Fente yafüluulu rume pu che, turpu nielayafuingün tüngün com mapu mu. ¿Chumngelu? Peaiñ:

•   “Tati pu che trecalelu, ngen-ngelai ñi adcünual quisu tañi trecan no rume engün” (Jeremías 10:23). Pu che deumangelaingün ñi quisutu ngüneniehual, feimu turpu nielayafuingün tüngün quisu ñi duam mu müten.

•   “Maneluulayaimün pu principe meu ca chem huentru meu no rume, fei engün am montul-layaimünmeu. Tripaquei tañi püllü, fei huiñotui trufür mapu meu; feichi antü meu mai niehuelai raquiduam” (Salmo 146:3, 4). Cüme duam niefule rume pu gobernante, fentecünulayafuingün ñi müleal ta aucan, hueichan.

•   “Epe puucülele ñi afal mapu müleyechi dungu, müleai cüdaungechi dungu ca cuñihun-ngeai ta mongen. Tati pu che [...] rume illcufengeaingün, piuqueyelayafi ti cümeque dungu engün. Huesalcayafi quisu tañi pu hueni engün, inayai quisu tañi pin engün, rume mallmangeaingün” (2 Timoteo 3:1-4). Famülque mu epe puucülei ñi afal mapu müleyechi dungu, feimu fente ñi huesa piuquengen mu ta che, cüme felelai ti dungu mapu meu.

•   “¡Aungei ti mapu ca ti lafquen! Huecüfü nagpui ta eimün meu. Fütra illculei, quimniei ñi pichilehuen tañi antü” (Apocalipsis 12:12). Chau Dios ñi doi fütra caiñe fei ta Huecüfü, tüfa ütrüfnacümngei mapu mu. Feimu fentren che quehuaquei ca huesa piuquengei, ti Huecüfü reque. Petu ngüneniele ti mapu, turpu tüngcülelayafuiñ (Juan 12:31).

•   Chau Dios ñi Reino “atemcayafi ca apümcayafi com tüfachi caquelu pu ngünenien” ñi caiñetueteu, “ca quisu müten chumcaunorume aflayai” (Daniel 2:44). Chau Dios ñi Reino müten eluafi pu che ñi tüngcüleal rumel mu, turpu femlayafui caquelu gobierno (Salmo 145:16).