Baibul waco ni opore, dok mitte ni imarre kekeni i yo mupore. Mar man weko igwoko komi maber, iwore kekeni, dok inenne keni calo ngat ma pire tek. (Matayo 10:31) Ento me ka cwako cwiny me woro, Baibul nyuto ni omyero wabed ki neno mupore ma lubbe ki kit ma wamarre kwede kekenwa.

Anga ma myero wamar mukwongo?

1.   Marwa pi Lubanga myero obed mukwongo. Baibul waco ni cik ma pire tek loyo ducu aye: ‘Mar Jehovah Lubangani ki cwinyi ducu.’​—Marako 12:28-30; Nwoyo Cik 6:5.

2.   Cik ma pire tek me aryo aye: “Mar lawoti macalo imarre keni.”​—Marako 12:31; Lulevi 19:18.

3.   Kadi bed Baibul pe waco atiratir ni omyero imare kekeni, ento cik ni ‘mar lawoti macalo imarre keni’ nyuto ni opore dok mitte ni imarre kekeni dok ibed ki woro i komi kekeni i yo mupore.

Anga ma onongo Yecu maro mukwongo?

 Yecu onyuto kit ma myero wabed kwede ki mar pi Lubanga, pi luwotwa ki dong i komwa kekenwa, dok ociko lupwonnyene me lubo lanenne.​—Jon 13:34, 35.

1.   En onongo maro Lubanga Jehovah mukwongo, dok omiyo kwone me tic pi Lubanga. En owaco ni, ‘Wek lobo onge ni an amaro Won, atiyo macalo Won ocika.’​—Jon 14:31.

2.   Yecu onongo maro dano dok paro pigi kadi wa i kare ma mitte ni en omi kwone pigi.​—Matayo 20:28.

3.   En bene onongo marre kekene i yo mupore kun kwanyo kare me yweyo, cam ki dong bedo kacel ki lulub kore kacel ki jo ma onongo gibidoko lulub kore.​—Marako 6:31, 32; Luka 5:29; Jon 2:1, 2; 12:2.

Tika ibirwenyo yomcwinyi kacel ki woro ma itye kwede i komi kekeni ka imaro jo mukene makato kit ma imarre kwede keni?

 Ku, pien kicweyowa i cal pa Lubanga ma kite ma pire tek loyo aye mar labongo cwiny mo keken me woro. (Acakki 1:27; 1 Jon 4:8) Man nyuto ni kicweyowa me nyuto mar bot jo mukene. Myero wamarre kekenwa i yo mupore, ento wanongo yomcwiny ma loyo ka wamaro Lubanga makato ngat mo keken, ki dok ka waketo cwinywa me timo jami mabeco pi jo mukene. Kit ma Baibul waco kwede ni, “miyo mot kelo gum [yomcwiny] makato gamo agama.”​—Tic pa Lukwena 20:35.

 I kare-ni, jo mapol giwaco ni wanongo yomcwiny ka waketo pi mitiwa mukwongo. Ki botgi, cik ma waco ni “imarre keni” dok oleyo ka wang cik ma waco ni “mar lawoti.” Kadi bed kumeno, jami ma otimme i kwo ma pa jo mapol i kare-ni bene moko ni wabedo ki yotkom dok wanongo yomcwiny ma loyo ka walubo tira me Baibul ni: “Dano pe olub gin ma konyo en keken, ento myero olub gin ma konyo lawote bene.”​—1 Jo Korint 10:24.