapajj wali llakitas uñjasipjjerïkchïnjja Diosar confiyañwa yateqapjjäna ukajj Biblian qellqatawa. Ana warmit parltʼañäni jupajj janïr Samuel wawanïkasajj janipuniw wawanïkpachayäti sasaw wal llakisirïna. Jan wawanïpanjja, jupar wal jiskʼachapjjäna. Ukhamïpansti wal jachirïna janiw ni manqʼañsa munirïkänti (1 Samuel 1:6, 8). Ukampis Diosar llakinakap yatiyasajj janiw llakisjjänti (1 Samuel 1:18).

Davitajj wali llakitaw awisajj uñjasirïna, Saúl reyiw jiwayañatak walja maranak arknaqäna. Ukat jiwañat qhespkchïnsa, awisajj aynachtʼataw jikjjatasïna (Salmo 55:2-5; 69:1). Ukampis akham qellqäna: “Nayajj jan kuna llakiniw ikintta, mäkiw ikjarakta, Tatay, jumakiw iyawsañ chuymamp jakayistajja” sasa (Salmo 4:8).

Ana warmisa, David reyisa, jan sinti llakisiñatakejj Diosaruw yanaptʼa mayisipjjäna, Diosasti jupanakarojj yanaptʼänwa (Salmo 55:22). Jiwasajj ukhamarakwa Diosar yanaptʼa maysna.

1. Jehová Diosarojj awkisarjamaw uñjañasa.

Jesusajj ‘cheqpach Diosar uñtʼañatakiw’ chʼamañchistu (Juan 17:3). Apóstol Pablojj akham sarakistuwa: “Diosajj cheqpachana janiw jayankkiti sapaqat jiwasanakatjja” sasa (Hechos 17:27). Ukatwa Santiagojj akham sarakistu: “Diosar jakʼachasipjjam, jupasti jumanakarojj jakʼachasirakiniwa” sasa (Santiago 4:8).

Alajjpachanjja, mä suma Awkisaw utjistu Jupajj wal munasistu, jiwasat wal llakisiraki, uk yatiñajj walpun chuymachistu. Cheqas Diosar taqe chuyma confiyañajj chʼamakiwa, ukampis waljaniw Diosar confiyasajj yanaptʼap katoqawayapjje. Carolinajj akham siwa: “Jehová Diosar awkijarjam uñjasajja, taqe llakinakajwa Jupar yatiyta. Ukajj walpun yanaptʼawayitu” sasa.

Raquelajj akham sarakiwa: “Awk taykajajj utat sarjjapjjäna ukhajja, Jehová Diosaw jan sinti llakisiñatakejj yanaptʼawayitu. Jupampiw parltʼasiyäta, jan waltʼäwinakat mistuñatakis yanaptʼa mayiyäta. Jupajj yanaptʼapunirïtuwa” sasa. *

2. Diosar yupaychirinakampiw chikachasiñasa.

Jesusajj apostolonakapar akham sänwa: “Jumanakasti jilapuräpjjtawa” sasa (Mateo 23:8). Jupanakajj maynit maynikama munasipjjaspa ukat mä familjam Diosar loqtapjjaspa ukwa Jesusajj munäna (Mateo 12:48-50; Juan 13:35).

Jehová Diosan Testigonakapajj cheqpachapuniw mä suma familiar uñtasita munasipjje, yanaptʼasipjje ukat chuymachtʼasipjjaraki (Hebreos 10:24, 25). ‘Tantachäwinakapajj wali sumawa, mä suma qolläkaspas ukhamwa yanaptʼasi’ sasaw walja jaqenakajj sapjje.

Evajj akham sarakiwa: “Tamajan mä suma amigaw utjitäna, jupajj kunjamas jikjjatasirïta uk sum amuyäna. Jupampiw liyipjjerïta, Diosarus mayisipjjerïta ukat sum istʼarakitäna. Janipuniw sapak jaytirïkituti, llakijsa juparuw yatiyirïta, ukaw jan sinti llakisiñatak yanaptʼawayitu” sasa. Raquelajj akham saskakiwa: “Tamanwa ‘awksa, tayksa’ jikjjatta. Jupanakajj wal munasipjjetu, ukaw jan sinti llakisiñatak yanaptʼitu” sasa.

 3. Mayninakar munasiñampiw uñjañasa.

Munasiñampi mayninakar uñjtan ukhajja, jukʼampiw jupanakajj munasipjjarakistu. Jesusajj akham sänwa: “Katoqerit sipansa jukʼamp kusisiñaniw khititï churki ukajja” sasa (Hechos 20:35). Cheqas jiwasatï munasiñamp mayninakar uñjañäni ukhajja, jupanakajj munasiñampiw uñjapjjarakistani. Jesusajj arkirinakaparojj akham sänwa: “Yaqhanakarojj churapjjam, jumanakarusti Diosaw churapjjätam” sasa (Lucas 6:38).

Maynejj munasiñampi uñjistu, jiwasas munasiñampirak uñjtan ukhajja, kusisitakiw jikjjatastanjja. Bibliajj akham siwa: “Munasiñajj janipuniw tukuskiti” sasa (1 Corintios 13:8). Mariajj akham sarakiwa: “Cheqas kuna jan walinaktï nayat amuykta ukajj janiw yaqhepajj cheqäkiti. Ukampis mayninakar yanaptʼasaw jan ukjjat lupʼjjti, ukhamatwa jan ajjsarayasjjti. Mayninakar yanaptʼasajj kusisitaw jikjjatasta” sasa.

Uka kimsa yanaptʼajj janiw llakinakas chhaqtaykaspati, ukampis yanaptʼistaspawa. Carolinajj akham saskakiwa: “Awisajj ajjsarayasiskaktwa. Ukampis janiw sinti ajjsarayasjjti. Jehová Diosajj nayat llakisiwa, amigonakajas utjarakiwa, jupanakaw sum jikjjatasiñajatak yanaptʼapjjetu” sasa. Raquelajj niya ukham saraki: “Awisajj wali llakitaw jikjjatasta. Ukampis ajay toqen walja jilat kullakanakaw utjitu, jupanakaruw yanaptʼa mayta, ukaw jan sinti llakisiñatak yanaptʼitu. Dios Awkijas utjarakituwa, Jupampiw sapüru parltʼasta, janiw ukat sipan kunas jukʼamp sumajj utjkiti” sasa.

Ukampis ukanakajj tukusjjaniwa. Jutïrinjja, aka Oraqejj mä suma Paraisöjjaniwa, ukan taqeniw jan ajjsarayasisa jakasjjañäni. Diosan Arupajj siwa: “Taqenis jan ajjsarasaw jakasipjjani, sapa maynirakiw samartʼasirakini uva, ukhamarak higo alin chʼiwipana” sasa (Miqueas 4:4). Ukhamajj janis kunatak askïksna ukham janiw khitis amuyayjjestaniti, ni jan walinaksa lurjjapjjestaniti. Janirakiw kuna jan walinakantï nayrajj uñjaskayätan uksa amtjjañäniti (Isaías 65:17, 25). Diosampi, Jesusampiw taqe kunsa cheqapar uñjapjjani. Ukhamajja, ‘jan ajjsarasa sarnaqañajj wiñayatakïniwa’ (Isaías 32:17).