Roma marka thiy thiyanwa nasta ukat ukanwa jilsuwayarakta. Uka cheqanjja, pisinkañanwa jakasipjjäna. Tʼaqhesitakiw jakasiyäta. Janiw taykajar uñtʼaskti ni tatajampis sum apaskayätti. Callenakan jakasipki ukham jakasiñwa yateqawayta.

Tunka maranïkayäta ukhaw lunthatasiñ qalltta, ukat 12 maranïkasaw utat sarawayjjta. Walja kutiw awkijajj policía utat apsuwayitu. Jaqenakampikiw toqesiskirïta, ratukipuniw colerasiriyäta. Ukat 14 maraniruw utat sarawayjjta jan mayampi kuttʼaniñataki. Callenakanwa jakayäta ukat droganakampiw qolljasirakiyäta. Arumanakajja, mä auto jistʼarasaw ukan ikirïta, alwarojj jareqtʼasiñatak uma thaqeriw sarirïta.

Lunthatasiñatakejj khustʼatapunëjjayätwa. Callenakan bolsonak aparayäta, arumanakas edificionakaru utanakaruw mantayäta. Wali uñtʼatäjjayätwa, ukhamïpansti mä wali uñtʼat jan walinak lurir grupor (pandilla) mantañatakiw invitapjjetäna, ukar mantasajj ‘jukʼampiw lunthatasjjayäta’, banconakar kunaw mantjjayäta. Sinti qhorutaj laykojj grupon wali respetatayätwa. Kawkharus pistolampipuniw sarirïta, ikiñatakis chʼijmaruw uchasirïta. Nuwasiñanakasa, droganakasa, qʼañu luräwinakasa ukat jan wali arunak parlañas nayatakejj walikëjjänwa. Policiansa wali arknaqatäyätwa, walja kutirakiw jistʼantapjjetäna. Walja maranakaw callensa carcelansa uñjasiwayta.

Mä kutejj carcelat mistusajja, mä tiajaruw visittʼir sarta. Jupasa ukat pä wawanakapas Jehová Diosan Qhanañchirïpäjjapjjatap janiw yatkayätti. Jupanakajj “tantachäwir sarañäni” sasaw sapjjetäna, uñjañ laykukiw iyaw sista. Tantachasiñ Utar purisajja, khitis manti mistu uk uñjañatakejj munañajampiw  punku jakʼar qontʼasta. Uka tantachäwirus pistolaj apasirakiyätwa.

Uka tantachäwiw wal yanaptʼawayitu. Ukanjja, yaqha cheqankkiristsa ukham amuyasiyäta. Taqenis wali kusisita ukat munasiñani ukhamapjjänwa. Kunja munasiñampis uñkattʼapjjetäna uk jichhakamas amtasiskaktwa. Janipuniw kunjamtï nayajj jakaskayäta ukhamäkanti.

Jehová Diosan Qhanañchirinakapampi Bibliat yatichayasiñ amtta. Bibliat jukʼat jukʼat yateqkasinjja kuna jan walinaktï lurkayäta ukanak jaytjjañ amtjjayäta. Sañäni, kuntï Proverbios 13:20 qellqatajj siski ukarjam lurañatakiw chʼamachasiyäta, ukanjja akham siwa: “Suma yatiñan jaqenakamp chika sarnaqerejja, suma yatiñanirakïniwa; jan amuytʼan jaqenakamp chika sarnaqeristi, jan waltʼañaruwa purirakini” sasa. Jan walinak lurir grupot jitheqtjjayätwa. Uk lurañajj chʼamakïnwa, ukampis Jehová Diosaw yanaptʼawayitu.

Cuerpojsa jan walinakat qʼomachasjjaraktwa. Cigarro fumañsa drogampi qolljjasiñsa wal chʼamachasisaw jaytawayta. Jachʼa ñikʼutajsa mururasjjaraktwa, jiñchut aretenaksa apsusjjaraktwa, jan wali arunaksa janiw parljjarakti. Jichhapuniw kunatï askïki uk lurjjta.

Janiw liyiñsa ni yatjjatañsa munirïkayätti, ukhamïpansti Bibliat yatjjatañasa amuytʼañasa chʼamakïnwa. Ukampis jukʼat jukʼatwa Jehová Diosar munasjjayäta. Ukat qhepatjja, concienciajas juchañchjjarakitänwa. Janis kunatak askïkirista ukham amuyasjjayäta, “jan wali luratanakajat Jehová Diosajj janipuniw perdonkitaniti” sasaw sayäta. Kunjamsa Jehová Diosajj David reyir juchanakap perdonäna ukanakwa leyirïta, ukaw wal chuymachtʼitäna (2 Samuel 11:1–12:13).

Jaqenakar Diosan arunakap yatiyir sarañajj nayatakejj wali chʼamänwa (Mateo 28:19, 20). Khitinakarutï jan wal lurkayäta ukanakampi jikisiñ wal ajjsarayasiyäta. Ukampis jukʼat jukʼatwa jan ajjsarjjayätti, ukat alajjpachankir Awkisatsa taqe chuymaw yatiyjjayäta, Jupaw taqe juchanaksa perdonistu.

Jehová Diosar uñtʼañaw qhespiyawayitu. Nayra amigonakajatjja, jila partejj jiwaratäjjapjjewa, yaqhepasti carcelankapjjarakiwa. Ukampis nayajj kusisitätwa, jutïritakis mä suma suytʼäwinirakïtwa. Altʼat chuymanïñwa ukat istʼasirïñwa yateqawayta, janirakiw ratuk colerasjjti, ukaw mayninakampi sum apasiñatakis yanaptʼitu. Mä suma warmimpiw casarasta, jupajj Carmen satawa. Panijaw vecinonakajar Bibliat sum yateqapjjañapataki yanatʼapjjta.

Jichhajj qollqe jikjjatañatakejj janiw lunthatasjjti. Banconakar trabajir awisajj saraskaktwa, ukampis janiw lunthatasir sarkti jan ukasti qʼomachiriw sarta.