Tye, Baibul miyo ngec mapol ma moko ni Lubanga tye. Dok cuko cwinywa pe me ye pwony me dini latowang ento me bedo ki “wang mabit” ki dok me tic ki kerowa me “niang” wek wadong niyewa i kom Lubanga. (1 Jo Tecalonika 5:21; 1 Jon 5:20) Nen kong kit ma Baibul konyowa kwede me moko ka ce Lubanga tye ada:

•   Jami ma i dan polo, lobo kacel ki jami ma tye iye nyuto ni Lacwec tye. Baibul waco ni: “Ot mo keken dano aye ma gero, ento ngat ma gero jami ducu en aye Lubanga.” (Jo Ibru 3:4) Kadi bed lapor man niang iye yot, ento konyo kadi wa jo ma gukwano i rwom me lamal me niang ni Lubanga tye. a

•   Macalo dano, watye ki miti me niang tyen lok me kwo ki pingo watye kwo, miti man pe a ki i cwinywa kadi bed wanongo jami me kom ma mitte ducu. Man aye gin ma Baibul lwongo ni ‘mitiwa i yo me cwiny,’ man kwako mitiwa me ngeyo ki woro Lubanga. (Matayo 5:3; Niyabo 4:11) Mitiwa man pe nyuto ni Lubanga tye keken ento bene nyuto ni en Lacwec ma lamar dok mito ni wacob miti meno.​—Matayo 4:4.

•   Lok pa lunebi me Baibul ma kicoyogi mwaki miya mapol ata gucobbe kit ma kitito kwede kikome. Kit ma lok magi gucobbe kwede kakare nyuto ni gua ki bot ngat mo ma ngecce lamal kato pa dano woko.​—2 Petero 1:21.

•   Jo ma gucoyo Baibul onongo gitye ki ngec me cayan ma kato pa jo ma gukwo i karegi-ni. Me labolle, i kare macon, jo mapol onongo giwaco ni lobo ocung i wi lee mo calo lyec, opego nyo dyang. Tam man dok pat ki gin ma Baibul waco ni “Lubanga pe ongabo lobo i kom gin mo.” (Yubu 26:7) Dok Baibul bene tito ka maleng ni lobo “olunge alunga,” nyo ni tye calo “lawala.” (Icaya 40:22, coc ma tye piny i Baibul me Douay Version) Jo mapol giwaco ni ngec matir ma Baibul miniwa-ni nyuto ka maleng ni jo ma gucoyo Baibul ada gunongo ngec magi ki bot Lubanga.

•   Baibul miyo lagam pi lapeny mogo ma pigi tego adada, dok ka ngat moni pe onongo lagam pi lapeny magi ci en twero cako bedo ki tam ni Lubanga pe. Me labolle: Ka ada Lubanga lamar dok won twer ducu, ci pingo pekki ki tim maraco onya mapol i lobo? Pingo dini pol kare cwako kor tim maraco me ka kelo jami mabeco?​—Tito 1:16.