Kakavulu Mbimbiliya yavuluka Yesu ngwayo “MwanaKalunga.” (Yowano 1:49) Lizu “MwanaKalunga” lyasolola nge Kalunga ikiye Tengi chipwe Kasulu kakuyoya kuhakilako vene nakuyoya chaYesu. (Samu 36:9; Kusoloka 4:11) Mbimbiliya kayatunangula ngwayo Kalunga asemene mwana, ngana muze vatu veji kusemanga vanako.

 Mbimbiliya yavuluka nawa vangelo ngwayo “vana vaKalunga.” (Yopa 1:6) Mbimbiliya yahanjika nawa ngwayo, mutu watete Alama, apwile “mwanaKalunga.” (Luka 3:38) Chipwe ngocho, hakuwana nge Yesu ikiye vavangilile kutenga havyuma vyosena, kaha nawa ikiye kaha vatengele kuli Kalunga ivene, ngocho Mbimbiliya yamuvuluka kupwa MwanaKalunga wamulemu chikuma.

•  Uno Yesu apwile mwilu shimbu kanda ezanga nakusemukila hano hamavu tahi?

•  Vyuma muka apwile nakulinga Yesu shimbu kanda ezanga hano hamavu?

 Eyo. Yesu apwile mutu wakushipilitu mwilu shimbu kanda ezanga nakusemuka mwamutu hano hamavu. Yesu ivene ambile ngwenyi: “Nguneza kufuma mwilu.”—Yowano 6:38; 8:23.

 Kalunga avangilile kutenga Yesu shimbu kanda atenge vyuma vyosena. Mbimbiliya yahanjika kutalisa kuli Yesu ngwayo:

•   “Ikiye . . . twatwa kuvyuma vyakutenga vyosena.”—Wavaka-Kolose 1:15.

•   “Apwa maputukilo kuvyuma vyakutenga kuli Kalunga.”—Kusoloka 3:14.

 Yesu ateselemo upolofweto wamutu uze akwechi “kuyoya chenyi chaputukile kushikulu, kumakumbi akunyima.”—Mika 5:2; Mateu 2:4-6.

 Apwile nachihela chachinene mwilu. Yesu ahanjikile kutalisa kuchihela chenyi hakulomba ngwenyi: “Ove Tata, ngutohwese . . . naupahu uze ngwapwile nawo omu ngwapwilenga kuli ove shimbu kanda kaye kachipweko.”—Yowano 17:5.

 Akafwilenga Ise kutenga vyuma vyeka vyosena. Yesu azachililenga hamwe naKalunga nakupwa ‘kuluwa muka-kuzata.’ (Vishimo 8:30) Mbimbiliya yahanjika hali Yesu ngwayo: “Muli ikiye mukiko vatengelele vyuma vyeka vyosena vyamwilu navyahamavu.”—Wavaka-Kolose 1:16.

 Kalunga atengele vyuma vyeka vyosena kuhichila muli Yesu. Havyuma kana hapwile navangelo navyuma vyamumelu nahamavu. (Kusoloka 5:11) Mujila yikwavo, chivwasano chapwile hali Kalunga naYesu, chalifwana nachize cheji kupwanga hali muka-kufunjika jizuvo namuka-kutunga. Muka-kufunjika eji kufunjikanga omu yatela kupwa zuvo, kaha muka-kutunga eji kukatulanga jino zuvo.

 Apwile Lizu. Mbimbiliya yazachisa lizu, “Lizu” hakuhanjika hakuyoya chaYesu chahano hamavu. (Yowano 1:1) Echi chalumbununa nge Kalunga azachishilenga Mwanenyi mangana alweze vangelo mijimbu najindongi.

 Chasoloka nge Yesu apwilenga Muka-kuhanjikilako Kalunga kuvatu hano hamavu. Chasoloka nawa nge Kalunga azachishile Yesu uze apwile Lizu, hakuhana jindongi vaAlama naEve mumilemba yaEtene. (Kuputuka 2:16, 17) Kaha nawa Yesu pamo ikiye apwile kangelo uze atwaminyinyine vaIsalele mupambo uze nawa mwenya lizu lize vatelelele kwononoka.—Kulovoka 23:20-23. *