Bika Bibakatumbwila Yesu Ngwabo Muna Njambi?
Biyendeka Mbimbiliya
Kakangi mu Mbimbiliya, Yesu banamutumbula ngwabo “Muna Njambi.” (Yowano 1:49) Endekesi ya “Muna Njambi” imwesa ngwayo Njambi ikeye Ishamatanga nambe babenya mwonyo wa byuma byoshe kwambateselela na Yesu. (Myaso 36:9; Kujombolola 4:11) Mbimbiliya kuimwesa ngwayo Njambi wakitile mwana ngwe mubakakitila bana banu embwe.
Mbimbiliya inatumbula lalo tungelo ngwayo “bana ba Njambi.” (Yombi 1:6) Co lalo Mbimbiliya inatumbula Adama, munu wa kulibanga ngwayo wapwile “muna Njambi.” (Luka 3:38) Oloni Mbimbiliya imwesa ngwayo Yesu ikeye muna Njambi wa seho manene mwafwa ikeye yashangumukilile kutanga, co lalo ikeye lika yatangele Njambi likalyendi.
Kuma Yesu wayoyele tahi mwilu simbu kanda akusemuke hano hasi ndi?
Eyo. Yesu wapwile kangelo mwilu simbu kanda akusemuke hano hasi na kupwa munu wa situ. Yesu ikeye babenya wendekele ngwendi: ‘Njinatundu mwilu.’—Yowano 6:38; 8:23.
Njambi watangele tahi Yesu simbu kanda atange cuma coshe-coshe. Mbimbiliya inendeka hali Yesu ngwayo:
‘Ikeye ntwatwa wa byuma byoshe bya kutanga.’—Kolose 1:15.
“Ikeye nsina ya byuma byoshe bije byatangele Njambi.”—Kujombolola 3:14.
Yesu washulisilile bupolofweto buje bwendekele bya munu uje ‘wakeleko tunde kusañulu.’—Mika 5:2; Mateo 2:4-6.
Bika byakele na kulinga Yesu simbu kanda aije hano hasi?
Wakele na moko yakama mwilu. Yesu wendekele byei moko omwo walombele Ishe ngwendi: “Tate, Njane bumpau ku mesho obe . . . bumpau buje njakele nabwo hamo nobe simbu kanda utange kaye.”—Yowano 17:5.
Wakwasele Ishe mu kutanga byuma byoshe. Yesu wapangelele hamo na Njambi mu kupwa “ngangula mu kupanga.” (Visimo 8:30, NWT) Mbimbiliya inendeka hali Yesu ngwayo: “Muli ikeye Njambi watangele byuma byoshe bya mwilu nebi bya hasi.”—Kolose 1:16.
Njambi wapangesele Yesu mu kutanga byuma byoshe. Ebi byuma binambateselela tungelo na byuma byoshe bili mwilu na hano hasi. (Kujombolola 5:11) Twasa kwesekesa likwatasano lyakele mukati ka Njambi na Yesu ku likwatasano likakala mukati ka mukulunu wa bipangi na mwato wendi. Mukulunu wa bipangi akaleke mwato wendi byakulinga, ikeyeco alingamo.
Wapwile Lijwi. Mbimbiliya ngwayo simbu kanda Yesu akupwe munu hano hasi, wapwile “Lijwi.” (Yowano 1:1) Cisholoka Njambi wapangesele Munendi mu kuleka tungelo mizimbu na mashiko a kutunda kuli ikeye.
Cisholoka ngwe Yesu wakele lalo na kwetesa mizimbu ya kutunda kuli Njambi ku banu. Cakumwenako, cisholoka ngwe Njambi wapangesele Yesu mu kwana mashiko kuli Adama na Eva mu citungu ca Edeni. (Kushangumuka 2:16, 17) Co lalo cisholoka ngwe Yesu ikeye kangelo watwamenenene Baisalele mu mambo, co bapandele kwononoka lijwi lyendi.—Kutuuka 23:20-23. a
a Lijwi keti ikeye lika kangelo yapangesele Njambi mu kusimutwiya na banu. Cakumwenako, wapangesele tungelo beka mu kwana Baisalele mashiko.—Vilinga 7:53; Ngalatiya 3:19; Vahevelu 2:2, 3.