Kubayini IBhayibheli Libiza UJesu Ngokuthi Yindodana KaZimu?
Ipendulo yeBhayibheli
IBhayibheli libiza uJesu ngokuthi “yiNdodana kaZimu.” (Jwanisi 1:49) Amezwi athi “Ndodana kaZimu” atjho ukuthi uZimu ungumDali namkha umThombo, wakho koke okuphilako, okufaka hlangana uJesu. (IRhubo 36:9; IsAmbulo 4:11) IBhayibheli alifundisi bona uZimu ube nomntwana ngendlela abantu ababa nabantwana ngayo.
IBhayibheli libuye libize iingilozi ngokuthi “madodana kaZimu.” (Jobho 1:6) IBhayibheli lithi umuntu wokuthoma, u-Adamu, “bekayindodana kaZimu.” (Lukasi 3:38) Nanyana kunjalo, ngebanga lokuthi uJesu bekayindalo kaZimu yokuthoma begodu okunguye kwaphela uZimu amenza ngokunqophileko, iBhayibheli lihlathulula uJesu njengendodana kaZimu eqakathekileko.
Kghani uJesu bekasezulwini ngaphambi kobana abelethwe ephasini?
Iye. UJesu bakasibunjwa sommoya ngaphambi kobana abelethwe abe mumuntu ephasini. UJesu ngokwakhe wathi: “Ngehle ngivela ezulwini.”—Jwanisi 6:38; 8:23.
UZimu wadala uJesu ngaphambi kobana adale okhunye okuphilako. Malungana noJesu, iBhayibheli lithi:
“uyizibulo layo yoke indalo.”—Kolose 1:15.
“usithomo sendalo kaZimu.”—IsAmbulo 3:14.
UJesu wasizalisa isiphorofido esimalungana naloyo ‘iindabuko yakhe ivela phambilini ekadeni.’—Mikha 5:1; Matewu 2:4-6.
Khuyini uJesu egade ayenza ngaphambi kobana eze ephasini?
Bekanesikhundla esiphakemeko ezulwini. UJesu bekakhuluma ngesikhundlesi lokha nakathandazako athi: “Baba, ngiphazimulisa . . . ngephazimulo egade nginayo eqadi kwakho ngaphambi kobana kube nephasi.”—Jwanisi 17:5.
Wasiza uBabakhe bona adale zoke ezinye izinto. UJesu bekasebenza eqadi kwakaZimu “angusosino.” (IzAga 8:30) Malungana noJesu, iBhayibheli lithi: ‘Zoke ezinye izinto ezulwini nephasini zadalwa ngaye.’—Kolose 1:16.
UZimu bekasebenzisa uJesu bona adale ezinye izinto eziphilako. Indalo leyo beyifaka hlangana iimbunjwa zommoya kunye nephasi lethu. (IsAmbulo 5:11) Ngendlela efanako, itjhebiswano elikhona hlangana noZimu noJesu, belifana nelomtlami osebenzisana nomuntu owakhako. Umtlami wenza umtlamo, bese kuthi umuntu owakhako asebenzise umtlamo loyo bona akhe umakhiwo.
BekanguLizwi. Nalikhuluma ngokuphila kwakaJesu ngaphambi kobana abe mumuntu, iBhayibheli libiza uJesu ngokuthi ‘nguLizwi.’ (Jwanisi 1:1) Kuyakhanya bona uZimu bekasebenzisa indodanakhe ukuthi adlulisele imininingwana neenqophiso kezinye iimbunjwa zommoya.
Kubonakala ngasuthi uJesu bekamKhulumeli kaZimu lokha nakakhuluma nabantu ephasini. UZimu kungenzeka bekasebenzisa uJesu njengoLizwi lokha nakanikela u-Adamu no-Eva iinqophiso esimini ye-Edeni. (Genesisi 2:16, 17) Kungenzeka bona uJesu bekayingilozi leya eyanqophisa ama-Israyeli wekadeni emmangweni, begodu bekuliphimbo layo ebekufuze balilalele.—Eksodusi 23:20-23.a
a ULizwi akusuye kwaphela ebekakhulumela uZimu. Ngokwesibonelo, wasebenzisa amadodanakhe aziingilozi bona adlulilsele imiThethwakhe kuma-Israyeli wekadeni.—IzEnzo 7:53; Galatiya 3:19; Hebheru 2:2, 3.