KƐ HA NIHI NƐ A SƐ GBA SI HIMI MI
2: Kake Peemi Nɛ Hi Nyɛ Kpɛti
NƆ́ NƐ E TSƆƆ
Ke huno kɛ e yo blaa kɛ peeɔ níhi ɔ, a ngɛ kaa ɛloplee kudɔli enyɔ nɛ a peeɔ kake kɛ kudɔɔ ɛloplee. Ke nyagba ko te si po ɔ, a susumi ji, kɛ “wa” ma plɛ kɛ tsu he ní ha kɛɛ, se pi kɛ “ma” plɛ kɛ tsu he ní ha kɛɛ?
BAIBLO SISI TOMI MLAA: “Lɛɛ a pi ni enyɔ hu, mohu ɔ, he lo kake.”—Mateo 19:6.
“Gba si himi ɔ, pi nɔ kake ní tsumi. Ja huno ɔ kɛ yo ɔ pee kake loko a gba si himi ɔ maa ye manye.”—Christopher.
NƆ́ HE JE NƐ E HE HIA
Ke pɛ ba a, huno kɛ yo nɛ kake peemi be a kpɛti ɔ maa te si kɛ wo a sibi, mohu pe nɛ a ma tsu nyagba a he ní. Enɛ ɔ ma ha nɛ pɛ nyafii ma ba pee pɛ ngua.
“Kake peemi he hia ngɛ gba si himi mi. Ke i kɛ ye huno ɔ wa bla we kɛ pee níhi ɔ, jinɛ wa ko pee kaa nihi enyɔ nɛ a bla kɛ ngɛ tsu kake mi kɛkɛ, se pi nihi nɛ a sɛ gba si himi mi. Nihi enyɔ nɛ a ngɛ tsu kake mi se ke e biɔ nɛ a mwɔ yi mi kpɔ ko nɛ e he hia a, a juɛmi kɔ we.”—Alexandra.
NƆ́ NƐ O MA NYƐ MAA PEE
MOO KA O HE
Anɛ i naa sika nɛ i náa a kaa imi pɛ ye nɔ “ji lɛ tsuo” lo?
Loko ma nyɛ maa jɔɔ ye he saminya a, ja i je ye yo ɔ loo ye huno ɔ he lo?
Anɛ i hɛɛ ye he kɛ jeɔ ye yo ɔ loo ye huno ɔ weku li a he lo?
O KƐ O YO Ɔ LOO O HUNO Ɔ NƐ SUSU SANE BIMI NƐ ƆMƐ A HE
Mɛni níhi nɛ wa peeɔ kake kɛ tsuɔ a he ní ngɛ wa gba si himi ɔ mi?
Mɛni níhi nɛ wa pee we kake kɛ tsu a he ní?
Mɛni wa ma nyɛ maa pee konɛ waa pee kake kɛ tsu níhi a he ní?
GA WOMI
Ngɔɔ lɛ kaa o kɛ o yo ɔ loo o huno ɔ nyɛ ngɛ bɔɔlu fiae, nɛ nyɛ ngɛ team ekpaekpa mi. Mɛni nyɛ ma nyɛ maa pee konɛ nyɛ ni enyɔ ɔmɛ tsuo nyɛ ba je team kake mi?
Ko de ke, ‘Mɛni blɔ nɔ ma gu kɛ ye kunimi?’ mohu ɔ, ‘Mɛni blɔ nɔ wɔ ni enyɔ ɔmɛ tsuo wa maa gu kɛ ye kunimi?’
“Ko susu nɔ nɛ nɔ́ da loo nɔ nɛ nɔ́ dɛ he. Lɔ ɔ he hia we pi tue mi jɔmi kɛ kake peemi nɛ maa hi nyɛ gba si himi ɔ mi.”—Ethan.
BAIBLO SISI TOMI MLAA: ‘Nyɛ ko fo nyɛ nitsɛmɛ pɛ nyɛ nɔ́ mi, se mohu nyɛ fo ni kpahi hu a nɔ́ mi.’—Filipi Bi 2:3, 4.
