Jisọs iluk me emen inyọn̄ kubọk ogwu osat sabum eniman ọmọ me inyọn̄ ijọn̄, ikakup kubọk ebilene. (Jọn 8:23) Ọmọ ore adasi inu Awaji orombe, mè itap ubọk me irọrọm otutuuk inu. Ọmọ gaalek ore ogwu Awaji osabe ubọk kan̄ irom, eya orọ, igbebe ibe egwen ọmọ “okpọkpọ gwun̄” Awaji. (Jọn 1:14) Awaji ikisa Jisọs itumu ikọ, eya orọ, egwenbe Jisọs “Ikọ.”—Fuk Urọk 8:22, 23, 30; Ebi Kọlọsi 1:15, 16.

Awaji iria gwun̄ kan̄ inu me inyọn̄ ijọn̄ sa me iraria ugwem kan̄ inan̄a me emen inyọn̄ itap me owot obaak enenwaan̄ ogwu Ju egwenbe Meri. Eya orọ, Jisọs ikakaan̄ ute eyi ebilene. (Luk 1:30-35) Jisọs inu me inyọn̄ ijọn̄ (1) inenijeen̄ atikọ ofolek Awaji, (2) inenijeen̄ ubọk ebekọt ikirọ nkeek Awaji ikerere me mgbọ oyọyọt, mè (3) isasa ugwem kan̄ ososo isa igwa ngwugwa “mkpenwene.”—Fuk Matiyu 20:28.

Mkpenwene ire inu geelek ekpebe isa ibọkọ ene ogwu ugwem kan̄ odabe isi mkpa. (Isisibi 21:29, 30) Mkpa mè ukan kpunu me lek inu Awaji okaan̄be me nkeek inyi ebilene. Kpa ubọk ke eji esa iriọọn̄ eyi? Awaji itumu inyi adasi enerieen̄, Adam, ibe ire irọ inu Baibul ogwenbe “ijo inu,” ke ọmọ mokwu. Eya orọ, moribe ke Adam ikarọ ijo inu, kpomokwu. (Ibebene 2:16, 17; 5:5) Igọọk me lek Baibul, mkpa itibi inan̄a me lek Adam “inin̄” linyọn̄. Eya orọ, Adam osa ijo itobo otutuuk owot iman kan̄ mè inu ikisan̄a isibi orere, mkpa. Eji  miweek mkpenwene isasa ibọkọ eji isan̄a me ubọk mkpa eyi eji ebọkọbe me irot me ubọk kè Adam.—Fuk Ebi Rom 5:12; 6:23.

Ekene obokọt igwa ngwugwa mkpenwene isa isan̄a eji isibi me ubọk mkpa ni? Eji isikwu, ikire mkpukpe ijo ibot kiji gaalek ke eji ekpe. Kpunu ene geege, ogwu ikasoge obokọt ikpe ijo eyi ebi ufi ife.—Fuk Okwa Itọn̄ 49:7-9.

Jisọs isoso ikup, ikakup kubọk kiji. Omọrọ, ikakwu bak lek ijo kan̄​—mije ikarọ ijo inu geege. Kpan̄asi ikeya, Jisọs ikwu inan̄a me lek ijo kiji. Ima eyi kpunube mbet ke Awaji ojeen̄ bọn ebilene sa me iraria gwun̄ kan̄ ibe inikwu mkpa me ibot kiji. Jisọs si ijeen̄ ima me lek kiji sa me isisiki ibot inyi ogwu Ute mè isa ugwem kan̄ ikpe me ijo kiji.—Fuk Jọn 3:16; Ebi Rom 5:18, 19.

Watch the video Why Did Jesus Die?

Jisọs igwa ebi orukan̄, ijomo ebi ikwukwu, mè inyan̄a ebi ene isibi me irek ufiak, me mgbọ ikupbe me inyọn̄ ijọn̄. Isa inu chi ijeen̄ inu iborọ me mgbọ okup me isi inyi bọn ebilene, ebi isisiki ibot. (Matiyu 15:30, 31; Jọn 5:28) Awaji ijomo Jisọs me mkpa mè inyi ọmọ ugwem eyi ekwukwu. (Pita Eyi Adasi 3:18) Jisọs ikup me agan̄ ubọk ulom Awaji ikikweek ikpọ mgbọ Awaji mobonyi ọmọ unye ibosa ikpulu otutuuk inyọn̄ ijọn̄. (Ebi Iburu 10:12, 13) Mgbọ keyi, Jisọs okikpulu kubọk ogwu ubọọn̄ me emen inyọn̄, ebi udun̄ kan̄ si mekilook ata etip ya me otutuuk linyọn̄.—Fuk Danien 7:13, 14; Matiyu 24:14.

Sọnja mgbọ, Jisọs mosa unye kan̄ kubọk ogwu ubọọn̄ isa itap uyaka me lek otutuuk ofara mè ebi ikitap ufialek cha. Otutuuk ebi ijejeen̄ ichechieek me lek kè Jisọs sa me isisiki ibot inyi ọmọ menwọọn̄ ugwem me Paradais me inyọn ijọn̄.—Fuk Okwa Itọn̄ 37:9-11.