“Inei rume adquintuniefile quiñe domo, ca illurpufile, deu ñihualdomoi ñi piuque mu” (Mateo 5:28).

¿CHUMNGELU DUAMFALI ÑI QUIMNGEAL?

Famülque mu, fentren che pequei pornografia ca cüdaungelai ñi quintungeal. Ayülmi tami ayühuelafiel ta Chau Ngünechen ca tami doi ayüucüleal, mülefui tami quimal chem raquiduamquei Chau Ngünechen ti pornografia mu.

BIBLIA TAÑI FEIPILEN

Biblia dungulai pornografia mu, huelu eluqueiñmu fentren ngülam taiñ penoafiel pod cudumuhun.

Por ejemplo, Biblia feipi quiñe huentru “adquintuniefile quiñe domo” quisu ñi domongenolu ca ayüle ñi cudumuhual tati domo engu, yeafeyu ñi ñihualdomoal. Tüfachi ngülam elungei com che, nielu cam nienolu afcadi, amulele ñi adquintuniefiel tati pornografia adentun femngechi tañi conal pod cudumuhun mu. Femal tüfa lladcülcaquefi ta Chau Ngünechen.

“Com quiñepülecünuafimün tamün cuerpo ñi illutuel, femngechi conlayaimün pod cudumuhun, ünufal dungu, ca rume illulayaimün cudumuhun dungu. Cafei conlayaimün huesaque illutun mu, ca diñmatufengelayaimün” (Colosenses 3:5).

PU CHE ÑI FEIPIQUEEL

Quiñeque adümuhun-ngechi che feipiqueingün pornografia ñi duam mu, pu che conlayafui pod cudumuhun meu. ¿Cüpa feipi tüfa müte huesa dungu no tati pornografia?

BIBLIA ÑI FEIPILEN

Biblia feipi Chau Dios ayüquelai pecanca ayecan dungu (Efesios 5:3, 4). Fei am ayüquenolu, ¿chem piafuiñ pornografia mu? Ti pornografia tripaquei video mu pengelquelu ñihualuhun, cudumuhun chaf huentru ca chaf domo engu, ca caquelu podngechi cudumuhun dungu. Tati pecan ayecan lladcülcaquefilu ta Ngünechen, doyelchi mai adquintual podngechi cudumuhun.

Pu adümuhun-ngechi che raquiduamquelaingün tati pornografia mu pu che conquei pod cudumuhun mu. Huelu tati Biblia cüme pengeli pefiel mu pornografia, famentuquefi ta che Chau Ngünechen mu ca lladcülcaquefi. Biblia ngülamtuqueiñmu tüfa: “Com quiñepülecünuafimün tamün cuerpo ñi illutuel, femngechi conlayaimün pod cudumuhun [...] ca rume illulayaimün cudumuhun dungu” (Colosenses 3:5). Feiti pu pequelu pornografia femquelai tüfa, ngüneuquelai ñi illun, doi mai doyelquei ñi illuafiel.

“Quintufimün ti cüme dungu, tati huesa dungu no [...]. Üdeafimün ti huesa dungu ca piuqueyeafimün ti cüme dungu” (Amós 5:14, 15).

BIBLIA ÑI FEIPILEN

Biblia pengelquei cuifi mu mülequefui che femquefulu pod cudumuhun, ngollife ca hueñefengequefuingün, huelu elcünutui ñi huesa femquefel engün fei cristianongerpuingün (1 Corintios 6:9-11). ¿Chem quellueyu? Inafingün Biblia mu mülechi ngülam, feimu adümfingün ñi üdeafiel ti huesaque dungu.

¿Chem quelluafeiñmu taiñ üdeafiel ti pornografia? Raquiduamal pu che pequelu pornografia huesa amuleai ñi mongen. Ti Universidad de Utah (Estados Unidos mapu mu) feipi pu che pequelu pornografia contuqueyu “depresion cutran, püntünentuuquei caquelu pu che meu, cümelcalequelai tañi pu che engün”, ca fill huesaque dungu contuafeyu. Huelu chumngechi peiñ, ti pornografia lladcülcaquefi ta Chau Ngünechen, fei hueniyehuelayafuiñ. ¡Müna huesa dungu!

Biblia ca quelluafeiñmu taiñ piuqueyeafiel ti cümeque dungu. Doi papeltufiliyiñ Biblia, doi piuqueyeafiyiñ Chau Dios ñi huercüelchi dungu. Piuquentucuniefiel tañi ngülam quelluaiñmu taiñ penoafiel pornografia ca feipial ti salmista reque: “Lelilayafiñ chem no rume falinolu” (Salmo 101:3).