Wan macalo Lucaden pa Jehovah, watute matek me kelo kuc i kin jo me odiwa ki pa jiraniwa. Waworo Lubanga macalo Ngat ma ocako te yub me kwo me ot. (Acakki 2:21-24; Jo Epeco 3:14, 15) En pwonyowa ki cik ma igi lac me Baibul ma okonyo dano mapol i but lobo ducu me bedo ki wat matek kacel ki yomcwiny i nyomgi.

 Watute matek me lubo tira me Baibul, pien konyowa me bedo won ot, mon ki dong lunyodo maber. (Carolok 31:10-31; Jo Epeco 5:22–6:4; 1 Temceo 5:8) Ryeko ma nonge i Baibul konyo kadi wa lupaco ma gitye i dini mapatpat. (1 Petero 3:1, 2) Nen kong ngo ma jo ma pe gubedo Lucaden guwaco i kom luotgi ma gudoko Lucaden:

•   “Mwaki abicel mukwongo ma wacako bedo kacel onongo opong ki daa kacel turcwiny keken. Ento ma Ivete odoko Lacaden pa Jehovah, en odoko ngat ma lamar dok ma diyo cwinye. Alokaloka ma en otimo oweko nyomwa pe oket.”​—Clauir, ma a ki i Brazil.

•   “Pe abedo ki cwak i kare ma cwara Chansa, ocako kwano Baibul ki Lucaden pa Jehovah, pien onongo atamo ni gibiketo kenywa woko. Ento nicakke i kare meno, aneno dok ni Baibul okelo alokaloka madit i nyomwa.”​—Agness, ma a ki i Zambia.

 I ticwa me pwony, wanyuto ki jiraniwa kit ma keto cik me Baibul i tic twero konyogi me

•   Yero ngat me anyoma ki ryeko

•   Kanyo peko ma gikemme kwede i mwaka me acel me nyomgi

•   Kit me gwoko kuc i kin jo munyomme kacel ki wadigi

•   Tic ki cente i yo maber

•   Juko daa

•   Timo kica

•   Pwonyo lutino

 Ki lok ada, i kine mukene kelo peko. Me labolle, ma lubbe ki kwed ma kampuni mo ma kilwongo ni Sofres otimo i 1998, kinongo ni i kom luot 20 mapatpat ma nongo ngat acel keken aye tye Lacaden, luot acel gubedo ki peko madit adada i kare ma ngat meno odoko Lacaden.

 Yecu owaco ni lulub kore gibiwok ki i peko i kwo me otgi. (Matayo 10:32-36) Ngat mo ma okwano lok me tekwaro ma kilwongo ni Will Durant owaco ni i te Loc pa Luroma, “kibedo ka doto Lukricitayo ni gibalo keny pa dano,” a dok meno aye adot ma kimoro bene i kom Lucaden pa Jehovah i kare-ni. Tika man nyuto ni Lucaden giketo odi pa dano?

 I kare ma kitye ka ngolo kop pi adot ma kimoro ni Lucaden pa Jehovah giketo odi pa dano, kot madit me European Court of Human Rights owaco ni jo ma pe gubedo Lucaden aye pol kare gikwero “jolo ki woro twero pa jo me odigi me bedo agonya me timo jami ma dinigi mito.” Kot-ti dok omedde ni: “Tim man dwong adada i kin jo me ot ma gitye i dini mapatpat, man kwako wa Lucaden pa Jehovah.” b Kadi bed ni kidiyo Lucaden pa Jehovah, ento gin pud gitute me lubo tira me Baibul ma waco ni: “Pe wucul wang gin marac ki gin marac i kom dano mo, . . . Ka ce twerre ki tung botwu, myero wubed ki kuc ki dano ducu.”​—Jo Roma 12:17, 18.

 Lucaden gilubo tira me Baibul ma waco ni myero wanyomme i “Rwot keken,” meno te lokke ni myero inyom ngat ma inywako kwede niye acel. (1 Jo Korint 7:39) Man cik ma nonge i Baibul dok bene tye pi ber bedowa. Me labolle, kicoyo i buk me Journal of Marriage and Family me mwaka 2010 ni “ka jo me ot ducu gitye i dini acel dok gilubo niye acel” ci gibibedo ki wat maber i kingi. c

 Kadi bed kumeno, Lucaden pe gicuko cwiny jo mukene me pokke woko ki bot luotgi ma pe obedo Lacaden. Baibul waco ni: “Ka ce Lakricitayo mo tye ki dakone ma pe oye Yecu, ka dako-nu oye me medde ki bedo kwede, laco pe myero oryeme woko. Ka dako mo bene tye ki cware ma pe oye Yecu, ka ce cware oye me medde ki bedo kwede, pe myero okwer cware.” (1 Jo Korint 7:12, 13) Lucaden pa Jehovah gilubo cik man.