Küpa kimfilmi ta kiñe che, wünelu mu: “¿Iney pingeymi?” ramtuafuymi chi. Ka femngechi, küpa kimfilmi ta Ngünechen ka: “¿Iney pingeymi?” ramtufilmi, ¿chem wiñoldunguaeymu ta kidu?

“Iñche ta Jewba. Tüfa tañi üy” (Isaías 42:8).

Kidu falintuniefi tañi üy. Chaw Ngünechen iney no rume üytukulaeyew, kidutu üytukuwi. Jewba feypi: “Tüfa tañi üy rumel mew, ka femngechi pu küpanche üytuaenew” (Éxodo 3:15). Biblia mu, Chaw Dios ñi üy doy rupa müley ta kakelu üytun ñi nieel, kiñeke tüfa: Kom Pepiluwün-nielu, Wenu Chaw, Ñidol kam Ngünechen. Ka doy rupa müley kakelu che ñi üy mu, kiñeke tüfa: Abraam, Moyse, David ka Jesus. Kafey, Jewba ayükey kom pu che ñi kimüñmayaetew tañi üy. Biblia feypi: “Kom che tañi kimal eymi müten tami Alüpüralen itrokom Mapu mu, Jewba pingey tami üy” (Salmo 83:18).

Jesus ta falintuniefi Chaw Ngünechen ñi üy. Padrenuestro pingechi ngillatun mu, Jesus feypifi tañi pu inanieetew ñi famngechi ngillatuafiel ta Ngünechen: “Yamniengepe tami üy” (Matew 6:9). Kafey, Jesus famngechi ngillatufi ta Chaw Ngünechen: “Chaw, kom che püramyepe tami üy” (Juan 12:28). Jesus doyümi ñi püramyeafiel Chaw Ngünechen tañi üy. Pengeli tüfa ngillatufilu ta Jewba: “Fey ti pu che [...], iñche kimeltulelfiñ tami üy” (Juan 17:6).

Pu kimfilu ta Chaw Ngünechen falintukefi ñi üy. Pu che poyekefilu ta Jewba kuyfi, kimtukuyngün tüfa: ñi kuñiwtukuaetew ka montulaetew Chaw Dios, mülefuyngün ñi maneluwküleal kidu ñi üy mu. Feymu Biblia feypi: “Jewba ñi üy kiñe newen-ngechi ellkawpeyüm reke feley. Üye mu lefmawkey tati norngechi che, fey kuñiwtukungekey” (Proverbios 18:10). Ka feypi:  “Kom pu maneluwkülelu Jewba ñi üy mu, montulngeay” (Joel 2:32). Biblia pengeli trürümlayafuy pu poyekefilu ta Jewba tati femkenolu mu, feypi: “Kom pu trokiñche miyawayngün kidu ñi ngünechen tañi üy mew. Welu iñchiñ rumel miyawaiñ taiñ Chaw Ngünechen Jewba ñi üy mu” (Miqueas 4:5; Hecho 15:14).

Kiñe üy pengelkelu ta Chaw Dios müten. Pu adümuwkelu Biblia dungu, feypingün Chaw Ngünechen ñi üy küpa feypi “Femkelu tañi Femürpual”. Jewba kimeltuy chem pifel ñi üy, feypifilu ta Moyse: “Iñche Feman chem tañi ayükeel ñi femal” (Éxodo 3:14). Feychi üy pengeli Chaw Ngünechen dewmafi itrokom dungu. Welu ka dungu pengeli: ñi femürpual tañi ayükeelchi dungu, Jewba ngerpuafuy chem dungu ñi duamnieel, ka kidu femkey kom tañi dewman ñi ngerpual ka ñi femkeal chem dungu rume tañi duamnieel. Kom tati üytun ñi nieel Chaw Dios pengeli kidu ñi alüpüralen, ñi ñidolkülen ka ñi newen-ngen. Welu Chaw Ngünechen ñi üy müten rüf pengelkey chumngen ta kidu ka chem ngerpuafuy ñi femal chem dungu rume.

Chaw Ngünechen ñi üy pengeli ñi duamtucheken. Tañi üy pengeli kidu duamniefi tañi dewmael: pu che ka itrofill mülelu. Jewba kimfalkünuy tañi üy kidu ñi pin mu, tüfa pengeli kidu ayükey taiñ kimafiel. Feley llemay, Chaw Dios pilay taiñ feypial: “Ngünechen kimfalkünuwkelay ka alü kamapuley iñche mu”. Welu may kidu ayükey kom iñchiñ taiñ rüf weniyeafiel (Salmo 73:28).

Üytufiliyiñ ta Chaw Ngünechen, pengelaiñ taiñ duamtuniefiel. Rakiduamaymi ta tüfa: küpa weniyefilmi kiñe che, feypiafimi tami üy. Welu feychi che müchayke üytunoelmu, ¿chum duamküleafuymi? Epu rume duamküleafuymi, fey ramtuwafuymi: “¿Rüf küpa weniyeenew ta kidu?”. Chaw Dios ka femngechi kimfalkünueiñmu ñi üy ka yafültukukeeiñmu taiñ üytuafiel. Femliyiñ tüfa, pengelelafiyiñ ta Jewba taiñ küpa weniyefiel. Kidu kimniey tuchi “rakiduamniefilu Kidu tañi üy” (Malaquías 3:16).

Dew kimnieiñ iney pingey Chaw Ngünechen. Welu taiñ doy küme kimafiel, duamfali kimal chumngey ta kidu.