Yecu Onongo Nen Nining?
Lagam ma Baibul miyo
Pe tye ngat mo ma ngeyo kit ma Yecu onongo nen kwede kikome, pien Baibul pe tito kit ma en onongo nen kwede. Man nyuto ni kit ma Yecu onongo nen kwede ki woko pire pe tek. Ento, Baibul tito jami mogo ma weko olo waromo ngeyo kit ma Yecu onongo nen kwede.
Kit ma en onongo nen kwede: Yecu onongo tye Lajudaya dok twero bedo ni en onongo nen calo minne. (Jo Ibru 7:14) Nen calo en onongo pe nen pat tutwal ki jo mukene. Nino mo acel, en owoto i wi mung me a ki Galilaya me cito i Jerucalem ma ngati mo keken pe oniang i kome. (Jon 7:10, 11) Ki bene, kadi wa i kare ma Yecu onongo tye i kin lulub kore macok loyo, poko en ki gin onongo pe yot. Wi opo ni onongo mitte ni Juda Lakeriot onyut Yecu bot jo ma onongo gubino ka make.—Matayo 26:47-49.
Yer wiye: Yecu pe obedo ki yer wic maboco pien Baibul waco ni ‘yer wic maboco kwanyo deyo ki i kom laco.’—1 Jo Korint 11:14.
Yer tike: Yecu onongo tye ki yer tike. En onongo lubo cik pa Lujudaya ma onongo pe ye ni co ‘gulyel teng yer tikgi.’ (Lulevi 19:27; Jo Galatia 4:4) Ki bene, Baibul loko i kom yer tik Yecu i lok pa lanebi mo madok i kom can ma en onongo bideno.—Icaya 50:6.
Kome: Ngene kene ni Yecu onongo dano ma kome tek. I ticce me pwony, en onongo woto mairo mapol. (Matayo 9:35) En olonyo Ot pa Lubanga kiryo, oreto meja pa lulok cente, dok bene oryemo lee kun tiyo ki tol anino. (Luka 19:45, 46; Jon 2:14, 15) Buk mo me kwedo lok ma kilwongo ni McClintock and Strong’s Cyclopedia wacci: “Lok ducu ma kicoyo i jiri nyuto ni Yecu onongo kome yot dok tek.”—Volume IV, pot karatac 884.
Kit ma wange onongo nen kwede: Yecu onongo dano ma lakica dok nyuto cwiny me lirem. Labongo akalakala mo, wange onongo nyuto meno ka maleng. (Matayo 11:28, 29) Dano mapat pat onongo giyenye pi nongo kwecwiny ki kony. (Luka 5:12, 13; 7:37, 38) Kadi wa lutino onongo giwinyo agonya ka gitye ka ngete.—Matayo 19:13-15; Marako 9:35-37.
Tam mogo ma pe tye kakare madok i kom kit ma Yecu onongo nen kwede
Tam ma pe tye kakare: Jo mogo giwacci Yecu onongo a ki i lobo Afrika pien buk me Niyabo poro yer wiye ki yer romo dok poro tyene ki ‘mola ma kijwayo maleng.’—Niyabo 1:14, 15.
Lok ada: Buk me Niyabo kicoyo kun kitiyo ki ‘lanyut.’ (Niyabo 1:1) Kitiyo ki lanyut madok i kom yer wi Yecu ki tyene me tittiwa kit mogo pa Yecu i nge cerre, ento pe me tittiwa kit ma Yecu onongo nen kwede i kare ma tye i lobo. Niyabo 1:14 wacci Yecu “yer wiye onongo tar calo yer romo matar, tar calo pee.” Tyeng man tye ka tic ki kala macalo lapor, ento pe tye ka lok i kom kabedo ma Yecu onongo a ki iye. Yer wiye matar-ri nyuto ryekone ma obino pi mwakane madit. (Niyabo 3:14) Tyeng man pe tye ka wacci yer wi Yecu obedo yom calo yer romo, dok bene pe tye ka wacci yer wiye obedo yom calo pee.
Tyen Yecu “onongo [tye] calo mola ma giliyo i keno.” (Niyabo 1:15) Ki bene, wange onongo “tye ka ryeny calo ceng ma ryeny matek.” (Niyabo 1:16) Kit macalo pe tye rok mo ma tye ki kala del kom ma rwatte ki kit ma kitito kwede i tyeng magi, ginanyuta man tye ka lok i kom Yecu ma dong kicero woko “ma bedo i lengo mo ma ngat mo pe romo nyiko cok kwede.”—1 Temceo 6:16.
Tam ma pe tye kakare: Yecu onongo dano magoro.
Lok ada: Yecu obedo laco ma cwinye tek. Me labolle, en otito ki tekcwiny nga ma ebedo i kare ma lwak ma gutingo jami lweny gubino ka make. (Jon 18:4-8) Yecu onongo kome tek pien en otiyo macalo lapa bao kun tiyo ki jami tic ma mito gupu.—Marako 6:3.
Ka tye kumeno, ci pingo en onongo mito kony me tingo yat ma kigure iye-ni? Dok pingo en oto ma peya jo ma kineke kacel kwede guto? (Luka 23:26; Jon 19:31-33) Ma peya kineko Yecu, kome onongo odoko goro adada. En pe onino dyewor lung, pien cwinye bene onongo tye ka cwer. (Luka 22:42-44) I dyewor meno, Lujudaya onongo gutere marac, dok orwone i odiko, Luroma onongo guune. (Matayo 26:67, 68; Jon 19:1-3) Nen calo pi tyen lok magi, en oto oyot.
Tam ma pe tye kakare: Yecu onongo kare ducu bedo ma cwinye pe yom.
Lok ada: Yecu onongo nyuto kit Wonne me polo, Jehovah, ma Baibul lwongo ni “Lubanga ma cwinye yom.” (1 Temceo 1:11, NWT; Jon 14:9) Ki lok ada, Yecu opwonyo jo mukene kit me bedo ki yomcwiny. (Matayo 5:3-9; Luka 11:28) Lok ada magi nyuto ni Yecu onongo pol kare nyuto yomcwiny i wange.
Itwero Bedo ki Miti i kom Lok Man
LAPENY MA KIGAMO ME BAIBUL
Tika Ada Baibul Tito Gin Mutimme i Kwo pa Yecu?
Nen kong lok mogo madok i kom Jiri ki dong buk adola macon loyo ma kinongo.
PWONY MA PIGI TEGO ME BAIBUL
Wangeyo Nining ni Lok me Baibul Tye Kakare?
Ka Baibul obedo lok pa Lubanga, ci myero obed pat adada ki buk mo keken ma kicoyo.
LOK MADOK I KOMWA
Peny Wek Kilimi
Nyam lapeny mo me Baibul, nyo pwony lok mapol madok i kom Lucaden pa Jehovah.