Кӧп улус Агару Бичикти кем бичигени јарты јок дежет. Је кӧп учуралдарда Агару Бичикте оны бичиген улустыҥ аттары бичилип калган. Агару Бичиктиҥ кезик бӧлӱктери, темдектезе, мындый сӧстӧрдӧҥ башталат: «Неемияныҥ сӧстӧри», «Исаия кӧргӧн кӧрӱлте», «Иегованыҥ Иоильге айдылган сӧзи» (Неемия 1:1; Исаия 1:1; Иоиль 1:1).

 Агару Бичикти бичигендердиҥ кӧп сабазы олорго башкартуны Иегова, сок јаҥыс чындык Кудай, берген деп айдыжат. Анайып, Еврей Бичимелдерди бичиген судурчылар 300 кире катап: «Мынайып Иегова айдат» — деп бичигендер (Амос 1:3; Михей 2:3; Наум 1:12). Кезик учуралдарда Кудай бойыныҥ сӧзин ангелдер ажыра јетирген (Захария 1:7, 9).

 Агару Бичикти 1 600 јылдыҥ туркунына 40 кире эр кижи бичиген. Олордыҥ кезиктери бир канча библиялык бичиктер бичиген. Агару Бичикти 66 бичиктеҥ турган јаан эмес библиотека деп айдарга јараар. Ары Эски Кереес деп адалып турган Еврей Бичимелдердиҥ 39 бичиги ле Јаҥы Кереес деп адалып турган Христиан Грек Бичимелдердиҥ 27 бичиги кирет.