Yesu afɔle sami ɔ ji blɔ nya nɛ Mawu to nɛ e kɛ ma je adesahi kɛ je yayami kɛ gbenɔ mi. Baiblo ɔ tu Yesu muɔ ɔ he munyu kaa e ji hiɔ nɛ a woɔ kɛ kpɔɔ nɔ. (Efeso Bi 1:7; 1 Petro 1:18, 19) Yesu de ke e ba konɛ ‘e ngɔ e wami ngɔ ha kaa kpɔmi nɔ́ kɛ ha nihi babauu.’​—Mateo 20:28.

Mɛni he je nɛ ‘kpɔmi nɔ́ kɛ ha nihi babauu’ he hia a?

 A bɔ kekleekle nyumu nɛ ji Adam kaa nɔ ko nɛ e ye mluku nɛ yayami be e he. Jinɛ e ma nyɛ maa hi si kɛ ya neneene, se jamɛ a he blɔ ɔ bɔ lɛ ejakaa e je blɔ nɛ e gbo Mawu tue. (1 Mose 3:17-19) Adam tɔ̃ loko e fɔ, lɔ ɔ he ɔ, e ngɔ yayami kɛ sã e sisi bimɛ tsuo. (Roma Bi 5:12) Enɛ ɔ he ɔ, Baiblo ɔ tsɔɔ kaa Adam ‘jua’ lɛ nitsɛ kɛ e bimɛ tsuo kɛ wo yayami kɛ gbenɔ nyɔguɛ yemi mi. (Roma Bi 7:14) Akɛnɛ mɛ tsuo a yi mluku he je ɔ, a ti nɔ ko be nyɛe maa wo nɔ́ nɛ bɔ Adam ɔ he hiɔ.​—La 49:7, 8.

 Mawu je suɔmi kɛ mi mi jɔmi kpo kɛ tsɔɔ Adam sisi bimɛ, ejakaa a be nyɛe maa pee si fɔfɔɛ nɛ a ngɛ mi ɔ he nɔ́ ko. (Yohane 3:16) Se akɛnɛ Mawu yeɔ dami sane he je ɔ, e be nyɛe ma ma e hɛ ngɔ fɔ a tɔmi ɔmɛ a nɔ kɛkɛ, mohu ɔ, e sa nɛ e na nɔ́ ko nɛ e maa da nɔ kɛ ngɔ a he yayami ɔmɛ kɛ pa. (La 89:14; Roma Bi 3:23-26) Mawu suɔ adesahi wawɛɛ, lɔ ɔ he ɔ, e to blɔ nya nɛ e maa gu nɔ kɛ je adesahi a he yayami ɔmɛ kɛ je. (Roma Bi 5:6-8) Kpɔmi nɔ́ ɔ ji blɔ nya nɛ Mawu to nɛ e kɛ ma je wa he yayami ɔmɛ kɛ je.

Kɛ kpɔmi nɔ́ ɔ tsuɔ ní ha kɛɛ?

 Munyu nɛ ji “kpɔmi nɔ́” nɛ a kɛ tsu ní ngɛ Baiblo ɔ mi ɔ hɛɛ sisi numi etɛ:

1.   A kɛ woɔ nɔ́ ko he hiɔ.​—4 Mose 3:46, 47.

2.   A kɛ haa nɛ nɔ ko yeɔ e he loo a kɛ kpɔɔ nɔ.​—2 Mose 21:30.

3.   E ji hiɔ nɛ a woɔ ngɛ nɔ́ ko he nɛ́ e kɛ nɔ́ ɔ jua sɔ pɛpɛɛpɛ loo nɔ́ ko nɛ a kɛ toɔ nɔ́ ko nane mi. *

 Ha nɛ wa susu bɔ nɛ sisi numi nɛ ɔmɛ kɔɔ Yesu Kristo kpɔmi afɔle sami ɔ he ha.

1.   Hiɔ womi. Baiblo ɔ tsɔɔ kaa a he Kristofohi kɛ “jua wawɛ.” (1 Korinto Bi 6:20; 7:23) Jamɛ a jua a ji Yesu muɔ ɔ nɛ e kɛ “he adesahi tsuo, wɛtsohi, gbihi, mahi, kɛ je mahi kɛ ha Mawu.”​—Kpojemi 5:8, 9.

2.   He yemi. Yesu afɔle sami ɔ ha nɛ a gu kpɔmi nɔ́ ɔ nɔ kɛ ha nɛ “wa ye wa he” kɛ je yayami mi.​—1 Korinto Bi 1:30; Kolose Bi 1:14; Hebri Bi 9:15.

3.   E kɛ nɔ́ ɔ jua sɔ pɛpɛɛpɛ. Yesu afɔle sami ɔ kɛ nɔ́ nɛ bɔ Adam ɔ sɔ pɛpɛɛpɛ​—lɔ ɔ ji adesa wami nɛ ye mluku. (1 Korinto Bi 15:21, 22, 45, 46) Baiblo ɔ de ke: “Kaa bɔ nɛ nihi babauu ba pee yayami peeli ngɛ nɔ kake [Adam] tue gbomi he ɔ, jã kɛ̃ Yesu Kristo nɔ kake e tue nɛ e bu ɔ he ɔ, Mawu maa bu nihi tsuo dali.” (Roma Bi 5:19) Enɛ ɔ lɛ tsɔɔ nɔ́ he je nɛ nɔ kake gbenɔ ma nyɛ maa pee kpɔmi nɔ́ kɛ ha yayami peeli babauu ɔ nɛ. Ngɛ anɔkuale mi ɔ, Yesu afɔle sami ɔ ji “kpɔmi nɔ́ nɛ sa pɛpɛɛpɛ kɛ ha nimli slɔɔtohi tsuo” nɛ a suɔ nɛ a ná he se.​—1 Timoteo 2:5, 6, NW.