Jean 15:1-27
15 “Me ne nya ndi’i woon, a Ésa wome nnye a bé ndi’i woon.
2 A vaa be ma ntyaé ôse ô nji wume bibuma, a kôme fe wu ôse wo wume bibuma, ndemben ô ne wum abui bibuma.
3 Mi ntoo mfuban, amu ajô me nga kate mia.
4 Bo’ané jôme jia a ma, a ma ye bo jôme jia a mia. Fo’o ve avale ntyaé ôbien ô vo’o ki wume bibuma, nge ô nji bembe ndi’i woon, aval éte fe mi vo’o wume bibuma nge mi nji bo jôme jia a ma.
5 Me ne ndi’i woon, mi ne mintyaé. E môt ase a ne jôme jia a ma, ma fe me ntoo jôme jia a nye, môt ate a wume bibuma. Amu, nge mi nji bo a ma, mi vo’o ki bo jôm éziñ.
6 E môt ase a nji bo jôme jia a ma, ba wua nye nseñ aval ane ntyaé, a mane kôt, a bôte ba ye tôkane mintyaé mite a wua mie nduan été, a mia ye dik.
7 Nge mi ne jôme jia a ma, a na mejô mame me too be mia, sila’ané jôm ése mia yi, ja ye bobane nalé mfa’a wônan.
8 Ésa wom a nyoñe duma jame di na, mi ke ôsu a wum abui bibuma a liti na mi ne beyé’é bam.
9 Fo’o ve aval Ésa wom a nga nye’e ma, nde ma nye’e mia; taba’ané nye’ane wom été.
10 Nge mia tôñe metiñe mam, mia ye tabe nye’ane wom été, fo’o ve avale me nga tôñe metiñe me Ésa wom a tabe nye’ane wé été.
11 “Ma kate mia mame ma na ava’a dam é bo be mia a na, ava’a denan é jaé.
12 Atiñe dame nde di na, mi nye’esan; môt ase a nye’e nyu mbo’o fo’o ve aval ane me nga nye’e mia.
13 Teke môt éziñ a bili nye’ane wo dañe wuna na, môt a ve ényiñe* jé asu bemvôé bé.
14 Mi ne bemvôé bame nge mia bo mame ma jô mia na mi bo.
15 Mi nji beta bo alo, amu ôlo ô nji yeme jôme masa wé a bo, ve ma te loone mia na, bemvôé bam amu me maneya bo na, mi yeme mame mese me nga wô’ô be Ésa wom.
16 Mi nji tobe ma, ve ma me nga tobe mia a me nga telé mia na, mi ke ôsu a wume bibuma a na, bibuma bienane bi tabe ayap, mfa’a ya na, jôm ése mia sili Ésa wom e jôé dam, a ye ve mia je.
17 “Mame ma me ne atiñe ma ve mia na môt ase ya be mia a nye’e nyu mbok.
18 Nge si nyu ja vini mia, mia yeme na é nga taté vini ma ôsusua na ja vini mia.
19 Nge mi mbe benyoñe ngabe ya si nyu, si nyu é nga ye nye’e jôm é ne énjé. Éyoñe ji, amu mi nji nyoñe ngap a mame ya si nyu, ve me nga tobe mia si nyu, a amu jam éte si nyu ja vini mia.
20 Ba’alané jame me nga jô mia na: Mbo ésaé a nji dañe masa wé, nge be nga tibili ma, ba ye fe tibili mia; nge be nga tôñe mejô mam, ba ye fe tôñe mejô menan.
21 Ve ba ye bo mia mame mete mese na be wosane mia e jôé dam, amu be nji yeme Nyu a nga lôme ma.
22 Nge me nji ye so a kobô be, be nji ye bi nsem. Ve éyoñe ji, be se ngule ya jô na be nji bi nsem.
23 Môt ase a vini ma a vini fe Ésa wom.
24 Nge me nji ye bo zañe jap mame môte mfe a nji bo, be nga ye bo teke nsem; ve éyoñe ji, be yeneya ma a ba vini ma avale fe ba vini Ésa wom.
25 Ve jame di é nga bobane mfa’a ya jalé mejô me ne ntilane Metiñe me Moïse na: ‘Be nga vini ma teke étom.’
26 Éyoñe mvolô a ye so, nnye ate ma ye lôm a so’o be Ésa wom, nsisime ya benya mejôô, ñwô ôte wo so be Ésa wom, wo ye bo’olô ajô dam;
27 a mia fe, mia yiane kañete amu mi nga tabe a ma aso atata’a.
Notes
^ Éfia Grec, psukhê. Lañe’e Atinane bifia, “Ényiñ.”
