Lutinoni giromo maro Lubanga ka ce gingeyo gin ma nyuto ni en tye ki dok ni en maro lutino. Wek gumar Lubanga, mitte ni myero gunge en. (1 Jon 4:8) Me lapore, gin myero gunge jami magi: Lubanga onongo tye ki yub ango i kare ma en ocweyo dano? Pingo Lubanga weko dano deno can? Gin ango ma Lubanga bitimone pi dano i kare me anyim?​—Kwan Jo Pilipi 1:9.

Me konyo lutinoni wek gumar Lubanga, in omyero inyut botgi ni imarre. Man weko gin bene gilubo lanenni ka ce itimo meno.​—Kwan Nwoyo Cik 6:5-7; Carolok 22:6.

Lok pa Lubanga tiyo matek. (Jo Ibru 4:12) Pi meno, kony lutinoni me niang pwony ma pigi tego ma tye i Baibul. Me gudo cwiny dano, Yecu openyo lapeny, otero ite me winyo lok, ki dong otito tyen lok me Ginacoya. Me gudo cwiny lutinoni, in bene omyero ilub lanen pa Yecu i kit ma en obedo ka pwony kwede.​—Kwan Luka 24:15-19, 27, 32.

Medo i kom meno, jami mogo mutimme i Baibul ma lubbe ki kit ma Lubanga otero kwede jone romo konyo lutino me ngeyo ki dok maro Lubanga. Bukke ma kicoyogi me konyo lutino ginonge i www.pr418.com.​—Kwan 2 Temceo 3:16.