I pwony mukato-ni, waneno lanyut ma Yecu omiyo. Lanyut man moko ni Ker pa Lubanga dong ocako loc i polo dok Yecu Kricito aye tye Kabakane.

Baibul otito ni ka Yecu ocako loc, en onongo biryemo Catan kacel ki jogine woko ki i polo. I kare-ni, ticgi gudo jo ma i lobo keken, dok man aye tyen lok ma oweko jami maraco omedde matek i lobo nicakke i mwaka 1914.​—Niyabo 12:7, 9.

Kadi bed ni kwo tye ka doko tek medde ameda i lobo, Yecu macalo Kabaka me Ker pa Lubanga tye ka timo jami mapol me konyo dano i wi lobo-ni. Watye ki pwoc madit adada pien yub me pwonyo dano ki lok ada me Baibul ma Yecu otito pire-ni, tye ka konyogi me pwonyo Lok pa Lubanga ki ketone i tic i kwogi. (Icaya 2:2-4) Dano milion mapol dong gupwonnye me bedo ki neno mupore i kom tic, gitye ka kwo ki yomcwiny i odigi, dok gitye ki neno mupore i kom jami me kom. Jo magi gitye ka pwonnye wek ginong adwogi maber i kare-ni kun giyubbe pi kwo ki kuc i te loc me Ker pa Lubanga.

Kadi bed ni Yecu dong tye ka loc i polo, dano aye pud gitye ka loc i lobo kany. Ento Lubanga owaco ki Yecu ni: ‘Bed ka loc i dye lukworri.’ (Jabuli 110:2) Ma pe otero kare malac, Yecu bidwogo me ngolo kop kun tyeko lukworre ducu dok kelo kuc bot jo ma giye winyo Lubanga.

I kare meno, Ker pa Lubanga bitimo jami magi

• Bijwero dini goba. Dini ma gubedo ka pwonyo lok goba i kom Lubanga kun gidiyo dano dong bibedo pe. Baibul oporo dini goba ki dako ma lakwele. Jwero dini goba bibedo gin me ur adada bot jo mapol.​—Niyabo 17:15, 16.

• Bigiko loc pa dano. Ker pa Lubanga bigiko loc pa dano.​—Niyabo 19:15, 17, 18.

• Bijwero lutim maraco. Gin ango ma bitimme i kom jo ma gumoko tamgi me timo jami maraco kun gikwero winyo Lubanga? Baibul waco ni “jo maraco gibityekogi woko ki i lobo.”​—Carolok 2:22.

• Bijwero Catan ki jogine. Catan ki jogine pe dok gibibedo ki kero me “bwolo rok ducu.”​—Niyabo 20:3, 10.

Man bikelo adwogi ango bot jo ma gimine i te Ker pa Lubanga?

Ka Yecu woto ki loc i polo, en bicobo jami mapol adada ma dano adana pe twero cobone. Luloc luwote 144,000 ma kiyerogi ki i lobo gibikonye. (Niyabo 5:9, 10; 14:1, 3) En bineno bene ni miti pa Lubanga kitimo i lobo kany. Gin ango ma Ker pa Lubanga bitimo pi jo ma gibileyo lobo?

• Bijwayo two ki to. “Pe tye dano mo ma bedo i lobowa ma biwaco ni, ‘An koma lit.’” dok “to bene dong bibedo pe.”​—Icaya 33:24; Niyabo 21:4.

• Bikelo kuc me ada ki piny ma opye mot. “Litinoni gibibedo maber twatwal,” dok “ngat acel acel bibedo i te olokke ki i te odurone, pe tye ngat mo ma bimiyo gibedo lwor.”​—Icaya 54:13; Mika 4:4.

• Bimiyo ki dano tic ma kelo yomcwiny. “Jona ma an aye ayerogi gibibilo tic me cinggi pi kare malac. Ngat mo i kingi pe biyelle ki tic nono.”​—Icaya 65:22, 23.

• Bicobo peko me kabedo ma orumowa. “Lobo mutwo kacel ki tim bibedo ki yomcwiny, ature bituru iye calo lenga.”​—Icaya 35:1.

• Bipwonyo dano gin ma myero gutim wek gubed kwo pi naka. “Man en kwo ma pe tum, ni ginge in Lubanga acel me ada, ki Yecu Kricito ma yam ioro.”​—Jon 17:3.

Lubanga mito ni inong mot magi. (Icaya 48:18) Pwony ma lubo man bitito gin ma itwero timo wek ibed i kin jo ma gibibedo ki anyim mamwonya man.