Библияда Иисус Христос удаа «Худайның Оолғы» тіп адалча (Иоанн 1:49). Пу сӧстер Худай прай нимее, Иисусха даа чуртас пиргенін таныхтапчалар (Псалом 36:9; Азых чоох 4:11). Библия Худай, кізі чіли, паба пол парған тіп ӱгретпинче.

 Библияда ангеллер ідӧк «сын Худайның ооллары» тіп адалчалар (Иов 1:6). Библия хоостыра, пастағы кізі Адам ідӧк «Худайның оолғы» полған (Лука 3:38). Че Библия Иисус Христосты Худайның пасха оолларынаң оонаң турғысча. Иисус Худайның пастағы чайаағы полған. Худай аны ла чалғызан чайаан.

•  Чирде тӧрир алнында Иисус тигірде чуртаан ма?

•  Иисус чирзер килер алнында ниме иткен?

 Я. Чирде тӧрир алнында Иисус тигірде духовнай личность полған. Ол позы теен: «Мин тигірдең... килгем» (Иоанн 6:38; 8:23).

 Худай Иисусты прай пасха нимелердең пурун чайап салған. Библияда Иисустаңар піди чоохталча:

•   «Ол ноо даа чайаахтаң пурун тӧреен тун Оолғы» (Колосстағыларға 1:15),

•   «Худай чайаан нимелернің Пазы» (Азых чоох 3:14).

 Библиядағы ухаанҷылас хоостыра, Иисус «ол пурунғы тустардаң, ыраххы кӱннердең сығара чуртапча» (Михей 5:2; Матфей 2:4—6).

 Тигірде ол пӧзік орында полған. Иисус, Худайға пазырчатханда, позынаңар піди теен: «Амды Син, Пабам, сабланызыңнаң Мині сабландыр. Ол сабланыс, чир ӱстӱ чайалғалахтох, Синнең хада полғанымдох, Мини полған» (Иоанн 17:5).

 Ол Пабазына прай нимелерні чайирға полысхан. Иисус Худайнаң хада тоғынған паза «аның ус тоғысчызы полған» (Притчи 8:30). Библияда Иисустаңар чоохталча: «Тигірдегізі паза чирдегізі, кӧрінчеткені паза кӧрінмезі — прай ниме Аның пастыра пӱткен» (Колосстағыларға 1:16).

 Иисустың полызиинаң Худай прай пар нимені — духовнай чайаахтарны даа, Тилекейні дее — чайап салған (Азых чоох 5:11). Худайның Иисуснаң хада тоғынғанын архитектор пӱдірігҷілернең хада тоғынчатханынаң тиңнестірерге чарир. Архитектор проект итче, пӱдірігҷі ол проект хоостыра пӱдірче.

 Ол «Сӧс» полған. Библия Иисус чирзер килер алнында «Сӧс» полған тіпче (Иоанн 1:1). Анзы Худай Иисус пастыра пасха духовнай чайаахтарға чахығларын паза устағларын читіргенін таныхтапча полар.

 Ағаа хоза, Иисус кізілерге Худайның Представительі полған. Худай Иисус пастыра Адамға паза Еваа Эдем садында устағлар пирген полар (Бытие 2:16, 17). Хуу чаазыҷа Израиль чонын апарған ангел ідӧк Иисус полған полар. Чон ол ангелнің чооғын истерге кирек полған (Исход 23:20—23) a.