I kare ma Jehovah ocako te yub me ot, en oketo ni lunyodo aye myero gubed ki twero i kom lutino. (Jo Kolocai 3:20) Obedo ticci macalo lanyodo me pwonyo latinni me maro Jehovah ki bene me dongo makwiri. (2 Temceo 1:5; 3:15) Omyero bene iniang lok ma tye i cwiny wodi nyo nyari. Ento, lanenni obedo gin ma pire tek adada. Itwero pwonyo Lok pa Jehovah bot latinni ka kong iketo i cwinyi.—Jabuli 40:8.

GIN MA BAIBUL WACO: “Dano acel acel myero owiny lok oyotoyot, ento pe myero orune me gamone.” (Yakobo 1:19) Imito ni obed yot bot lutinoni me lok kwedi. Gin myero gunge ni in bene itye atera me winyo lokgi. Wek kuc obed i paco, ci lutinoni gibinongo ni lok boti yot. (Yakobo 3:18) Ka gitamo ni iger, ci pe gibibedo agonya me lok kwedi. Di cwinyi i kom lutinoni, dok itit botgi ni imarogi.—Matayo 3:17; 1 Jo Korint 8:1.

GIN MA ITWERO TIMONE:

• Bed tye ka lutinoni gimito lok kwedi

• Lok ki lutinoni kare ki kare, pe i kare ma nongo gitye i peko keken

GIN MA BAIBUL WACO: “Ngat ma winyo lok  . . . bibedo ki kwo maber.” (Carolok 16:20) Kare mukene, myero kong ilwod jami ma lutinoni loko ka imito niang gin ma i cwinygi. Yot tutwal bot jo matino me kwoto lok nyo me waco gin mapat ki ma gimito. “Myero kong iwiny lok ma nongo peya igamo lok mo; ka pe, ci inyuto mingngi.” (Carolok 18:13) Pe iwek kiniga omaki oyot.—Carolok 19:11.

GIN MA ITWERO TIMONE:

• Temme ki tekki ducu pe me ngolo lokke nyo keco, kadi bed latinni oloko gin mo marac

• Tem po i kom kit ma onongo iwinyo kwede ma pud itidi dok itam pi gin ma onongo pire tek boti

GIN MA BAIBUL WACO: “Latin, winy lok ma woru pwonyi kwede, pe ikwer winyo pwony pa meni bene.” (Carolok 1:8) Jehovah omiyo bot wego ki mego twero i kom lutino. Myero wupwony lutinowu me bedo luworo ki luwiny. (Jo Epeco 6:1-3) Lutino giniang kace lunyodogi guribbe i “tam acel.” (1 Jo Korint 1:10) Ka tamwu pe orwatte, pe myero wunyut man i nyim lutino pien weko lutino pe gibedo ki woro piwu macalo lunyodo.

GIN MA ITWERO TIMONE:

• Wunyam dok wumok kit ma wubimiyo kwede tira bot lutino

• Ka tammi i kit me miyo tira bot lutinowu pat ki pa luoti, tem kong niang tam pa luoti

GIN MA BAIBUL WACO: “Pwony latin con ma nongo en pud tidi kit yo ma myero en obed kwede.” (Carolok 22:6) Pwonnye maber pa lutinoni pe bitimme kene. Omyero iket yub me pwonyogi, ma kwako wa miyo tira bene. (Jabuli 127:4; Carolok 29:17) Miyo tira pe obedo miyo pwod keken, ento kwako konyo lutinowu me niang gin mumiyo lubo cik pire tek. (Carolok 28:7) Myero bene wupwonygi me maro Lok pa Jehovah kun gitemo niang maber pwony ma iye. (Jabuli 1:2) Man konyogi me dongo cwiny me poko gin matir ki marac.—Jo Ibru 5:14.

GIN MA ITWERO TIMONE:

• Wek lutinoni gunen Lubanga calo Ngat ma gitwero keto gengi i kome

• Konygi me ngeyo kacel ki gwokke ki jami maraco ma twero balo kitgi, calo ma tye i Intanet. Pwonygi me gwokke ki jo ma pyedo lutino