Ọkieje yen Baibol na vwo se Jesu “Ọmọ rẹ Ọghẹnẹ.” (Jọn 1:49) Ubiota na “Ọmọ rẹ Ọghẹnẹ” djerephia nẹ Ọghẹnẹ yen Ọmemama na, yẹrẹ Esiri rẹ arhọ eje, eriyin ji te arhọ ri Jesu. (Une Rẹ Ejiro 36:9; Ẹvwọphia 4:11) Baibol na yonori nẹ Ọghẹnẹ vwiẹ ọmọ kerẹ oborẹ esẹ rẹ aruakpọ vwiẹ emọ-ọ.

 Baibol na ji se emekashe na “emọ rẹ Ọghẹnẹ.” (Job 1:6) Baibol na tare nẹ ohworakpọ rẹsosuọ, Adam, “ọmọ rẹ Ọghẹnẹ.” (Luk 3:38) Ẹkẹvuọvo, kidie nẹ Jesu yen emama rẹsosuọ rẹ Ọghẹnẹ, ọyen ọvo yen Ọghẹnẹ je ma komobọ, Baibol na de se Jesu Ọmọ rẹ Ọghẹnẹ ro me kpenu.

•  Jesu dia obo odjuvwu tavwen e ki vwiẹ vwẹ otọrakpọ na?

•  Die yen Jesu ruru tavwen ọ ke rhe otọrakpọ na?

 E. Jesu ọyen ohwo rẹ ẹwẹn vwẹ odjuvwu tavwen e ki vwiẹ kerẹ ohworakpọ vwẹ otọrakpọ na. Jesu da ta: “Mi nẹ obo odjuvwu rhe.”—Jọn 6:38; 8:23.

 Ọghẹnẹ ma Jesu tavwen ọ ke ma erọnvwọn efa. Vwọ kpahen Jesu, Baibol na da ta:

•   “Ọye hẹ . . . ọmọ ọkpako rẹ emama na ejobi.”—Kọlose 1:15.

•   Ọyehẹ “ẹtuọhọ rẹ emama rẹ Ọghẹnẹ.”—Ẹvwọphia 3:14.

 Jesu ru orugba rẹ aroẹmrẹ ro shekpahen “ohwo rọ herọ nẹ awanre rhe, nẹ ọke re rhabae rhe.”—Maika 5:2; Matiu 2:4-6.

 O vwo ẹdia ro kpenu vwẹ odjuvwu. Jesu ta ota kpahen ẹdia nana ọke rọ vwọ nẹrhovwo: “Ọsẹ, . . . vwẹ urinrin kẹ vwẹ vẹ urinrin ri mi vwori vwẹ obaro wẹn tavwe rẹ akpọ na ke mama.”—Jọn 17:5.

 Ọ vwẹ ukẹcha vwọ kẹ Ọsẹ rọyen vwọ ma erọnvwọn ichekọ eje. Jesu nene Ọghẹnẹ wian “kerẹ onotu rẹ ọwena.” (Isẹ 8:30) Vwọ kpahen Jesu, Baibol na da ta: “Oma rọye a wan ma kemu kemu ejobi, re hẹ obo odjuvwu kugbe re hẹ otọ rẹ akpọ na.”—Kọlose 1:16.

 Womarẹ Jesu ọyen Ọghẹnẹ wan ma erọnvwọn ichekọ eje. Emama nana churobọ si emekashe na, ji te otọrakpọ na eje. (Ẹvwọphia 5:11) Vwẹ ẹdia evo, ọwiankugbe rẹ Ọghẹnẹ vẹ Jesu na họhọ ohwo ro si iplani rẹ uwevwin vẹ ohwo ro ruiruo rẹ ebanbọn. Ohwo ro si iplani na yen si oborẹ uwevwin na cha dia phiyotọ; ohwo ro ruiruo rẹ ebanbọn na me rha bọn uwevwin na.

 Ọyehẹ Ọtota rẹ Ọghẹnẹ. A vwọ ta ota kpahen ọke rẹ Jesu vwọ hẹ obo odjuvwu ọ ke rhe otọrakpọ na, Baibol na de se Jesu “Ota na.” (Jọn 1:1) Ọyena mudiaphiyọ nẹ Ọghẹnẹ reyọ Ọmọ rọyen vwọ vwẹ ovuẹ vẹ odjekẹ vwọ kẹ emekashe ichekọ na.

 Ọhọhọre nẹ Jesu jẹ Ọtota rẹ Ọghẹnẹ rọ vwẹ ovuẹ rẹ Ọghẹnẹ vwo rhe ihworakpọ. Ọ sa dianẹ womarẹ Jesu kerẹ Ota na yen Ọghẹnẹ vwọ reyọ odjekẹ vwọ kẹ Adam vẹ Ivi vwẹ ogba rẹ Idẹn. (Jẹnẹsis 2:16, 17) Ọ sa dianẹ Jesu yen amakashe yena ro sun ihwo rẹ Izrẹl wan aton, upho rọyen yen ihwo rẹ Izrẹl je kerhọ kẹ vwẹ ọke yena.—Eyanno 23:20-23. a