Baiblo ɔ kaleɔ Harmagedon kaa e ji ta nɛ maa ya nɔ ngɛ je kɛ wɛ ngɛ adesahi a nɔ yemihi tsuo kɛ Mawu a kpɛti, se pi ta nɛ maa ya nɔ ngɛ he ko pɔtɛɛ ngɛ zugba a nɔ.

•   “A ji mumi mi munyuhi nɛ je daimoniohi a ngɔ . . . a jeɔ kpo kɛ yaa matsɛmɛ ɔmɛ nɛ a ngɛ zugba a nɔ hehi tsuo nɛ nimli ngɛ ɔmɛ a ngɔ, konɛ a ya bua a nya kɛ ya Mawu Ope ɔ ligbi ngua a nɔ ta a. . . . A bua a nya kɛ ya he nɛ a tsɛɔ ngɛ Hebri gbi mi ke Harmagedon ɔ.”​—Kpo Jemi 16:14, 16.

 A je munyungu nɛ ji “Harmagedon” ɔ kɛ je Hebri munyungu nɛ ji Har Meghid·dohnʹ ɔ mi, nɛ e sisi ji “Megido Yoku.” Megido ji ma nɛ hi blema Israel. Enɛ ɔ he ɔ, ni komɛ susu kaa, a maa hwu Harmagedon ta a ngɛ Israel. Se, he ko be Megido kpokpa a nɔ aloo Middle East nɛ lejɛ ɔ klemi ɔ maa kpe “matsɛmɛ ɔmɛ nɛ a ngɛ zugba a nɔ hehi tsuo nɛ nimli ngɛ ɔmɛ” kɛ a ta buli ɔmɛ.

 A ngma Kpo Jemi womi ɔ ngɛ “okadihi a mi” aloo ngɛ okadi peemi munyu mi. (Kpo Jemi 1:1) Harmagedon tsɔɔ we he ko pɔtɛɛ, mohu ɔ, e ji si fɔfɔɛ nɛ maa ba ngɛ je kɛ wɛ nɛ́ je ma amɛ tsuo maa pee kake kɛ te si kɛ wo Mawu nɔ yemi ɔ, nɛ enɛ ɔ maa pee a nyagbe.​—Kpo Jemi 19:11-16, 19-21.