“Mawu ma tsu a hɛ mi vo nyu tsuo. Nɔ ko be gboe hu; nɔ ko be kɔmɔ yee hu; nɔ ko be ya foe hu, nɛ nɔ ko be nɔ́ nae hu.”​—Kpojemi 21:3, 4, Ngmami Klɔuklɔu ɔ.

E ma ha nɛ o ma ná nɔ mi mami kaa tsa pi Mawu nɛ e haa nɛ haomihi baa wa nɔ.​—Yakobo 1:13.

E ma ha nɛ o maa le kaa ke wa ngɛ nɔ́ nae ɔ, e dɔɔ Mawu, nɛ enɛ ɔ maa wo o bua.​—Zakaria 2:8.

E ma ha nɛ o ma ná hɛ kɛ nɔ fɔmi kaa nɔ́ nami tsuo se maa po.​—La 37:9-11.

Ee, ke e hí kulaa a, ngɛ yi mi tomi enyɔ a heje:

• Mawu sume nɔ́ nami kɛ dami sane nɛ a yi. Mo susu bɔnɛ Yehowa Mawu nu he ha benɛ a wa e webi nɛ a hi si blema a yi mi ɔ he nɛ o hyɛ. Baiblo ɔ tsɔɔ kaa akɛnɛ a ngɛ nɔ́ nae ngɛ “ni nɛmɛ nɛ haoɔ mɛ ɔ a dɛ mi” heje ɔ, e pee Yehowa mɔbɔ.—Manyadali 2:18, Ngmami Klɔuklɔu ɔ.

  Mawu ná we nihi nɛ a yeɔ ni kpahi awi ɔ a he bua jɔmi. Kaa nɔ hyɛmi nɔ́ ɔ, Baiblo ɔ tsɔɔ kaa Yehowa sume “nɔ nɛ pee we nɔ́ ko e muɔ si puemi” kulaa.​—Abɛ 6:16-19.

• Mawu susuɔ wa ti nɔ tsuaa nɔ he. Nɔ tsuaa nɔ le lɛ nitsɛ e ‘hiami níhi,’ nɛ Yehowa hu le wa hiami níhi!​—2 Kronika 6:29, 30.

  E be kɛe nɛ Yehowa maa gu e Matsɛ Yemi ɔ nɔ kɛ po nɔ́ nɛ nɔ tsuaa nɔ ngɛ nae ɔ se. (Mateo 6:9, 10) Amlɔ nɛ ɔ, e woɔ nihi nɛ a jeɔ a tsui mi nɛ a hlaa e se blɔ ɔ a bua.​—Bɔfo Ɔmɛ A Nítsumi 17:27; 2 Korintobi 1:3, 4.