WA NYƐMIMƐ yihi etɛ komɛ hi si ngɛ Indonesia ngɛ zugba kpɔ ko nɛ nyu bɔle lɛ nɛ ji Sangir Besar Island ɔ nɔ. Jeha komɛ nɛ be ɔ, a tsu ní ngɛ wo ɔ nya. A le mɛ wawɛɛ ngɛ zugba kpɔ nɛ nyu bɔle lɛ ɔ nɔ kaa a kɛ fiɛɛmi ní tsumi ɔ fiɛ we kulaa, nɛ a yeɔ bua nihi konɛ a nu Baiblo ɔ sisi. Se a tsuɔ ní tsumi kpa ko hulɔ.

Kekleekle ɔ, a nyɛɛɔ nyu ɔ mi nɛ a hlaa tɛ nguanguahi nɛ ngɛ wo ɔ mi ɔ kɛ baa kpo. Tɛ nɛ ɔmɛ ekomɛ kle kaa bɔɔlu. Lɔ ɔ se ɔ, yi ɔmɛ hiɔ tso sɛ kpitikpitihi a nɔ nɛ a kɛ hama ywiaa tɛ ɔmɛ tsɔwitsɔwi. Tɛ ɔmɛ nɛ a ywiaa a sui kungwɔ hlui klemi po. Lɔ ɔ se ɔ, a ngɔɔ tɛ ɔmɛ kɛ woɔ goga mi nɛ a kɛ yaa we mi. Ke a ya su we mi ɔ, a ngɔɔ tɛ ɔmɛ kɛ woɔ kotoku nguahi a mi nɛ a kɛ woɔ lɔlehi a mi, nɛ a kɛ ya peeɔ lɔle blɔhi.

Yi nɛ ɔmɛ a kpɛti nɔ kake ji Hulda. E si fɔfɔɛ he je ɔ, e nyɛɔ nɛ e kɛ be babauu tsuɔ ní tsumi nɛ ɔ pe yi kpa amɛ. Behi fuu ɔ, e ngɔɔ sika nɛ e náa ngɛ ní tsumi nɛ ɔ mi ɔ kɛ tsuɔ e weku ɔ hiami níhi a he ní. Se amlɔ nɛ ɔ lɛɛ, e suɔ nɛ e to sika si nɛ e kɛ pee nɔ́ kpa ko. E suɔ nɛ e he tablɛti konɛ e nyɛ nɛ e gbla JW Library^® ɔ kɛ fɔ nɔ. Hulda le kaa video ɔmɛ kɛ ní kpahi nɛ ngɛ JW Library^® ɔ nɔ ɔ maa ye bua lɛ konɛ e he nɛ be ngɛ fiɛɛmi ní tsumi ɔ mi nɛ e nu Baiblo ɔ hu sisi saminya.

Daa mɔtu ɔ, Hulda ngɔɔ ngmlɛfia enyɔ kɛ ya ywiaa tɛ fuu nɛ ma nyɛ hyi lɔle nyafii ko. E tsu ní tsumi nɛ ɔ nyɔhiɔ kake kɛ fã. Nyagbenyagbe ɔ, e ná sika bɔ nɛ sa, nɛ e kɛ ya he tablɛti ɔ.

Hulda de ke: “E ngɛ mi kaa jamɛ a be ɔ, pɔ tɔɔ ye he wawɛɛ nɛ i plaa mohu lɛɛ, se benɛ i kɛ ye tablɛti ehe ɔ bɔni ní tsumi ɔ, ye hɛ je pɔtɔtɔɛ ɔ kɛ plaami nɛ i plaa a nɔ. I nyɛɔ nɛ i kɛ tablɛti ɔ dlaa ye he saminya kɛ ha fiɛɛmi ní tsumi ɔ kɛ Kristofohi a kpehi. Enɛ ɔ ha nɛ ye fiɛɛmi ní tsumi ɔ nu tso wawɛɛ.” Jehanɛ hu ɔ, e tsɔɔ kaa benɛ Covid-19 ɔ je sisi bɔɔ pɛ ɔ, e tablɛti ɔ ye bua lɛ wawɛɛ akɛnɛ wa fiɛɛɔ nɛ wa peeɔ asafo mi kpehi kɛ guɔ fon kɛ zoom nɔ ɔ he je. Wa bua jɔ wawɛɛ kaa Hulda nyɛ nɛ e su oti nɛ e kɛ ma e hɛ mi ɔ he.