Bible always de call Jesus “the Son of God.” (John 1:49) This word “Son of God” show say na God make all life, even the life of Jesus. (Psalm 36:9; Revelation 4:11) Bible no teach say God born any pikin the same way papa and mama de born pikin.

 Bible still de call angels “sons of the true God.” (Job 1:6) And Bible talk say the first man, Adam, na “son of God.” (Luke 3:38) But, because Jesus na the first person wey God make and the only person wey God make by e self, Bible call Jesus the first Son of God.

•  Jesus don live for heaven before they born-am for this earth?

•  Wetin Jesus do before e come this earth?

 Yes. Jesus na spirit for heaven before they born-am as person for this earth. Jesus talk say: “I come down from heaven.”—John 6:38; 8:23.

 God make Jesus first before he make any other thing. See wetin Bible talk about Jesus:

•   “E be . . . the firstborn for everything wey God make.”—Colossians 1:15.

•   E be “the first thing wey God make before e make any other thing.”—Revelation 3:14.

 As Bible talk say this person “don dey from the beginning, for long time” this one happen for the life of Jesus.—Micah 5:2; Matthew 2:4-6.

 E get big position for heaven. Jesus talk about this position when e pray say: “Father, give me the glory . . . wey I get for your side before you make this world.”—John 17:5.

 E help e papa to make all other things. Jesus work with God “as master worker.” (Proverbs 8:30) Bible talk about Jesus say: “Na e God use make all other things for heaven and earth.”—Colossians 1:16.

 God use Jesus to make every other thing. All the angels for heaven, this earth, the stars and every other thing wey we dey see for this earth join for the things wey Jehovah use Jesus to make. (Revelation 5:11) One example wey fit help us understand how Jesus work with Jehovah, na the way architect they work with bricklayer. The architect go draw the plan of how the house go be; and the bricklayer go build-am.

 Jesus na the Word. When Bible dey talk about Jesus before e come this earth, Bible call-am “the Word.” (John 1:1) This one mean say God use e Son to send message to other angels for heaven.

 God fit don use Jesus to talk to people for this earth. E fit be say God use Jesus as the Word to give message to Adam and Eve for garden of Eden. (Genesis 2:16, 17) And e fit be say na Jesus be that angel wey guide Israel people when them dey for wilderness and wey God talk say they must obey e voice.—Exodus 23:20-23. a