“Jan ajjsaramti, nayaw jumampïskta. Jan llakisimti, nayaw juman Diosamätjja. Nayaw jumarojj chʼam churäma, jïsa, nayaw jumarojj yanaptʼäma. Cheqpachapuniw jumarojj cheqapar lurir kupi amparajampejj katjjasïma” (Isaías 41:10, Machaq Mundon Jakirinakataki).

 “Jan ajjsaramti, nayaw jumampïskta, jan ajjsaramti, nayäsktwa juman Diosamajja. Nayaw chʼamañchaskäma, nayarakiw yanapaskäma, atipjiri amparajjampirakiw uywaskäma” (Isaías 41:10, Qullan Arunaka, 1992).

 Jehová * Diosajja, jan jitheqtiri servirinakapajj kuna jan walinakansay uñjasisipkpan nayajj jupanakar yanaptʼapuniwa sasaw qhanañchi.

 “Nayaw jumampïskta”. Jehová Diosajj servirinakaparojj jan ajjsarapjjamti siwa. Jupanakajj janiw sapäpkiti, servirinakapajj kunjamanakansa uñjasipjje uk sum Diosajj yati, oracionanakapsa istʼarakiwa. Dios pachpas jupanakampïkaspa ukhamawa (Salmo 34:15; 1 Pedro 3:12).

 “Nayaw juman Diosamätjja”. Nayajj jumanakan Diosamäskaktwa, katoqapjjaraksmawa sasaw Jehová Diosajj servirinakapar chuymachtʼi. Kuna jan walisay pasaskpan, Diosajj kunjamatsa jupanakar cuidapuniniwa, uk servirinakapajj sum yatipjje (Salmo 118:6; Romanos 8:32; Hebreos 13:6).

 “Nayaw jumarojj chʼam churäma, jïsa, nayaw jumarojj yanaptʼäma. Cheqpachapuniw jumarojj cheqapar lurir kupi amparajampejj katjjasïma”. Diosajj kunjamsa servirinakapar yanaptʼani ukat jan payachasipjjañapatakejja, Jehová Diosajj kimsa kutiw uka pachpa amuyunak qhanstayi. Jupajj ‘amparapatwa’ parli, ukhamatwa kunsa yanaptʼap munirinakar yanaptʼañatak jupajj luri uk amuytʼayi. Jupanakat maynitï tinkuspajja, Diosajj jankʼakiw kupi amparapamp katthapisajj wayti (Isaías 41:13).

 Diosajj Bibliampiw servirinakaparojj yanaptʼi chʼamañchtʼaraki (Josué 1:8; Hebreos 4:12). Jan walinakar saykatañatakejja, Biblian suma ewjjtʼanakaw utji, ukanakaw pobren jakasktan ukhasa, usutäktan ukhasa, mä munat familiärasajj jiwjje ukhas yanaptʼistu (Proverbios 2:6, 7). Servirinakapan sum amuytʼasipjjañapatakisa llakinakamp jan aynachtʼapjjañapatakisa, Diosajj espíritu santo chʼamap toqew yanaptʼi (Isaías 40:29; Lucas 11:13).

 Uka versiculonkir arunakampejja, Diosajj jupat jan jitheqtiri servirinakaparuw chuymachtʼaskäna, jupanakajj tiempompejj Babiloniar apatäpjjänwa. Jehová Diosan arsutaparjamajja, Babiloniar apatanakajj markapar niya kuttʼañampëjjapjjani ukhajj khitis Babilonia markar katuntañatak amenazañapäna, khitis uka jakʼankir markanakar qʼal tukjañapäna ukanakat yatiyäwinakaw istʼasiñapäna (Isaías 41:2-4; 44:1-4). Babiloniampi uka jakʼankir markanakampejj wali sustjatäpjjañapänwa, ukampis judionakajj janiw kunatsa llakisipjjañapäkänti, kuna laykutejj Jehová Diosaw jupanakar arjjatañapäna. Jupanakan jan ajjsarapjjañapatakejja, Jehová Diosajj kimsa kutiw “jan ajjsaramti” sasin säna (Isaías 41:5, 6, 10, 13, 14).

 Cheqansa, Isaías 41:10 textonkir arunakajj Babiloniar apatäpkäna uka Diosat jan jitheqtir judionakatakïnwa, ukampis Jehová Diosaw uka arunak jichhakam imaskaki, ukhamat taqe servirinakapar chuymachtʼañataki (Isaías 40:8; Romanos 15:4). Jehová Diosajj nayra servirinakaparojj yanaptʼänwa, jichhürunakan ukhamarakiw yanaptʼaski.