Gin ango ma bino i wii ka iwinyo pi Decemba 21, 2012, nino ma tye i kalenda me Maya ma jo mapol gubedo ka wacone ni man aye nino ma agikki piny bibino iye i lobo lung? Iromo bedo lwor, cwiny romo bedo yom, ki dong tur, magi ducu cung i kom gen ma itye kwede. Man mono obedo byek me gobagoba ma kwako agikki piny?

“Agikki piny” ma kiloko pire i Baibul-li kono? (Matayo 24:3) Jo mukene gilworo ni kibiwango lobo-ni woko. Mukene cwinygi yom me neno gin ma bitimme i agikki piny. Jo mapol dong guol woko pien cawa weng kibedo ka waccigi-ni agikki piny dong cok. Ento tika man twero bedo kit ma gidok kwede i lok goba ma pe ada?

Itwero bedo ki ur me pwonyo gin ma Baibul waco i kom agikki piny. Baibul pe miyo keken tyen lok mumiyo omyero wakur agikki piny ento bene nyuto turcwiny ma bino ka ce tye ka galle. Wakwayi dong me neno lagam ma Baibul miyo pi lapeny mogo ma kibedo ka penyone ma lubbe ki agikki piny.

LAGAM MA BAIBUL MIYO: ‘Lubanga oketo lobo ocung matek i kom gutine, ma pe biyenge wacel.’​—JABULI 104:5.

Lobo-ni pe kibityekone kadi ki mac nyo i yo mo keken. Ma ka meno, Baibul pwonyo ni dano bibedo i lobo-ni matwal. Jabuli 37:29 waco ni “Jo ma kitgi atir gibicamo lobo, dok gibibedo iye matwal.”​—Jabuli 115:16; Icaya 45:18.

I nge cweyo lobo, Lubanga owaco ni jami ducu “tye mabeco twatwal,” dok en pud winyo kit meno. (Acakki 1:31) Pien pe tye ki pulan me tyeko lobo, en ocikke me “nyoto jo a tye a nyoto lobo” ki dok me gwokone wek pe kibal matwal.​—Nyut a Lakana 11:18, Baibul me leb Lango.

Itwero tamo ni 2 Petero 3:7 wacci lobo ni kibiwangone woko ki mac. Tyeng man waco ni: “Polo ki lobo me kare man dong gikano pi kuro mac.” Man mono pe nyuto ni lobo-ni kibiwangone woko ki mac? Ki lok ada, Baibul i kine mukene tiyo ki lok ni “polo,” “lobo,” ki dong “mac” me cung pi gin moni. Me lapore, Acakki 11:1 waco ni: “Lobo ducu yam onongo tye ki leb acel,” kany kitiyo ki “lobo” me cung pi dano.

Tyeng murumo ka nget 2 Petero 3:7 nyuto ni polo, lobo, ki mac gicung pi jami mapat pat. Tyeng me 5 ki 6 loko i kom Pii Aluka me kare pa Nua. I kare meno, lobo me kare ca pe kityeko woko dok lobowa-ni pe orweny. Ma ka meno, Pii Aluka otyeko lutim maraco nyo “lobo.” (Acakki 6:11) Dok bene otyeko “polo”​—jo ma onongo giloyo dano maraco ma kityekogi-ni. I yo acel-lu bene, 2 Petero 3:7 tito kit ma kibityeko kwede matwal lutim maraco kacel ki gamentegi marac-ci calo mac aye owango.

LAGAM MA BAIBUL MIYO: “Lobo tum woko ki mitine ducu; ento ngat ma tiyo gin ma Lubanga mito ri nakanaka.”​—1 JON 2:17.

“Lobo” ma bitum woko-ni pe obedo lobo man ma ngom-mi, ento obedo lutim maraco ducu ma kwogi pe rwatte ki miti pa Lubanga. Kit macalo dokto twero kwanyo ler ma olot pi two kanca wek elar kwo pa latwo moni-ni, Lubanga bene ‘bityeko’ lutim maraco woko wek jo ma kitgi atir gunong mit pa kwo i lobo pi naka. (Jabuli 37:9) I yo man, “agikki piny” nongo obedo gin maber.

Baibul mukene gonyo lok man ni “agikki piny[-nyi]” i yo mapat ni “agikki me yub me kare ni.” (Matayo 24:3; NW) Ka dano maraco keken aye kibityekogi, man nyuto ni jo mogo gibimedde ki kwo i lobo dok kit ma gikwo kwede bibedo pat. Baibul ye lok man, pien loko i kom “kare ma bibino anyim.”​—Luka 18:30.

Yecu olwongo kare meno ma tye anyim-mi ni obedo “kare me keto jami ducu wek odok manyen.” En bidwoko dano me bedo labongo roc mo keken kit ma onongo tye kwede i acakki cwec. (Matayo 19:28, New International Version) Wabinongo mit pa kwo iye.

• Lobo bidoko paradic ka ma dano ducu bibedo agonya ki kuc​—Icaya 35:1; Mika 4:4.

• Dano binongo adwogi maber kacel ki yomcwiny pi ticgi​—Icaya 65:21-23.

• Two ducu bibedo pe.​—Icaya 33:24.

• Pe tye ngat mo ma bitii.​—Yubu 33:25.

• Jo muto gibicerogi.​—Jon 5:28, 29.

Ka ce watimo “miti pa Lubanga,” ci myero pe wabed ki lworo pi agikki piny. Ma ka meno, wabedo ki yomcwiny me kurone.

LAGAM MA BAIBUL MIYO: “Ka wuneno gin magi gitye ka timme, myero wungee ni ker pa Rubanga dong tye cok.”​—LUKA 21:31, Baibol pa Katoli.

Lapwony Richard Kyle ocoyo i bukke me The Last Days Are Here Again ni, “alokaloka ma timme atura kacel ki woo i kin dano weko dano giromo wacci agikki piny tye.” Man tutwalle timme ka alokaloka ki woo magi pe kiromo tito ngo ma okelogi.

Ento, lok ma lunebi guloko i kom agikki piny-nyi onongo pe gitye ka tito gin mumiyo jami maraco tye ka timme i karegi-ca. Ma ka meno, Lubanga aye oweko gucoyo jami ma nyuto ni agikki piny dong tye cok. Nen kong lok pa lunebi magi ci imok tammi in kikomi ka gitye ka cobbe i karewa-ni nyo pe.

• Lweny, kec, oyengyeng, ki two gemo bipoto.​—Matayo 24:7; Luka 21:11.

• Tim maraco bimedde.​—Matayo 24:12.

• Dano bimedde ki balo lobo.​—Niyabo 11:18.

• Dano bimaro komgi kengi, lumar lim, ki lumar yomcwiny ma ka maro Lubanga.​—2 Temceo 3:2, 4.

• Tele i kin jo me ot.​—2 Temceo 3:2, 3.

• Dano gibikwero lanyut ma cimo ni agikki piny dong cok.​—Matayo 24:37-39.

• Tito kwena maber me Ker pa Lubanga i wi lobo lung.​—Matayo 24:14.

Kit ma Yecu owaco kwede-ni, ka waneno “gin magi ducu” gitye ka timme ci myero wange ni agikki piny dong tye cok. (Matayo 24:33) Lucaden pa Jehovah giye ni jami magi ducu gimoko ni watye i kare me agikki piny, dok ginywako i tito kwena i lobe 236.

LAGAM MA BAIBUL MIYO: “Ka dano giwaco ni, ‘Kuc tye, piny okwe mot, gin mo marac pe,’ to biturugi atura calo arem me nywal ma turu dako muyac, ka larre biloyogi woko.”​—1 JO TECALONIKA 5:3.

Baibul oporo agikki me lobo man ki arem me nywal ma bino atura ki arem malit adada. Kare meno bene rom aroma ki nywal, pien dako ma iye odongo ngeyo lanyut mapat pat ma cimo ni dong ecok nywal. Doktone twero byeko nino me nywalle; dok kadi pe otimme i nino meno, dako man bedo ki gen ni dong ecok nywal. Kit meno bene, ka agikki me lobo man pe obino i nino ma dano guwaco ni bibino iye-ni, man pe loko lanyut ma gicimo ni dong watye “i kare me agikki.”​—2 Temceo 3:1.

‘Ka dong lanyut ma ginyuto ni watye i kare me agikki-ni dong ginen ka maleng,’ itwero penye kekeni ni, ‘pingo jo mapol pe gitye ka nenone?’ Baibul nyuto ni ka agikki piny dong cok, dano pe gibiye lanyut magi. Ma ka ye alokaloka ma tye ka timme i kare me agikki-ni, gibibedo ki cac ni: “Cakke ma kwarowa guto woko, jami  ducu tye i kit ma yam gitye kwede i acakki keto lobo.” (2 Petero 3:3, 4) Lanyut me kare me agikki-ni ginen ka maleng, ento jo mapol pe giye.​—Matayo 24:38, 39.

Pwony man onyamo Ginacoya mogo ma moko ni agikki piny dong tye cok. * Imito pwonyo jami mukene mapol? Ka imito, pingo pe ipeny Lucaden pa Jehovah wek gukwan kwedi Baibul labongo cul mo keken? Gitwero kwan kwedi ki gang, ka mo keken ma inongo ni itye agonya nyo bene icim. Gin ma gimito ki boti aye cawa, dok adwogi ma ibinongo ki iye dwong ma pe wacce.