Caifás chachan familiarapänwa
Nayra yänakat yatjjatirinakajja, Bibliajj parlki uka jaqenakan utjatapwa awisajj qhanstayapjje. Nayra yänakanjj inas sutinakap uñstchi jan ukajj jupampi sarnaqer jaqenakan sutinakap uñstchi. 2011 maranjja, nayra yänakat yatjjatir Israel markankir jaqenakajj mä caja (cofre) jikjjatapjjatayna. Ukasti niy 2.000 maranakanïnwa. Ukat caliza qalat kʼutsutawa. Ukanjja, mä warmin chʼakhanakapaw imatäna, jañchipajj ñusantjjäna uka qhepatwa chʼakhanakap imjjapjjatayna.
Uka cajan akham qellqatänwa: “Miriam, Yeshuan phuchhapa, Yeshuajj Caifasan yoqapa, Caifasajj Maaziasan sacerdotepa Beth Imri ukana” sasa. Caifás jilïr sacerdotew Jesusar juchañchañataki ukat jiwayañataki pʼeqtʼäna (Juan 11:48-50). Flavio Josefo chachan aruparjamajja, jilïr sacerdotejj “José, Caifás satäkis” ukanwa. Uka cajajj Caifasan familiarapankänwa. Ukat jukʼampi nayrajja, yaqha caja jikjjatapjjatayna, ukasti Caifás chachankatapwa amuyasïna, ukanjj akham qellqatarakïnwa: “Joseyajj Caifasan yoqapa”. * Ukhamasti Miriamajj Caifasan familiarapäpachänwa.
Autoridad de Antigüedades de Israel (inglés arut qellqanakarjamajja IAA) ukankirinakajja, kawkhantï nayrajj jiwatanak imapkäna uka cheqat lunthatirinakaruw uka caj aparasi sasaw yatiyapjjäna. Uka cajata ukat qellqatapat yatjjatasajja, cheqätapwa uñachtʼayasi.
Uka cajat akwa yatjjatasi. Nayra Israel markanjja, sacerdotenakajj 24 tamanakar jalanoqatäpjjänwa ukat Jerusalén templon loqtañatakejj waktʼkäna ukarjamaw mantapjjäna. Uka tamanakat qhep mantirejja, Maaziasan tamapänwa (1 Cró. 24:18). Ukat uka cajan qellqataparjamajja, “Caifasan familiapajj Maazías sacerdoten tamapankatapwa” qhanstayi sasaw IAA ukankirinakajj sapjje.
“Beth Imri” sasin cajan uñstki ukajja, aka pä toqetwa amuytʼayistaspa sasaw IAA ukankirinakajj sapjje. Nayraqatjja, inas “sacerdote familian sutipächi, Immer [Imer] chachan wawanakapa (Esdras 2:36-37; Nehemías 7:39-42). Jupanakasti Maazías sacerdoten tamapankapjjänwa”. Payïristi, inas kawkhatäkantï “Miriamasa jan ukajj familiapasa uka cheqan sutipächïna”. Ukhamäkchïn janisa, Bibliajj cheqapch jaqenakat parlatapwa uka cajajj uñachtʼayi.
^ Caifasan cajapat jukʼamp yatjjatañatakejja, La Atalaya enero 15, 2006, revistat 10-13 jananak uñjjattʼäta, pʼeqeñchäwipajj akawa: “El sumo sacerdote que condenó a Jesús”.
