ANYAKA mo ma nyinge Yomara ki omegine—Marcelo ki Hiver—gibedo i caro mo matidi i lobo Guatemala. Yomara ocako kwano Baibul ki Lucaden, dok lacen omegine guribbe kwede i kwanne me Baibul. Ento onongo gitye ki peko mo. Gin adek ducu wanggi oto woko, dok onongo pe gingeyo kwano brail. Pi meno, lapwonygi me Baibul onongo kwanigi buk ma gitye ka kwanone kacel ki wang Ginacoya me pwony meno.

Onongo bene pe yot botgi me bedo tye i cokke. Pigi kengi, onongo pe yot me wot pi dakika 40 me cito i Ot me Ker macok loyo kwedgi. Ento omege ma i kacokke guketo yub me terogi i cokke ducu. Dok i kare ma gucako miyo pwony i cokke me dye cabit, omege okonyogi me mako i wigi pwony ma kiminigi.

I Mai 2019, kiketo yub me cako bedo ki cokke i carogi. Me oo i kare meno, onongo tye luot mo ma gitye painia marii ma gudak i caro meno. Onongo pe gingeyo kwano ki coyo brail, ento onongo gimito pwonyo lutino magi ma wanggi oto woko-ni ki kit me timone. Pi meno, gucito i laibrari dok gugamo bukke ma pwonyo brail wek okonygi pwonyo jo mukene kit me kwanone ki coyone.

I nge nongo pwonnye pi dwe mogo manok keken, lutino adek magi onongo dong gitwero kwano brail maber dok man okonyogi me dongo i yo me cwiny. a I kare-ni, Yomara, Marcelo, kacel ki Hiver dong gitiyo macalo painia marii. Marcelo tye lakony kor tic i kacokke. Cabit ducu, gibedo ka tiyo tic mapol adada pi Jehovah. Mit komgi i tic pi Jehovah tugo cwiny jo mukene me tic ki mit kom bene.

Lutino adek magi gitye ki pwoc pi mar ki kony ma gunongo ki i kacokke. Yomara owaco ni, “Cakke ki i tyen mukwongo ma warwatte ki Lucaden, gunyutiwa mar me ada.” Marcelo bene owaco ni, “Watye ki lurem mabeco i kacokkewa, dok watye ki jo me ot i twok lobo-ni ducu ma gunote kacel pi mar.” Yomara kacel ki omegine gitye ki mitti madwong adada me neno kit ma kibiloko kwede lobo me doko paradic.—Jab. 37:10, 11; Ic. 35:5.