Tika Lubanga Tye ka Weng?
Lagam ma Baibul miyo
Lubanga twero neno ki timo gin mo keken ka ma en oyero. (Carolok 15:3; Jo Ibru 4:13) Kadi bed kumeno, Baibul pe waco ni Lubanga tye ka weng, nyo i jami ducu. Me ka meno, Baibul pwonyo ni Lubanga tye ki kabedo ma mege.
Kit ma Lubanga tye kwede: Lubanga en cwiny. (Jon 4:24) Dano pe twero nenne. (Jon 1:18) Ginanyuta ma kicoyogi i Baibul i kom Lubanga nyuto ni en tye ki kabedo ma kite dok pat. Ento pe nyuto ni Lubanga bedo ka ducu.—Icaya 6:1, 2; Niyabo 4:2, 3, 8.
Kabedo pa Lubanga: Lubanga bedo i kabedo me cwiny, dok pat ki ka ma cwec ma nen gibedo iye. Ki i kabedo me cwiny meno ma tye i polo-ni, Lubanga tye ki ‘ka ma En bedo iye kikome.’ (1 Luker 8:30) Baibul waco ni i kare mo lumalaika “gubino gucung i nyim Rwot [Jehovah],” a man nyuto ni, Lubanga tye ki kabedo ma mege i polo.—Yubu 1:6.
Ka Lubanga pe bedo ka ducu, ci tika en paro pira?
Ada, Lubanga paro pi wan ducu ki acel acel. Kadi bed ni Lubanga bedo i polo, en neno jo ma tye i lobo ma gimito yomo cwinye, dok en konyogi. (1 Luker 8:39; 2 Tekwaro 16:9) Nen kong kit ma Jehovah nyuto kwede ni eparo pi jo ma wore ki cwiny matir:
Ka ilego bote: Jehovah winyo legani i cawa ma ilego iye kikome.—2 Tekwaro 18:31.
Ka cwinyi otur: “Rwot tye cok ki jo ma cwinygi goro, en laro jo ma gitye ki arem madwong i cwinygi.”—Jabuli 34:18.
Ka imito tira: Jehovah ‘bipwonyi dok bicimmi yo ma myero ilubi’ kun tiyo ki Lokke Baibul.—Jabuli 32:8.
Tam ma pe tye atir ma jo ma giwaco ni Lubanga bedo ka ducu gitye kwede
Tam ma pe tye atir ni: Lubanga bedo ka ducu i cwecce.
Lok ada: Lubanga pe bedo ka mo keken i lobo nyo i cwecce. (1 Luker 8:27) Tye lok ada ni lakalatwe ki dong cwec mukene-ni “ginyuto deyo pa Lubanga.” (Jabuli 19:1) Kadi bed kumeno, Lubanga pe twero bedo i jami ma en ocweyo kit macalo lago cal pe twero bedo i cal ma en ogoyo. Cal twero titiwa jami mapol i kom ngat ma ogoyo. I yo acel-lu, jami ma nen ma tye i lobo-ni weko wangeyo “kit pa Lubanga ma onongo pe nen,” me labolle, tekone, ryekone, ki dong marre.—Jo Roma 1:20.
Tam ma pe tye atir ni: Wek Lubanga onge jami ducu dok obed tek loyo ducu, myero en obed ka weng.
Lok ada: Cwiny maleng obedo teko ma Lubanga tiyo kwede. Cwiny maleng weko Lubanga ngeyo dok timo gin mo keken, ka mo keken, ki dong i cawa mo keken, ma pe mitte ni en ocit kunnu en kikome.—Jabuli 139:7.
Tam ma pe tye atir ni: Jabuli 139:8 bene cwako pwony man ni Lubanga tye ka ducu, pien waco ni: “Kadi ka ait malo i polo, in bene itye kunnu! Kadi ka abuto piny i lyel, in pud itye kunnu aye.”
Lok ada: Wang Baibul man pe tye ka lok i kom ka ma Lubanga bedo iye. Me ka meno, pwonyo ni pe tye ka mo mabor tutwal ma gengo Lubanga ki konyowa.
a Jehovah aye nying Lubanga kit ma kinyuto kwede i Baibul.