RIWIɄKWEYNA 01

Bibriaseʼ aʼnikwʉyari azi nari niwikaʼmʉkana kinki ʉwa no

A’CHUNɄNGWASI

Sʉmʉ anakwey nakʉn nugaygwi, nikamʉ ʉnkuʼgwawa, ɉwi ʉnkuʼgwawa nanʉn nugeʼri, sinamʉ igunámʉsʉkwa neykari awkin nanuʼ neyka ni. Ey awi, sinamʉ niweʼwicha ki awagwi ʉweʼri, tʉkin zanʉngwa neykari azi nanʉngwa ni kauʼ nʉnameʼ, puré meʼzari zweykwéy nisi zoya ni. Ey ʉweʼki, Bibria ʉnkʉriwía awaki nugeykari ey ʉwameʼ ey zʉnʉn aʼzari awiri eyméy zanʉngwa ni aʼzari kunsamʉ kaʼchona awaki nugeʼri, ingumʉ́n tanʉ aʼzari zeyzey aʼzari kwʉya ni. Ímari iʼngéygwiseʼ kaʼmʉkana awizáy meʼzano.

1. Bibriáseʼri inʉ sí wásʉya nanʉnno.

Bibriáseʼri eyméy nari akwakumʉngwa niʼna ni, ey ʉwameʼ ʉnkeʼ nánʉkwa kawa ni, ey ʉwameʼ ikʉ du neykari chʉwi aʼzari wicha ʉwa ni, ey ʉwámeʼri tanʉ zanamʉ kuʼ nari ingumʉ́n ʉnkapari azwein nuga ni, ey ʉwameʼ aɉwáy tari zoriri ʉnwíchʉkwa anichori zoya ni wásʉya ni. Bemaseʼ neki eyméy ʉwa ki nanʉnno winaʼzari winizatasi agʉnchona awaki nugáseʼri tanʉ winaʼzʉna ni.

2. Azi nisi Bibria niwikaʼmʉkana ʉwa no.

Bibriari amisinámʉsin zeyzey meʼzari kukwéy nariri nikámʉseʼ neki du niweʼzari zweykwéy nanʉngwasi kunsamʉ aʼmʉkanʉkwéy nanʉn nuga kʉnánʉya ni. Ingiti nʉriwí zoyaygwi Bibriaseʼ gaʼkʉnamʉ aʼnikwʉn nugari niwikaʼmʉkanʉkwéy na ni meʼzʉn awʉngwa ni (2 Timoteo 3:16).

Ema yʉkweyna Bibria nanuʼ nameʼ, eymʉnke eyméy wásʉya gugín migʉnchona awʉngwasi, Bibriaseʼ aʼnikwʉn nugari gugín izataka awkwa.

EMA SÍ INGUMɄ́N DU ɄNKɄRIWÍA AWɄNDI

Emáʼbari Bibriari iʼngéygwiseʼ kaʼmʉkana awaki nuga ni, Bibria aʼgwa awʉn niweʼɉuná awʉngwasi azi nikʉkwéy nanʉnno awiri iʼngéygwisin Bibria riwiʉkwari iari ingumʉ́n du nanʉnno sekʉnanʉn núkʉkwa nʉngwa ni.

3. Bibriari emí nari zoyamʉ kawa ni meʼzanʉkwasi aʼmʉkʉna ni

Bibriari iʼngwi joku bunsi aʼkísʉya zana neyka ni. Emi kwey zweykwaʼba inʉ du ʉnkitosi zweykwéy nʉngwasi awiri tʉkin pari emí zanʉngwa nanʉnno meʼzanʉkwéy nʉngwasi aʼmʉkana ʉwa ni.

Salmo 119:105seʼ aʼgwa unayu, ema sí rimasey awkwa:

Ema gaʼkʉnamʉ aʼsánari Bibria sí azi warúnhʉya nare.
Ma Bibria sí azi nʉwarúnhʉya no.

4. Bibriari gaʼkʉnamʉ niwigʉnchona awʉn niweʼɉúnʉya migʉnchonʉkwéy nanʉngwasi aʼmʉkana ʉwa ni

Iʼngwi aʼmía birin pari gaʼkʉnamʉ agʉnchona awʉn aʼɉúnʉya nʉnna Bibriaseʼ pari agʉnchona uyʉn. WIDEW chwa unayu, ema sí rimasey awkwa:

WIDEW: Tʉkin du zanʉngwa neyka ta naʼnó meʼzánʉkwa (1:48)

Widéwseʼri aʼmiari inʉ agʉnchona awʉn aʼɉuríe.
Bibria riwiʉkwari azi nari kaʼmʉkana uye.

Bibriáseʼri gaʼkʉnamʉ migʉnchona awʉn meʼɉúnʉya tákʉkwa niwikʉya ni. Mateo 7:7seʼ aʼgwa unayu, ema sí rimasey awkwa:

Bema gaʼkʉnamʉ migʉnchona awʉn meʼɉúnʉya neyka Bibriaseʼ nizataka awʉnno.

5. Bibria aʼgwa awʉn niweʼɉuná awʉngwasi azi nikʉkwéy nanʉnno

Sʉmʉ ikʉ Bibria aʼgwa awʉn aʼɉuná awiri aya sí ʉnkaʼmʉkanʉngwaʼsa awaki nuga ni. WIDEW chwa unayu, ema sí rimasey awkwa:

WIDEW: Bibria aʼgwákʉkwa neyka (2:05)

Abiti ɉina widewseʼ zánʉri aʼgwákʉkwa neykari iari winaguzanuʼ nanʉnno.
Ey ʉweʼki, iari Bibria aʼgwakʉkwari ey winaguzʉna nanʉnno.

Bibriari iwa awiri tʉkin pari du niweʼzanʉngwasi niweʼzawiʉya ni. Romanos 15:4seʼ aʼgwa unayu, ema sí rimasey awkwa:

Ema sí ingumʉ́n ʉnkʉriwía awʉn meʼɉuno.

6. Iʼngéygwisin Bibria ingumʉ́n du aʼnoʼkʉkwéy nariza ni

Manʉnkaʼ kingwi Bibria riwí kéywʉri, iʼngéygwisin riwiʉkwari ingumʉ́n du neyka ni kazʉn awaki nuga ni. Hechos 8:26-31seʼ aʼgwa unayu, ema sí rimasey awkwa:

Bibria aʼnoʼkʉkwéy nanʉngwásiri, azi nikʉkwéy nanʉnno. (Reʼníkwʉya 30 awiri 31seʼ eygwi aʼgwa awkwa).

Birin Etiopía zánʉri gaʼkʉnamʉ aʼnoʼkwʉngwásiri, igunámʉkuma awiza neyka kʉɉunayʉn. Íwari Bibria aʼnoʼkʉkwéy nanʉngwásiri, iʼngeygwi niwingunámʉsa awiza kʉɉúnʉya ni.

IʼNGWINÉ YEYKARI: «Bibriari bunachʉ zʉgaʼkʉnamʉ zʉʼn naʼkinó».

Ma azi nʉyʉnno.

INɄ SÍ ɄNKɄRIWIɄKWA NAWAO

Bibriari du meʼzari kukwéy nʉngwasi kunsamʉ kʉnʉna ni awiri gaʼkʉnamʉ migʉnchona awʉn meʼɉúnʉya ayeygwi eygwi kʉnariri, iwa awiri tʉkin pari du niweʼzanʉngwa neyka sí eygwi wásʉya ni.