Matthieu 28:1-20
28 Mvuse môse Sabbat, môs ôsu ya sondô, Marie Madeleine a Marie mbo’o be nga kune ke fombô soñ.
2 Ane beta mfô’ôsane si a nga boban, amu éngele Yéhôva* a nga so yôp a sise si, ane a nga tindi akok, a tabe de yôp.
3 A mbe a faé ane éfufup, a biyé bié bi mbe éfumulu ne fuum.
4 Bezimbi be mbe vaé soñe be nga ko nye mbia woñ, a woñ ôte ô nga bo na, be bo ve ane mimbim.
5 Ve éngele a nga jô binga na: “Te koone woñ, amu ma yeme na mia jeñe Yésus, nnye ate be nga bômôlô élé.
6 A nji bo va, amu a wômôya miñwuan aval a nga kate mia. Miabebiene za’a yenané vôm a mbe a bôô.
7 Avôl avôl, kele’e katané beyé’é bé na a wômôya miñwuan, nde fe a keya mia yange ôsu Galilée, nne mia ye yene nye wôé. Jame ma be na ma kate mia nde le!”
8 A woñ ôse a beta mevak, be nga kôlô vôme soñ é mbe avôl avôle na be ke kate de beyé’é.
9 Nté be mbe be kelek, nde Yésus a nga zu tôbane be a jô na: “Mbôlané!” Ane be nga subu nye bebé a vitibi ôsu wé, a bi nye mebo.
10 Nde Yésus a nga jô be na: “Te mia ko woñ, kele’e katané bobenyañe bame foé, ndembene be ke Galilée, nne bia ye yenane wôé.”
11 Nté binga be mbe zen, bezimbi béziñe be nga nyiine tison a ke kate bejôô beprêtre mame mese me nga boban.
12 Éyoñe be maneya tôkan a bemvendé ya ayoñ a fas, be nga ve bezimbi abui moné,
13 a kate be na: “Jô’ané na: ‘Beyé’é bé ba te zu wube mbime wé alu, nté bi mbe bi kele’e ôyo.’
14 A nge ngovina a wô’ô ajô éte, biabebiene bia ye ke faé nye éfufup, nde, te mia tyelé minleme yôp.”
15 Ane be nga nyoñe moné, a bo avale be nga jô be na be bo. Nlañ ôte ô nga mialane be bejuif azukui den.
16 Ve beyé’é 11 be nga ke Galilée, nkôl, vôme Yésus a nga kate be na ba yiane tôban.
17 Éyoñe be nga yene nye, be nga vitibi ôsu wé, ve bisô bi mbe bôte béziñe ya été minlem.
18 Yésus a nga subu be bebé, a kate be na: “Zambe a maneya ve ma éjôé ése yôp a si.
19 Kelané mi bo bôte ya meyoñe mese beyé’é, mi du be, e jôé Ésa a Mon a mfufube nsisim,
20 mi ye’ele be na be tôñe mebendé mese me nga ve mia. A yenané! Me ne a mia môs ôse, akekui memane ya émo.”*
