Nlitan 4:1-11
4 Mvuse ya valé me nga yen, a tama yenan! Mbé ô yoo yôp été, a tyiñ ôsu me nga wôk é kobô’ô a ma é mbe ane tyiñe toñ, é jô’ô na: “Bete’e nné, a ma ye liti wo mame ma yiane bobane melu ma zu.”
2 Mvuse ya valé, été été, nsisime Zambe ô nga be’e ma a kee ma vôm éto njôane Zambe é ne, a tama yenan! Éto njôan é mbe vôm é wô’ô tabe yôp été, a môt éziñ a mbe a too été yôp.
3 A Nyu a mbe a too éte yôp a mbe a funa’an ako’o jaspe a ako’o sardoine,* ndutum ô mbe valé ô too ane éméraude ô bôma’ane éto njôan.
4 Mbôma’ane éto njôan, bito bi njôane 24 bi mbe valé, a me nga yene bemvendé 24 be be’e bifumulu biyé a becouronne be too a gôlôt e minlô miap, be mbe be too bito bi njôane bite yôp.
5 Befeleves, metyiñ a bezo’oyañe be mbe be so’o éto njôan; a belambe zangbwal be mbe be yôñô’ô ôsu éto njôan, be ne ndeme ya minsisime mi Zambe zangbwal.
6 Ôsu éto njôan, jôm éziñ é mbe valé, é funa’ane mañe me éyet é too ane cristal.
Ézezañ éto njôan a mbôma’ane éto njôan, bevevee bitétéa binyine be mbe valé be bili abui mis ôsu a mvus.
7 Vevee ététéa ôsu é mbe ane ngbwengbwem, a vevee ététéa baa é mbe ane mon ényaka, a vevee ététéa lale é mbe é bili asu ane asu môt, a vevee ététéa nyini é mbe ane ndôé ja ke ja yele.
8 Mfa’a ya bevevee bitétéa binyin, ététéa ése ya be be é mbe é bili mefabe mesamane me too njalan a mise mfa’a ya yôp a mfa’a ya si. A môse ba alu, bia ke ôsu a jô na: “Étyi, étyi, Yéhôva* Zambe a ne étyi, Nyu a bili ngul ése, nyu a mbe, a nyu a ne, a nyu a zu.”
9 Éyoñ ése bevevee bitétéa ba ve Nyu a too éto njôane duma, ékaña’a a mvean akiba, Nyu a nyiñe nnôm éto a nnôm éto,
10 bemvendé 24 ba kute meboñe si ôsu Nyu a too éto njôan a kañe Nyu a nyiñe nnôm éto a nnôm éto, a ba bôé becouronne bap éto njôan ôsu, be jô’ô na:
11 “A Yéhôva* Zambe wongan, wo yiane duma a ékaña’a a ngul, amu wo ô nga té biôme bise, a amu nkômbane wôé bise bi vee a bi nga téban.”
