Tika Ker pa Lubanga Tye i Cwinyi?
Lagam ma Baibul miyo
Ku, Ker pa Lubanga pe obedo mere gin mo ma tye i cwiny Lukricitayo. a Baibul tito kakare kikome kun lwongo ni “ker me polo.” (Matayo 4:17) Nen kong kit ma Baibul nyuto kwede ni Ker pa Lubanga obedo gamente kikome ma tye ka loc ki i polo.
Ker pa Lubanga tye ki luloc, jo ma i te locce, cik, ki dong tic me cobo miti pa Lubanga i polo ki dong lobo.—Matayo 6:10; Niyabo 5:10.
Gamente nyo Ker pa Lubanga biloyo “lwak me rok ducu ki rok ducu, ki jo ma loko leb mapatpat-gu ducu” ma i lobo. (Daniel 7:13, 14) Twero me locce pe a ki bot jo ma i te locce, ento a ki bot Lubanga kikome.—Jabuli 2:4-6; Icaya 9:7.
Yecu owaco bot lukwenane ma lugen ni gibiribbe kacel kwede i Ker me polo me ‘bedo i wi komker.’—Luka 22:28, 30.
Ker man tye ki lumonene ma bijwerogi woko.—Jabuli 2:1, 2, 8, 9; 110:1, 2; 1 Jo Korint 15:25, 26.
Baibul pe pwonyo ni Ker me polo tye i cwinyi, nyo ni loyo loc ki i cwiny ngat moni. Ento, nyuto ni “lok me ker pa Lubanga” nyo “kwena maber me ker pa Lubanga” twero gudo cwinywa dok omyero ogudi.—Matayo 13:19; 24:14.
Lok man ni “ker pa Lubanga dong tye i kinwu” tyen lokke ngo?
Jo mogo wigi onywene woko i kom ka ma Ker pa Lubanga tye iye pi kit ma kigonyo kwede Luka 17:21 i Baibul mogo. Me labolle, jo mogo guwacci lok pa Yecu te lokke ni Ker pa Lubanga tye i cwiny dano. Me niang tyeng man maber, omyero wangi lok murumo ka ngete.
Ker pa Lubanga onongo pe tye i cwiny jo ma lujemo man ma onongo gimito neko Yecu-ni
Yecu onongo tye ka lok ki Luparicayo, ma onongo gubedo lutela dini, ma guune dok guketo yub me neke. (Matayo 12:14; Luka 17:20) Tika porre me ye ni Ker pa Lubanga obedo gin mo ma i cwinygi ma nwang-ngi? Yecu owaccigi ni: ‘Iwu opong ki gin maraco keken.’—Matayo 23:27, 28.
Pi meno, Ker me polo onongo tye ‘i kin’ Luparicayo pien Yecu, ma Lubanga ocimo me loc macalo Kabaka me Ker meno, onongo ocung i nyimgi.—Luka 1:32, 33.
a Dini mapol pa Lukricitayo gipwonyo ni Ker pa Lubanga tye i cwiny dano. Me labolle, i lobo Amerika, dini me Southern Baptist guwaco i Guregi ni Ker pa Lubanga obedo but “loc pa Lubanga i cwiny ngat acel acel ki kwone.” I yo acel-li, i bukke ma wiye tye ni Jesus of Nazareth, Pope Benedict XVI owaco ni “Ker pa Lubanga bino i cwiny ngat ma lawiny.”
Itwero Bedo ki Miti i kom Lok Man
PWONY MA PIGI TEGO ME BAIBUL
Ker pa Lubanga Obedo Gin Ango?
I kare me tic me pwony pa Yecu, en opwonyo lok i kom Ker pa Lubanga makato lok mo keken. Pi mwaki mapol, lulub kore gulego pi Ker meno wek obin.
WI LUBELE
Anga ma Obedo Kabaka me Ker pa Lubanga?
Luco Baibul mapol gumiyo ngec ma twero konyowa me ngeyo ngat ma bidoko Kabaka me Ker pa Lubanga. I tekwaro pa dano tye ngat acel keken ma lok magi ducu orwatte ki gin mutimme i kome.