6
იობიქ ბოლოშა ართგურქ ქუდოსქიდ!
სატანაქ ეჭვიშ თუდო გიორინუ ღორონთიშ მიმართ იობიშ ართგურობა. მარა იობიქ ბოლოშა ართგურქ ქუდოსქიდ
ქუდოსქიდუდუო მითინ ღორონთიშ ართგურ ბოლოშა, მუჟამსით გეგმიცადებუდ დო მორჩილებაშ მანგიორო მუთუნს ვემიღენდ? თე კითხვას პასუხ მეჩჷ ართგურ კოჩიქ, სახელო იობიქ.
მუჟამსით ისრაელეფ დიო ხოლო ეგვიპტეს რდეს, იობ, ნამუთ აბრაამიშ ნათესე რდჷ, ცხოვრენდჷ ამდღარ არაბეთიშ ტერიტორიას. ართ დღას ანგელოზეფქ ღორონთიშ წოხოლე გეკიშაყარეს, თინეფ შქას ღორონთიშ მოწინააღმდეგე სატანა ხოლო რდჷ. იეჰოვაქ მუშ ართგურ მსახურიშ, იობიშ მიმართ ნდობა გეგმოხანტჷ დო თქუ, ნამდა მითინ ვა რდჷ იობცალ ართგურ. მარა მუჭოთ სატანა ამტკიცენდჷ, იობ ხვალე თიშენ ომსახურუდ ღორონთის, ნამდა თინა კურთხეულ დო თხილერ რდჷ თიშე. სატანა იჩიებუდ, ნამდა ღორონთ იობის მუთ უღუდუნ ირფელს მიდუღანდჷ-და, თინა ვარიას თქუანდჷ ღორონთშე.
ღორონთიქ სატანას უფლება მეჩჷ, გეგმოცადკო იობ. თიქ დიო მთელ ქონება მიოდინუ, უკულ სქუალეფქ დუღურ დო ბოლოს, მუქ ხოლო სერიოზულო დელახ. იობის ვა უჩქუდ, ნამდა თე ირფელ სატანაშ ბრალ რდჷ, ათეშენ ვარჩქილედ, მუშენ გიოტახ ღორონთიქ თესხი უბედრობა. მარა თეშ უმკუჯინუო, იობის დღას ვა უთქუალ ვარია ღორონთშე.
იობშა გურიშელაკინალო მუშ ითამ მეგობრეფქ ქიმერთეს. თინეფიშ ჩიება ინოჭარილ რე წიგნ „იობის“. თე კოჩეფ ოცადუდეს, დარწმუნესკო იობ, ნამდა ღორონთ ასაჯენდჷ მუშ ცოდვეფიშ გურშენ. თეწკუმა ართო, თინეფ იჩიებდეს, ნამდა ღორონთ ვანდუდ მუშ მსახურეფს დო თიშ მოსაწონ მითინს მუთუნ ვაკეთებედ. იობიქ ქეწინააღმდეგ თინეფიშ არასწორ შეხედულებეფს. თიქ თქუ, ნამდა ონდო ცოცხალ იჸუაფუდ, ღორონთიშ ართგურ ქუდოსქიდუდ!
იობიშ შეცდომა თინა რდჷ, ნამდა ზედმეტო იმართლენდჷ დუდის. ახალგაზრდა კოჩიქ, სახელო ელიჰუქ, ნამუთ ურჩქილედ თინეფიშ ჩიებას, გეგმოხანტჷ მუშ აზრ. ელიჰუქ გუდღან იობის დო უწუ, ნამდა კოჩიშ სიმართლეშ დამტკიცებაშე უმოს მნიშვნელოვან ღორონთიშ უზენაესობაშ დამტკიცება რდჷ. ელიჰუქ, იობიშ ითამ მეგობრეფს ხოლო მეჩჷ შენიშვნა.
იეჰოვა ღორონთიქ დურაგადუ იობის დო აზროვნება გეგშუსწორ. თიქ იობის ყურადღება ქიმიოქციებაფუ გუნაჭყეფუეფშა დო თეშნერო ქაძირუ, მუნერ „ჭიჭე“ რე კოჩ ღორონთიშ გინაწონს. იობიქ თანდაბლურო მიღჷ რჩევა ღორონთშე. იეჰოვაქ, ნამუთ „გიმირჩქინანს სათუთ გრძნობეფს დო … მოჭყოლოფე რე“, დურთინუ ჯამრთელობა იობის დო მაჟია თისხი ქონება ქიმეჩ დო ვით სქუა ქაჩუქ (იაკობი 5:11). შხვადოშხვა გამოცდაშ დროს იობიქ ბოლოშა იეჰოვაშ ართგურქ ქუდოსქიდ დო თეშნერო, ქუპასუხ სატანაშ ბრალდებას, ნამდა ადამიანეფ ვა დოსქიდუნა ღორონთიშ ართგურ გამოცდაშ დროს.
—გერსხილ რე ბიბლიაშ წიგნ „იობშა“.