Marc 12:1-44
12 Ane a nga taté na, a kobô a be a bela’ane bive’an: “Môt éziñ a nga bé afube mindik, a lôñe de nka’ale ô bôma’ane afup, a nga fa’a fe vôme ba miate woon a lôñe fe nkum, nde a nga li’i de bebé mefup a ke dulu vôm a ne ôyap.
2 Éyoñ éyoñe ya kolé bibuma é nga kui, nde a nga lôme mbo ésaé wé na a ke nyoñ abime bibuma éziñe ya afube mindi’i be be.
3 Ve be nga bi nye a yite nye a titane nye teke jôme mo.
4 Ane a nga beta lôme be mbo ésaé mfe, a nyuli ate, be nga bibi nye nlô, a samele nye.
5 A nga lôme mfe, ane be nga wôé nye, a nga lôm abui bebo bisaé afe, bevo’o ya été be nga yite be, ba bevo’o ki, be nga wôé be.
6 Nde môt a mbe afup, a nga su’ulane lôme mone wé, nyi a dañe nye’e. A nga lôme nye a jô’ô émiene na, ‘Ba ye semé mone wom.’
7 Ve bebé mefube be mbe be jô’ô be be na, ‘Môt a ye nyoñ éli’i le a zu, ñwôané nye, bi nyoñ éli’i jé.’
8 Nde be nga bi nye a wôé nye a wua nye afube mindik atan.
9 Jé nje môt a ne afube mindik a ye bo? A ye so a wôé bebé mefup, a ve bôte befe afube mindik.
10 Ye mi nji lañ éfuse ji: ‘Ako’o belôñe menda be nga ben, nde é nga su’ulane bo nlô ako’o ya jua?’*
11 Ye mi nji lañe na: ‘Jam éte é nga so be Yéhôva,* a é ne fe jame bia semé’?”
12 Bescribe a bejôô beprêtre be mbe be kômbô’ô bi nye, ve be mbe be ko nsamba bôte woñ, amu be nga yeme na, mbe a mbe a jô’ô be éve’an a nga nyoñ, nde be nga li’i nye, a ke.
13 Akôlô ya valé, be nga lôme nye bepharisien béziñ a bôte ya ngame Hérode na, be bôndé fe’e ya bi nye a zene ya mam a ye jô.
14 Éyoñe be nga suan, be nga jô nye na: “A Ñye’ele bia yeme na ô ne zôsô a na wo bo ki mame na bôte be yene wo mvaé, amu ô ne teke fombô bôte mesu, ve wo ye’ele bôte mejô me Zambe e zôsô été. Ye atiñe da kañese na, môt a ya’ane César toya* ye momo?
15 Ye bia yiane ya’ane César toya, ye momo?” Éyoñ a nga yeme medu’ane map, Yésus a nga yalane be na: “Amu jé mia ve’ele ma? Za’ané ma denier* wua, me tame nye yen.”
16 Be nga zuu nye denier wua, ane a nga sili be na: “Asu za é ne nkañane va, a jam é ne ntilane va da fombô za?” Be nga yalane nye na: “César.”
17 Yésus a nga jô be na: “Bula’ané César biôme bi César, ve Zambe biôme bi Zambe.” Be mbe fe’e ne vema.
18 Môs ôte, besadducéen, mbe bete ba jô na ñwomane miñwuane wo ye ke boban, be nga zu yene nye a sili nye na:
19 “A Ñye’ele, Moïse a nga tili bia na, nge môt éziñ a wu a li’i minga wé teke biaé mon, monyañe wé a yiane lu’u minga a te lik, bone ba minga ate ba ye biaé, ba ye nyoñeban ane bone be môt a nga wu.
20 Bobenyañe zangbwal be mbe a bia va. Nyi ôsu a nga lu’u minga, ve éyoñ a nga wu a nji ke li’i mon.
21 A nyi baa a nga lu’u nye, ve a nga wu teke li’i mon, a nyi lale fe a nga bo ve avale da.
22 A bese zangbwale be nji li’i mon, mvuse ya valé, minga fe a nga su’ulane wu.
23 Éyoñe ya ñwômane miñwuan, minga ate a ye bo minga za? Amu bese zangbwale be nga lu’u nye.”
24 Yésus a nga yalane be na: “Nga vôm ate nye mia kop? Amu mi nji yeme Mintilan, nge ngule Zambe.
25 Amu éyoñe ya ñwômane miñwuan, befame be nji lu’u binga a binga be nji ke meluk, amu be ntoo ane beéngele ya yôp été.
26 Ve mfa’a ya ñwômane miñwuan, ye mi nji lañe kalate Moïse, nkañete ya mon élé a be’e biyo, na Zambe a nga jô nye na: ‘Me ne Zambe Abraham, Zambe Isaac a Zambe Jacob’?
27 A nji bo Zambe miñwuan, a ne Zambe bevevee, mia kobe fo’o nya abuii.”
28 Môte wua ya bescribe a nga wôk ane a sañetan a be, ane a nga yeme na a te yeme yalane be, nde a nga zu koone Yésus a sili nye na: “Metiñe mese, atiñ avé é ne di ôsu?*
29 Yésus a nga yalane na: “Atiñ ôsu é ne na, ‘Vô’ôlô’ô a Israël, Yéhôva,* Zambe wongan a ne Yéhôva* wua,
30 wo yiane nye’e Yéhôva* Zambe wôé a nleme wôé ôse a ényiñe* jôé ése a ôsimesane wôé ôse a ngule jôé ése.’
31 Di baa di, ‘Wo yiane nye’e môte mbok ane wo nye’e womien.’ Teke atiñ afe da dañe malé mete.”
32 Mone scribe a nga jô nye na: “A Ñye’ele, wo kobô abeñ, avale da wô’é a benya mejôô, ‘A ne fo’o Wua a mfe a nji bo ane nye;’
33 nde fe nyeke’e nye a nleme wôé ôse, a mfasane wôé ôse a ngule jôé ése; a wo yiane nye’e môte mbok ane wo nye’e womien a dañe mfi a lôte mimveane ba di’i nduan a avale mimvean ése.”
34 Éyoñ a nga yene na, a te yeme yalan, Yésus a nga jô nye na: “Ô nji bo ôyap a Éjôé Zambe.” Ve môt éziñ a nji ve’ele beta ke sili nye nsili.
35 Ve nté a mbe a kele’e ôsu a ye’ele Temple, Yésus a nga sili na: “Amu jé bescribe ba jô na, Krist a ne mone David?
36 A ngule ya mfufube nsisim, David émien a nga jô na, ‘Yéhôva a nga jô Tate wome na: “Tabe’e si mbo nnôme wom, akekui ma bôé bôte ba siñe wo, mebo môé si.”’
37 David émien a loone nye na, Tate, nde aval avé Krist a ne bo mone wé?”
A beta nsamba bôt a mbe a vô’ôlô nye a mevak.
38 Nté a mbe a ye’ele’e, a nga beta jô na: “Taba’ané ntyel a bescribe, mbe ba nye’e ba ke ba wulu be be’e meyabe biyé a ba nye’e na, be batane be minseñe mi makit;
39 ba nye’e ba tabe bito ya ôsu* besynagogue; a éyoñe ba di, ba nye’e be tabe’e beta bito ba ba’ale asu beta beyeñ.
40 Ba wôlé minkuse biôme be bili,* ba ye’elane Zambe ayap amu ba yi na bôte be yene be, a ba ye nyoñe mekua me ne ngul abui.
41 Ane a nga tabe si ôsu minkop* a taté na a yen ane nsamba bôte wo wua moné minkop été, a ane abui minkukume da wua abui minsañe mi moné été wôé.
42 Mvuse ya valé, ane nzôzoé nkuse minga ô nga suan, a futi bone minsañe mi moné bebaé be nji be dia.*
43 Nde Yésus a nga loone beyé’é bé a jô be na: “Ma kate fo’o mia na, nzôzoé nkuse minga wu, wo te futi abui moné a dañe bôte bevo’o bese ba te futi moné minkop.
44 Amu bese ba te futi nkop été, abim é nga bu’u be, ve nye, azoé dé été a te ve abim ése a be a bili na a nyiñe de.”
Notes
^ Belôñe menda be mbe be beté’é akok éte mfine yôbe na, é late mimfine mibaé.
^ Lañe’e Atinane bifia.
^ A mbe toya mone juif ase a mbe a yiane ya’an.
^ Nsañe moné beromain ô mbe ô kui 3.85 g.
^ Nge ke, “da dañe mfi.”
^ Lañe’e Atinane bifia.
^ Lañe’e Atinane bifia.
^ Lañe’e Atinane bifia.
^ Éfia Grec, psukhê. Lañe’e Atinane bifia, “Ényiñ.”
^ Nge ke, “bia dañ abeñ.”
^ Nkobô Grec, “menda map.”
^ Nkobô Grec, “biwolo.”
^ Nge ke, “belepta bebaé, mbe ba ve quadran wua.”
