Briana, 15 tripantu niei, feipi: “Eluufun ñi papeltual Biblia, huelu ¡rume alüi ti lifru anai!”.

 ¿Ca femngechi raquiduampeimi mai? Tüfachi troquiñ müna quelluaimu.

•  ¿Chumngelu cümei tami papeltuafiel Biblia?

•  ¿Chumngechi adcünuafuimi tami papeltuafiel Biblia?

•  Pu huechequeche ñi feipin

 Fentren che afeluuqueyu ñi papeltuafiel ti Biblia. Eimi raquiduamqueimi chi tati Biblia müna alün-ngei ca alü pichingei ñi huirin. Feimu doyümqueimi chi peal television cam fillque video, “doi ayüfali tüfa” piqueimi chi. Femngechi raquiduamülmi, huesa dungu no tati.

 Raquiduamnge tüfa: rünganentulmi quiñe falin cacon, ¿tunte ayüucüleafuimi quimal chem ñi nieel?

 Tati Biblia quiñe falin cacon reque felei. Tüfa meu mülei falinque ngülam tami quelluaeteu, ¿chumngechi quelluafeimu?

•   Tami cüme dullial chem femal.

•   Tami cüme yeucüleal tami pu chau engu.

•   Tami peal cümeque hueni.

•   Tami huesa duamcülenoal.

 Rume cuifi tuhun-ngei ti Biblia, fei ¿rüf quellupeafeiñmu mai famülque mu? ¡Rüf quelluqueiñmu! Chau Dios elcünufi llemai (2 Timoteo 3:⁠16). Com ti ngülam ñi huiriconcülen, cüpai Chau Ngünechen mu.

 Hune, papeltuafuimi ti hunen lifru mu puhualu afchi lifru mu. Femngechi femülmi, quimafuimi chumngechi ñi nüucülen ti dungu. Tüfachi dungu femafuimi:

•    Eluhuafuimi tami papeltual ti lifru Génesis puhualu Apocalipsis mu.

•    Papeltuafuimi chumngechi ñi rupan ti nütram.

 Quiñe ngülam: Ti troquiñ 4-A ti folleto Guía para el estudio de la Palabra de Dios, huiringei chem rupai Jesús hue miyaupalu Mapu meu ca ñi rupan quisu epe aflu ñi mongen Mapu meu.

 Epu, rupamequelmi quiñe huesa dungu mu, raquiduamnge chem nütram quelluafeimu, fei papeltuafimi. Raquiduamnge tüfa:

•   ¿Ayüafuimi tami nieal cümeque hueni? Fei papeltuafimi chem ñi femün David Jonatán engu (1 Samuel capitulo 18 puulu 20). Tami papeltun mu, ngüneduamnge chem dungu meu fente hueniyeuquefui David Jonatán engu.

•   ¿Ayüafuimi tami doi pepicaucüleal ngüchaltucungelmi femal huesaque dungu? Papeltuafuimi ñi rupan ta José (Génesis capitulo 39). Quisu obligangei ñi femal quiñe rume huesa dungu. Huelu ngünehui. Fei ngüneduamafuimi chem quellueyu.

•   ¿Ayüfuimi quimal chumngechi quelluchequei ti llellipun? Ngüneduamnge ñi rupan ta Nehemías (Nehemías capitulo 2). Fei huiñoldungunge ti müleyechi ramtun mülelu ti troquiñ “Jehová allcütueyu tañi llellipun”, femngechi quimafuimi falinque dungu.

 Quiñe ngülam: Quiñepülecünunge fillque dungu tami catrütuafeteu, fei cüme papeltuaimi Biblia.

 Cüla, dullinge papeltual quiñe nütram cam quiñe salmo. Papeltufinge, fei raquiduamnge chumngechi quelluafeimu ñi feipin. Fentecünulmi tami papeltun, fei ramtuhuafuimi:

•    Jehová, ¿chumngelu eli ñi huirintucungeal tüfachi dungu Biblia meu?

•    Tañi papeltupeel, ¿chem quimeltueneu Jehová mu?

•    ¿Chumngechi inayafun tüfachi ngülam?

 Quiñe ngülam: Ti papel feipilelu Papeltuafimi Biblia (adcünu dungu) quelluafeimu tami cüme entual tami papeltun.