Felei llemai. Tati Biblia quiñe ciencia lifru no tati, huelu quiñeque dungu ñi feipin ti ciencia, ca femngechi feipilei Biblia. Feula ngüneduamaiñ quiñeque dungu ñi quimeltuqueel Biblia, fei peaiñ chumngechi ñi nüucülen ciencia dungu mu ca ñi trürcülenon pu che ñi feyentuquefel fütra cuifi mu.

•   Biblia feipi com ñi mülen huenu mu ca Mapu mu niei tañi deumaeteu (Génesis 1:1). Huelu cuifi feyentun feipiquefui com ñi mülen huefparumei quiñe fütra dungu mu ñi rupan. Tati pu babilonio feipiquefuingün tañi pu dios ñi deumafiel com ñi mülen, tuhuingün epu fütraque lafquen mu. Cangelu epeu feipi com tañi mülen tripai quiñe fütra curam meu.

•   Biblia feipi com ñi mülen fütra huenu mu ca Mapu mu, niei tañi ngünenieteu (Job 38:33; Jeremías 33:25). Huelu quiñeque epeu feipi tati pu che nielai inei tañi incayaeteu, feimu tati pu dios ayüfule ñi huesalcayaeteu, femafuingün müten.

•   Tati Biblia feipi: “Tati mapu pültrülelai chem meu no rume” (Job 26:7). Cuifique feyentun feipiquefui tati Mapu felefui quiñe llüd cura reque ca ñi meñcunieteu quiñe fütra cülliñ.

•   Biblia feipi tati fütraque lafquen meu püraquei ti co trucur reque ca tromücünuuquei. Fei hula mahunquetui cam nagpaquei pire (Job 36:27, 28; Eclesiastés 1:7; Isaías 55:10; Amós 9:6). Huelu cuifique feyentun feipiquefui tati lafquen co miñche mapu meu ta huefpaquefui. Rume fentren tripantu femngechi feyentuquefui che.

•   Biblia feipi tati fütraque huincul ñi mülen fantepu meu, cuifi mülequefui miñche lafquen mu (Salmo 104:6, 8). Huelu cuifique feyentun feipiquefui quiñeque dios ñi mülequefel, femngechi deumacünufingün müten tati pu huincul.

•   Biblia feipi fente falin-ngen taiñ lifcüleal. Cuifi, Jehová feipifi pu israelche ñi cüchahual tañi cuhu engün tufile engün quiñe la. Ca feipi ñi huichucünungeal tati pu tul cutran nielu ca ñi rüngaltucungeal quisuque ñi me engün (Levítico 11:28; 13:1-5; Deuteronomio 23:13). Huelu cuifi mu, pu egiptoche pünequefuingün tañi me engün ñi lahuentuhual.

 Quiñeque che feipiquei tati Biblia nütramcalu ciencia dungu mu, huelulcalei ñi feipin. Huelu cüme ngüneduamngele ti Biblia, quimafuiñ ñi rüfngenon ñi feipiqueel tati pu che. Peaiñ chem meu chaftudungungei Biblia ciencia dungu mu.

 Quiñeque che feipiquei: Tati Biblia feipi tati huenu ca tati Mapu deumangei cayu antü meu.

 Tati rüf dungu: Tati Biblia pengeli fütra cuifi mu Chau Dios ñi deumafiel tati fütra huenu ca tati Mapu (Génesis 1:1). Doi mai, ngüneduamngei ñi feipin Génesis 2:4, feipi: “Feichi Ñidol Ngünechen deumalu ta callfü huenu ca ti Mapu”, feipilai tunten antü mu ñi deumael.

 Quiñeque che feipiquei: Tati Biblia feipi com tati pu anümca deumangei petu ñi deumangenon ta antü, huelu mülenofule ta antü mülelayafui anümca (Génesis 1:11, 16).

 Tati rüf dungu: Tati Biblia feipi hunelu meu Chau Dios deumai tati fütra huenu, fei fütra huenu meu mülei tati pu huangülen ca tati antü (Génesis 1:1). Hunelu meu, Chau Ngünechen elufi ti antü ñi huenche alofafiel ti Mapu, fei hula doi cüme alofi ti antü. Femngechi mu, mülerpui tati pu anümca (Génesis 1:3-5, 12, 13). Fei hula, Mapu meu fente cüme peufaluhui tati antü (Génesis 1:16).

 Quiñeque che feipiquei: Tati Biblia feipi tati antü chihudquiyahui inafül Mapu meu.

 Tati rüf dungu: Tati Biblia feipi Eclesiastés 1:5 mu: “Tripaquei ti antü ca conputuquei; fei ca huiñotuquei ñi tripatual”. Tüfachi dungu ñi feipiel Biblia pengeli, iñchiñ mülelu Mapu mu chihudquiyaulu ti antü troquiquefiyiñ. Iñchiñ ca femngechi feipiqueiñ: “Tripai antü” cam “coni antü”. ¿Chumngelu am? Rüfcünu llemai, tati Mapu chihudquiyahui inafül antü mu.

 Quiñeque che feipiquei: Tati Mapu chincülcülelai, quiñe llüd cura reque felei.

 Ti rüf dungu: Tati Biblia ti meli huitran Mapu püle feipilu, tüfa feipi com huall Mapu ngelu (Isaías 11:12; Lucas 13:29).