Ee, Xoossay deˈiyoogaa bessiya mino naqaashay Geeshsha Maxaafan deˈees. Nuuni Xoossay deˈiyoogaa ammaniyoy naqaashi baynnan woy nu haymaanootee hegaadan giidi tamaarissido gishshawu gidana bessenna; Geeshsha Maxaafay nuuni ‘ubbabaakka paaccidi’ ‘akeekidi’ ammananaadan minttettees. (1 Tasalonqqe 5:21; 1 Yohaannisa 5:20) Geeshsha Maxaafay yootiyo kaallidi deˈiya ammanttiyaabata beˈa:

•   Maaraa mankkaa naagida salo gufanttuwan deˈuwan deˈiyaabay Xoossay deˈiyoogaa qonccissees. Geeshsha Maxaafay hagaadan gees: “Aissi giikko, keetta ubbaa keexxidaagee issi asa; shin ubbabaa keexxidaagee Xoossaa.” (Ibraawe 3:4) Tamaarida daro asay, akeekanawu waayissenna he qofay ammanttiyaagaa gidiyoogaa akeekidosona. a

•   Nuuni asa gidiyo gishshawu, nu deˈuwaa halchchoy aybakko eranawu koyiyoogee wottin deˈiyaaba. Deˈuwan deˈanawu nuussi koshshiyaabay deˈikkonne, deˈuwaa halchchuwaa akeekana xayikko ufayttokko. Geeshsha Maxaafay yootiyoy qumaa namisettiyoogaa gidennan ayyaanaabaa namisaa hegeekka, Xoossaa eranawunne awu goynnanawu koyiyoogaa bessees. (Maatiyoosa 4:4; Ajjuutaa 4:11) Xoossay nuuni A eranaadaaninne awu goynnanaadan oottidi nuna medhdhidoogee I deˈiyoogaa xalla gidennan, I nuna siiqiyoogaanne nuuni aara dabbotanaadan koyiyoogaa bessees.

•   Geeshsha Maxaafan deˈiya hiraagati daro layttappe simmin suure polettidosona. He hiraagati tuma gidiyoogee, eta yootida Xoossay asaappe eran keehi aadhdhiyoogaa bessees.—2 PHeexiroosa 1:21.

•   Geeshsha Maxaafaa xaafidaageeti eti deˈido wodiyan asay akeekibeenna saynisee yootiyo tumubaa akeekidosona. Leemisuwawu, beni wode daro asay saˈaa danggarssay, gudunttay woy booray tookki uttiis giidi ammanees. SHin Xoossay ‘saˈaa aybikka baynnasan kaqqidoogaa’ Geeshsha Maxaafay yootees. (Iyyooba 26:7) Qassi saˈay ‘irzzo’ mala giidi yootiyoogan saˈaa qottaa Geeshsha Maxaafay suure yootees. (Isiyaasa 40:22) Daro asay Geeshsha Maxaafaa xaafidaageeti hegaa akeekidoy etawu Xoossay yootido gishshataassa giidi qoppees.

•   Geeshsha Maxaafay deexo gidida daro oyshata zaarees. Hegaa mala oyshatu zaaruwaa issi uri erennaba gidikko, Xoossi baawa giidi qoppana danddayees. Leemisuwawu, Xoossay asaa siiqiyaabanne ubbabaa danddayiyaagaa gidikko, waayeenne iitabay alamiyan daridoy aybissee? Asay loˈˈobaa aggidi iitabaa oottanaadan haymaanooteti eta darotoo denttettiyoy aybissee?—Tiitu 1:16.