Wapwonyo Lok i kom Lubanga ki Bot Lunebine
I kare mukato angec, Lubanga ocwalo kwena ma pire tek bot dano kun tiyo ki lunebine. Tika kwena magi twero nyutiwa kit me nongo mot ki bot Lubanga? Ada, gitwero. Kong dong wanen gin ma wapwonyo ki bot lunebine adek ma lugen.
ABRAIM
Lubanga pe poko kin dano dok mito miyo mot bot dano ducu.
Lubanga ocikke bot lanebi Abraim ni, ‘kaka ducu ma i wi lobo binongo gum pi in.’—Acakki 12:3.
Man pwonyowa gin ango? Lubanga marowa matek dok mito miyo mot bot jo me odi ducu—co, mon, ki lutino—ma gin luwiny.
MOSES
Lubanga lakica dok goyo laane i kom jo ma gitute me ngeyo en.
Won Twer Ducu omiyo ki lanebi Moses teko me timo tango madongo. Kadi bed kit meno, Moses olego ni: “Nyutta kiti, wek angeyi, anong gum ki boti.” (Nia 33:13) Gin ma Moses openyo pire oyomo cwiny Lubanga oweko En omiyo ki Moses ngec kacel ki niang matut i kom kite ki yone. Me labolle, Moses opwonyo ni Lacwec obedo “Lubanga ma lakica dok maro dano.”—Nia 34:6, 7.
Man pwonyowa gin ango? Lubanga mito miyo mot botwa ducu—co, mon, ki lutino—ka watute me ngeyo en maber. En onyutiwa i Coc Maleng kit ma omyero wawore kwede dok otitiwa ni etye ki miti me miniwa cwakke ki motte.
YECU
Pi kicane, Yecu ocango kit two ki goro ducu
Watwero nongo mot mari pi naka ki bot Lubanga ka wapwonyo lok i kom Yecu ki gin ma en otimo dok opwonyo.
Lok pa Lubanga tye ki lok mapol ma kubbe ki pwony kacel ki kwo pa Yecu. Lubanga omiyo ki Yecu teko me timo tango madongo mapol, calo cango lutowang, luding it, ki lungolo. En ocero wa jo muto. I yo meno, Yecu onyuto mot ma Lubanga bimiyone bot dano ducu i kare me anyim. En otito kit ma ngat acel acel i kinwa twero nongo kwede mot magi: “Man en kwo ma pe tum, ni ginge in Lubanga acel me ada, ki Yecu Kricito ma yam ioro.”—Jon 17:3.
Yecu onongo lakica dok paro pi dano. Co ki mon, lutino wa ki ludito gucito bote i nge winyo lwongone man, ni: “Wupwony kita, pien an awor, dok amwol bene i cwinya, mumiyo wun bene wubilimo yweyo i cwinywu.” (Matayo 11:29) Pe calo jo mukene i karene ma onongo gitero mon i yo marac, Yecu otero mon ki mwolo, kica, dok ki woro.
Man pwonyowa gin ango? Yecu onyuto mar matut pi dano, dok en oweko lanen ma pud dong ber loyo i kom kit ma omyero water kwede jo mukene.
YECU PE OBEDO LUBANGA
Coc Maleng pwonyo ni “ki tung botwa Lubanga tye acel” dok ni Yecu obedo ngat ma Lubanga ooro. (1 Jo Korint 8:6) Yecu otito ka maleng ni Lubanga dit kate dok ni Lubanga aye oore i lobo.—Jon 11:41, 42; 14:28. *
^ para. 17 Pi ngec mukene i kom Yecu Kricito, nen bute me 8 ki 9 i brocuwa me Real Faith—Your Key to a Happy Life ma tye nonge i Intanet i www.pr418.com.
