MATEO libron akham siwa: “Templor mantasasti, uka manqhan aljiri alasiri jaqenakaruw Jesusajj anqar alisnuküna. Qollqe turkirinakan mesanakapsa paloma aljirinakan banconakapsa qʼal jaqorpayäna. Ukatsti akham sasaw jupanakar säna: ‘Qellqatawa: “Utajajj oración lurañataki uta satäniwa” sasa. Ukampis jumanakajj lunthatanakan utaparuw tukuyapjjtajja’” (Mat. 21:12, 13).

Templon aljirinakajj wali jilaruw aljapjjäna sasaw judionakan sarnaqäwinakapat yatjjatatanakajj qhanañchapjje. Amuytʼañataki, judionakat qhanañchiri nayra qellqatanakarjamajja, pä paloma alañatakejj 25 urunakaw maynejj khä 50 maranakan trabajiñapäna. Leyirjamajja, pisin jakasirinakajj palomanakwa sacrificiot loqtapjjaspäna, ukampis wali jilar aljapjjatap laykojj janiw alirjamäpkänti (Lev. 1:14; 5:7; 12:6-8). Judionakan leyipat yatjjattʼäta Simeón ben Gamaliel sat chacharojj ukaw llakisiyäna, ukatwa mayitäkäna uka sacrificionak jan taqpach loqtayjjänti. Ukhamïpanjja, palomanakajj janiw wali jiläjjänti, kimsa hora trabajitapampikiw maynejj pä paloma alaspäna.

Taqe ukanak amuytʼasajja, templon animalanak aljapkäna ukanakar “lunthatanaka” sasin Jesusan satapajj walikïskänwa. Aljirinakajj jan sinttʼasisaw wali jilar aljapjjäna, jupanakatakikiw jukʼamp munapjjäna.