“Nda seteka ale oku tanga Embimbiliya, pole, eci nda vanja ndomo olio linene, nda yeva esumuo!”—Briana 15 kanyamo.

 Wa siatavo oku liyeva ndoco? Nda oco, ocipama cilo ci ka ku kuatisa!

•  Momo lie ci kuetele esilivilo oku tanga Embimbiliya?

•  Ndi tanga ndati Embimbiliya?

•  Ceci amalẽle vakuavo va popia

 O kuata hẽ o wesi eci o sokolola oku tanga Embimbiliya? Ka ca tĩlile oku kuata elomboloko liesunga lieci o li yevela ndoco. Momo Embimbiliya elivulu limue li kuete eci ci pitahãla ohulukãi kamẽla, lieyuka olotala kuenda ka li kuete oviluvialuvia. Eci ci lomboloka okuti o Televisão kuenda olovideo vi pondola oku molẽha vali ndu okuti vi vetiya.

 Pole, sokolola ndoco: Nda wa sangele ocikasia cimue cinene cosimbu, nda kua kuatele hẽ onjongole yoku tala eci ci kasi vokati kaco?

 Embimbiliya li kasi ndokasia yimue yeyuka ovokuasi. Olio li kuete ovina vialua via tĩla vi pondola oku ku kuatisa:

•   Oku nõla olonjila yiwa

•   Oku kala ciwa lolonjali

•   Oku sanga akamba vocili

•   Oku yula esakalalo

 Ndamupi elivulu limue liosimbu li pondola oku kuata esilivilo lialua koloneke vilo? Momo “Ovisonehua viosi vi Kola, vi tunda ku Suku.” (2 Timoteo 3:16) Eci ci lekisa okuti olonumbi Viembimbiliya vi tunda Kono ya velapo.

 Tete: Tanga Embimbiliya liosi: Eci ci ka ku kuatisa oku kũlĩha ciwa esapulo Lielivulu liaco. Kuli olonjila vialua vioku tanga Embimbiliya liosi. Kũlĩhĩsa olonjila vivali:

•    O pondola oku tanga 66 kalivulu Embimbiliya ndomo ci li kuata lulala u molẽha: oku pisa Kefetikilo toke Kesituluilo.

•    O pondolavo oku tanga Embimbiliya vulandu ndomo ci li kuata lotembo kua pita ovolandu aco, ale ndomo ulandu waco wa pita.

 Onumbi: Elomboluilo A7 Lie Pongoluilo Lio Luali Luo Kaliye, li kuete ulala umue wolotembo viovolandu a velapo a pita komuenyo wa Yesu.

 Vali: Tanga Embimbiliya poku nõla ulandu umue u li kuata locitangi o kasi oku pita laco. Ndeci:

•   O yongola hẽ oku kuata akamba vocili? Tanga ulandu wa Daviti la Yonatão. (1 Samuele, ocipama 18-20) Noke linga ekonomuiso Liembimbiliya “Ndomo O Sanga Akamba Vocili” kuenda kũlĩhĩsa eci o lilongisila kulandu waco.

•   O yongola hẽ oku kuata ongusu yoku tamalala loseteko yimue? Tanga ulandu wa Yosefe loku tala ndomo a ci linga. (Efetikilo ocipama 39) “Ndomo o tamãlala Leyonjo . . . Yosefe—Onepa 1” kuenda “Wa lundiliwa! Yosefe—Onepa 2” kuenje kũlĩhĩsa ndomo ulandu waye u pondola oku ku kuatisa.

•   O yongola hẽ oku kũlĩha ndomo ohutililo yi pondola oku ku kuatisa? Tanga ulandu wa Nehemiya (Nehemia, ocipama 2) “Suku wa tambulula ohutililo yaye” oco o limbuke eci o lilongisila kulandu wa Nehemiya.

 Onumbi: Eci o tanga Embimbiliya, sanda ocitumãlo cimue cõha oco ci ku kuatise oku tiamisila utima kulandu.

 Tatu: Tanga ulandu umue ale osamo yimue noke limbuka ndomo u tiamisiwila kokuove. Ndeci noke yoku tanga, li pula ndoco:

•    Momo lie Yehova a yonguililile okuti ulandu owu u sonehiwa Vembimbiliya?

•    Eci ci ndi longisa nye catiamẽla kovituwa via Yehova ale konjila ndomo eye a linga ovina?

•    Ndi ci kapako ndati komuenyo wange?

 Onumbi: Kuata ocimãho cimue! Nõla eteke o fetika oku tanga Embimbiliya.