NÍ KASEMI 4
Mɛnɔ Ji Yesu Kristo?
1. Mɛni blɔ nɔ Yesu wami plɛ kɛ je sisi?
Mɛni suhi lɛ ha nɛ e yi ha nihi kaa a maa su Yesu he ɔ?—MATEO 11:29; MARKO 10:13-16.
Yesu be kaa adesahi, ejakaa e hi hiɔwe kaa bɔfo loko a ba fɔ lɛ ngɛ zugba a nɔ. (Yohane 8:23) Lɛ ji Mawu nibɔ níhi tsuo a kpɛti tɛte, nɛ e ye bua nɛ a bɔ níhi tsuo. Lɛ pɛ ji nɔ nɛ Yehowa bɔ tɛ̃ɛ, nɛ enɛ ɔ he je ɔ, e sa kaa a tsɛɔ lɛ ke Mawu “Bi kake” ɔ. (Yohane 1:14, NW) Akɛnɛ Yesu ji Mawu Munyu Nya Jelɔ he je ɔ, a tsɛɔ lɛ ke “Munyu ɔ.”—Kane Abɛ 8:22, 23, 30; Kolose Bi 1:15, 16.
2. Mɛni he je nɛ Yesu ba zugba a nɔ ngɛ?
Mawu tsɔ e Bi ɔ kɛ ba zugba a nɔ kɛ gu e wami nɛ e je kɛ wo Yuda no yomiyo ko nɛ a tsɛɛ lɛ Maria a fɔmi kotoku mi ɔ nɔ. Enɛ ɔ he ɔ, Yesu be adesa tsɛ ko. (Luka 1:30-35) Yesu ba zugba a nɔ (1) konɛ e ba tsɔɔ wɔ anɔkuale nɛ kɔɔ Mawu he, (2) konɛ e ba pee bɔ nɛ wa maa pee Mawu suɔmi nya ní ha ngɛ haomi mi po ɔ he nɔ hyɛmi nɔ́ kɛ ha wɔ, kɛ (3) konɛ e ngɔ e wami nɛ ye mluku ɔ kɛ ha kaa ‘kpɔmi nɔ́.’—Kane Mateo 20:28.
3. Mɛni he je nɛ wa hia kpɔmi nɔ?
Kpɔmi nɔ́ ji hiɔ nɛ a woɔ konɛ a kɛ kpɔ nɔ ko kɛ je gbenɔ mi. (2 Mose 21:29, 30) Gbenɔ kɛ bwɔmi piɛɛ we yi mi tomi nɛ Mawu kɛ bɔ adesa a he. Kɛ wa pee kɛɛ kɛ le? Mawu de Adam nɛ ji kekleekle nɔmlɔ ɔ kaa ke e pee nɔ́ nɛ Baiblo ɔ tsɛɔ ke “yayami” ɔ, e ma gbo. Lɔ ɔ he ɔ, kaa Adam pee we yayami ɔ, jinɛ e ko gbo we. (1 Mose 2:16, 17; 5:5) Baiblo ɔ tsɔɔ kaa, Adam nɔ gbenɔ gu kɛ “ba” je ɔ mi. Enɛ ɔ he ɔ, Adam ngɔ yayami kɛ e he hiɔwo nɛ ji gbenɔ kɛ sã e nina tsuo. Wa hia kpɔmi nɔ́ nɛ ma je wɔ kɛ je gbenɔ nɛ Adam kɛ sã wɔ ɔ mi.—Kane Roma Bi 5:12; 6:23.
Mɛnɔ ma nyɛ ma kpɔ wɔ kɛ je gbenɔ dɛ mi? Ke wa gbo ɔ, wa wo wɔ nitsɛmɛ pɛ wa he yayamihi a he hiɔ. Adesa nɛ yi mluku ko be nyɛe maa wo ni kpahi a he yayamihi a he hiɔ.—Kane La 49:7-9.
4. Mɛni he je nɛ Yesu gbo ngɛ?
Yesu ye mluku, e be kaa wɔ. E pee we yayami gblee, enɛ ɔ he ɔ, e hia we kaa e gbo ngɛ e he yayami he. Se, Yesu gbo ngɛ nihi a he yayamihi a he. Mawu je suɔmi agbo kpo kɛ ha adesahi kɛ gu e Bi ɔ nɛ e tsɔ nɛ e ba gbo kɛ ha wɔ ɔ nɔ. Yesu bu e Tsɛ ɔ tue nɛ e ngɔ e wami kɛ ha ngɛ wa he yayamihi a he nɛ e kɛ tsɔɔ kaa e suɔ wɔ.—Kane Yohane 3:16; Roma Bi 5:18, 19.
Hyɛ video nɛ ji Mɛni He Je Nɛ Yesu Gbo?
5. Mɛni Yesu ngɛ pee amlɔ nɛ ɔ?
Benɛ Yesu ngɛ zugba a nɔ ɔ, e tsa hiɔtsɛmɛ, e tle gbogboehi a si, nɛ e kpɔ nihi nɛ a ngɛ oslaa mi ɔ. E pee jã kɛ tsɔɔ níhi nɛ hwɔɔ se ɔ, e maa pee kɛ ha adesahi nɛ a peeɔ tue bumi ɔ. (Mateo 15:30, 31; Yohane 5:28) Ngɛ Yesu gbenɔ se ɔ, Mawu tle lɛ si kaa mumi mi nɔmlɔ. (1 Petro 3:18) Yesu mlɛ ngɛ Mawu hiɔ nɔ kɛ ya si benɛ Yehowa ha lɛ he wami kaa e ye zugba a tsuo nɔ Matsɛ. (Hebri Bi 10:12, 13) Amlɔ nɛ ɔ, Yesu ngɛ Matsɛ yee ngɛ hiɔwe, nɛ e kaseli ɔmɛ ngɛ sane kpakpa nɛ ɔ fiɛɛe ngɛ je ɔ mi tsuo.—Kane Daniel 7:13, 14; Mateo 24:14.
E be kɛe nɛ Yesu maa ngɔ he wami nɛ e ngɛ kaa Matsɛ ɔ kɛ tsu ní nɛ e kɛ ma kpata nihi nɛ a kɛ nɔ́ nami baa a hɛ mi, nɛ e ma ha nɔ́ nami tsuo se maa po. Nihi tsuo nɛ a heɔ Yesu yeɔ, nɛ a buɔ lɛ tue ɔ maa hi si ngɛ paradeiso zugba a nɔ.—Kane La 37:9-11.
