I Baibul, lok ma gonye ni “nicer-ni” a ki i nyig lok me leb Grik a·naʹsta·sis, ma tyen lokke ni “a malo” nyo “cung malo odoco.” Dano ma kicero a malo ki i to ci dok cen i kwo kit ma en onongo tye kwede ma peya oto.—1 Jo Korint 15:12, 13.

 Kadi bed ni lok man ni “nicer-ni” pe tye i Ginacoya me leb Ibru, ma pol kare kilwongo ni Cik Macon, ento pwonye bene nonge iye. Me labolle, Lubanga ocikke kun tiyo ki lanebi Kocea, ni: ‘Abilarogi ki i twer me Lyel; Abikokogi woko ki i dog to.’—Kocea 13:14; Yubu 14:13-15; Icaya 26:19; Daniel 12:2, 13.

 Jo ma kibicerogi gibibedo kwene? Jo mukene kibicerogi me kwo i polo me loc kacel ki Kricito macalo luker. (2 Jo Korint 5:1; Niyabo 5:9, 10) Baibul lwongo man ni ‘cer mukwongo.’ Lok man nyuto ni nicer mukene dok bitimme i ngeye. (Niyabo 20:6; Jo Pilipi 3:11) Nicer man ma bitimme lacen-ni bibedo me kwo i lobo, dok pol pa dano ma kibicerogi gibinongo mit pa kwo i lobo kany.—Jabuli 37:29.

 Dano kibicerogi nining? Lubanga omiyo ki Yecu twero me cero jo muto. (Jon 11:25) Yecu bicero “jo ducu ma tye i lyel,” ma nongo ngat acel acel tye ki kite macon-ni dok wiye po i kom kwone ma peya oto. (Jon 5:28, 29) Jo ma kibicerogi me kwo i polo gibinongo kom me cwiny, ento jo ma kibicerogi me kwo i lobo kany gibinongo kom pa dano, ma roc mo pe iye dok gibibedo ma komgi yot.—Icaya 33:24; 35:5, 6; 1 Jo Korint 15:42-44, 50.

 Angagi ma kibicerogi? Baibul wacci “dano gibicer woko, jo ma kitgi atir wa ki jo ma kitgi pe atir.” (Tic pa Lukwena 24:15) I kin jo ma kitgi atir tye iye jo ma lugen calo Nua, Cara, ki Abraim. (Acakki 6:9; Jo Ibru 11:11; Yakobo 2:21) Jo ma kitgi pe atir gubedo jo ma pe gulubo cik pa Lubanga pien pe gubedo ki kare me pwonyone.

 Ento, jo ma kitgi odoko rac adada ma dong pe gitwero lokke pe kibicerogi. Ka jo ma kit magi guto, pe dong gitye ki gen mo me dwogo cen i kwo.—Matayo 23:33; Jo Ibru 10:26, 27.

 Nicer bitimme awene? Baibul otito ni nicer pa jo ma gicito i polo bitimme i kare me loc pa Kricito, ma ocakke i mwaka 1914. (1 Jo Korint 15:21-23) Nicer pa jo ma gibikwo i lobo bitimme i kare me Mwaka Alip Acel me Loc pa Yecu Kricito, ma lobo kibilokone doko paradic.—Luka 23:43; Niyabo 20:6, 12, 13.

 Pingo porre me ye ni nicer bitimme? Baibul miyo ngec matut i kom nicer pa dano abongwen dok lucaden mapol gumoko nicer magi ki acel acel. (1 Luker 17:17-24; 2 Luker 4:32-37; 13:20, 21; Luka 7:11-17; 8:40-56; Jon 11:38-44; Tic pa Lukwena 9:36-42; Tic pa Lukwena 20:7-12; 1 Jo Korint 15:3-6) Nicer acel ma pire tek obedo pa Lajaro, pien Lajaro onongo dong oto pi nino angwen dok Yecu otimo tango man i nyim lwak dano mapol. (Jon 11:39, 42) Kadi wa jo ma onongo gidag Yecu onongo pe gitwero kwero gin man mutimme-ni, pi meno guketo yub me neko Yecu kacel ki Lajaro.—Jon 11:47, 53; 12:9-11.

 Baibul nyuto ni Lubanga tye ki twero kacel ki miti me cero jo muto. En wiye po i kom jami ducu madok i kom ngat acel acel ma en bicero kun tiyo ki twerone ma lapore pe-ni. (Yubu 37:23; Matayo 10:30; Luka 20:37, 38) Lubanga tye ki kero me cero jo muto, dok en mito! Ma lubbe ki nicer ma bitimme i anyim, Yubu owaco bot Lubanga ni: “Pira bibedo mitti mada.”—Yubu 14:15.

Tam mogo ma pe tye kakare madok i kom nicer

 Tam ma pe tye kakare: Nicer obedo ribo kin tipo ki kom.

 Lok ada: Baibul pwonyo ni pe watye ki tipo mo ma bwot ki i komwa ka wato. (Acakki 2:7; Ejekiel 18:4) Dano ma kicero pe dok kiribo kome ki tipone; ento kicweye odoco macalo ngat makwo.

 Tam ma pe tye kakare: Jo mogo kibicerogi ci i ngeye kityekogi woko cutcut.

 Lok ada: Baibul wacci “jo ma ceng gutimo marac” bidonyo i “cer me ngolo kop.” (Jon 5:29) Ento, kibingolo kop i wigi ma lubbe ki gin ma gibitimo i nge cergi, ento pe ma lubbe ki gin ma gutimo ma peya guto. Yecu owaco ni: ‘Jo muto biwinyo dwan Wod pa Lubanga; jo ma gibibedo luwiny bikwo.’ (Jon 5:25) Jo ma ‘gibibedo luwiny’ nyo ma gibilubo jami ma gupwonyo i nge cergi kibicoyo nyinggi i “buk me kwo.”—Niyabo 20:12, 13.

 Tam ma pe tye kakare: Ka kicero ngat moni, en bedo ki kom acel ma obedo kwede ma peya oto.

 Lok ada: I nge to, kom dano top ci dok i apwa.—Latitlok 3:19, 20.